ស្នងការដ្ឋាននគរបាលខេត្តកំពត បានធ្វើពិធីប្រគល់-ទទួលថវិកាសមាគមមិត្តនគរបាលជាតិកម្ពុជាជូនដល់គ្រួសារសពចំនួន ០២ គ្រួសារ
ខេត្តកំពត ៖ ថ្ងៃសុក្រ ១៥កើត ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ០៥ ខែមិថុនា ឆ្នាំ ២០២០ វេលាម៉ោង ១០:៣០ នាទី នៅស្នងការដ្ឋាននគរបាលខេត្តកំពត បានធ្វើពិធីប្រគល់-ទទួលថវិកាសមាគមមិត្តនគរបាលជាតិកម្ពុជាជូនដល់គ្រួសារសពចំនួន ០២ គ្រួសារ ស្មើនឹងទឹកប្រាក់ចំនួន ៨.០០០.០០០៛ (ប្រាំបីលានរៀលគត់) ក្រោមអធិបតីភាពលោកវរសេនីយ៍ឯក ឡុង គីម ស្នងការរងផែនការងារធនធានមនុស្ស តំណាងដ៏ខ្ពង់ខ្ពស់របស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត និងក្រុមការងារការិយាល័យបុគ្គលិកសរុបចំនួន ០៥ រូប ៕
ឆ្លៀតក្នុងឱកាសនោះ លោកវរសេនីយ៍ឯក ឡុង គីម បានពាំនាំពាក្យពេជន៍ដ៏មានតម្លៃរបស់លោកឧត្តមសេនីយ៍ទោ ស្នងការ សំដែងនូវការសោកស្តាយជាពន់ពេក និងសូមចូលរួមរំលែកមរណៈទុក្ខដ៏ក្រៀមក្រំនេះចំពោះក្រុមគ្រួសារសព ព្រមទាំងដឹងគុណចំពោះស្នាដៃដែលមន្រ្តីនគរបាលយើងខិតខំបំពេញភារកិច្ចជូនជាតិមាតុភូមិ និងបម្រើប្រជាពលរដ្ឋអស់ពីកម្លាំងកាយ កម្លាំងចិត្តកន្លងមក ធ្វើឲ្យយើងទាំងអស់គ្នាចងចាំមិនអាចបំភ្លេចបាន ។ លោកឧត្តមសេនីយ៍ទោ ស្នងការ ក៏បានផ្តាំផ្ញើបន្ថែមទៀតដល់បងៗក្រុមគ្រួសារសពដែលនៅរស់រានមានជីវិត ត្រូវបន្តយកចិត្តទុកដាក់ថែរក្សាសុខភាព អប់រំកូនចៅឲ្យបានល្អ និងខិតខំប្រកបរបររកស៊ី ដេីម្បីផ្គត់ផ្គង់ជីវភាពក្នុងគ្រួសារឲ្យបានរីកចម្រើន ហើយលោកស្នងការនឹងជួយឧបត្ថម្ភទៅតាមលទ្ធភាពដែលអាចធ្វើទៅបាននៅពេលគ្រួសារសពណាជួបការលំបាក ៕ អត្ថបទ នគរបាលខេត្តកំពត