បែកធ្លាយអំពើពុករលួយ និងប្រវត្តិជាមេក្លោងជួញដូរគ្រឿងញៀន របស់លោក សោម សារ៉ន អធិការនគរបាលស្រុកស្វាទាប និងករណីរត់ការបិទបាំងរឿងក្តី

បែកធ្លាយគំរប់លូទប់លែងជាប់ ដោយសារចំហេះនៃអំពើពុករលួយស្អុយបែកវល់របស់លោក សោម សារ៉ន ដែលមានតួនាទីជាអធិការនគរបាលស្រុកស្វាយទាប នៃស្នងការដ្ឋាននគរបាលខេត្តស្វាយរៀង ពេលនេះត្រូវបានទំលាយដោយមន្ត្រីក្រោមឱវាទ។

នេះយោងតាមប្រភពព័ត៌មានបានឲ្យដឹងថា៖ មន្ត្រី​នគរបាល នៃ​អធិការដ្ឋាន​នគរបាល​ស្រុក​ស្វាយ​ទាប​ចំនួន​​២៤​រូប រួម​មាន៖ អធិការរង នាយ​ផ្នែក នាយ​រង​ប៉ុស្តិ៍​នគរបាល​ទាំង​៩​ឃុំ ក្នុងស្រុក​ស្វាយ​ទាប នៃខេត្តស្វាយរៀង បានរួមគ្នាផ្តិតមេដៃដាក់លិខិតគោរពជូនសម្តេច​មហា​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី​នៃ​ព្រះ​រាជា​ណាចក្រ​កម្ពុជា និងគោរពជូន ឯកឧត្តម​អភិ​សន្តិ​បណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ព្រមទាំងគោរពជូន ឯកឧត្តម​ នាយ​ឧត្តមសេនីយ៍ ស ថេ​ត អគ្គស្នងការ​នគរបាល​ជាតិ ស្តី​អំពី​ភាព​មិន​ប្រក្រតីរបស់លោក សោម សារ៉ន អធិការនគរបាលស្រុកស្វាយទាប។

ដោយក្នុងលិខិតបានបញ្ជាក់រៀបរាប់អំពី អំពើពុករ​លួយ បក្សពួក​និយម គ្មាន​ភាព​ជា​អ្នកដឹកនាំ ក្នុង​ការ​ដឹកនាំ​របស់​លោក​វរសេនីយ៍ទោ សោម​សា​រ៉​ន អធិការ​នៃ​អធិការដ្ឋាន​នគរបាល​ស្រុក​ស្វាយ​ទាប ដោយ​ចោទប្រកាន់​រហូត​ទៅដល់ ១០​ចំណុច។

ដោយខ្លឹមសារនៃចំណុចនីមួយៗ បញ្ជាក់យ៉ាងច្បាស់ អំពីអំពើពុករលួយ និងបក្សពួក​និយម ថែមទាំងមានប្រវត្តិធ្លាប់ជាមេក្លោងជួញដូរគ្រឿងញៀនដ៏សកម្ម កាលពីនៅជាអតីតមេប៉ុស្តិ៍ព្រៃអង្គុញ ក្នុងអំឡុងឆ្នាំ២០១៦ និងត្រូវបានបងប្រុសបង្កើតរបស់ខ្លួន ដែលមានឋានៈថ្នាក់ឧត្តមសេនីយ៍ផ្កាយ១ លោក អ៊ុក សំអៀង អន្តរាគមន៍រត់ការបិទបាំងរឿងក្តី និងបានដំឡើងឋានៈតួនាទីរហូតក្លាយជាអធិការនគរបាលស្រុកស្វាយទាប។

ហើយលោក សោម សារ៉ន អធិការនគរបាលស្រុក រូបនេះ តែងតែលួចលក់នូវវត្ថុតាង ដែលបានមកពីបទល្មើសរួមមាន រថយន្ត ម៉ូតូ និងរម៉ក យកទៅលក់ឲ្យឈ្មួញយ៉ាងអណាធិបតេយ្យដោយគ្មានខ្លាចរអា។

យ៉ាងណាករណីនេះយើងសង្កេតឃើញថានៅមិនទាន់មានការបកស្រាយបំភ្លឺណាមួយពីសំណាក់ លោកឧត្តមសេនីយ៍ទោ ពេជ្រ វិរៈ ស្នងការនៃស្នងការដ្ឋាននគរបាលខេត្តស្វាយរៀង ក៏ដូចជាលោក សោម សារ៉ន អធិការនគរបាលស្រុកស្វាយទាប នៅឡើយនោះទេ។ ហើយករណីនេះយើងមិនដឹងនោះទេថា ថ្នាក់ដឹកនាំគួរតែដំឡើងឋានន្តរស័ក្តិ ជូនលោកសោម សារ៉ន  មួយថ្នាក់ទៀត ឬមួយក៏ទំលាក់ស័ក្តិឲ្យមកនៅត្រឹម រាស្ត្រសាមញ្ញធម្មតា។

ចំណែកឯលោកឧត្តមសេនីយ៍ផ្កាយ១ អ៊ុក សំអៀង ស្នងការរងនគរបាលខេត្តស្វាយរៀង ទទួលផែនការងារភស្តុភារ និងហិរញ្ញវត្ថុ ដែលត្រូវជាប្រុសបង្កើតនិងជាអ្នកអន្តរាគមន៍រត់ការបិទបាំងរឿងរលួយស្អុយរបស់លោក សោម សារ៉ន នាពេលកន្លងមកនោះ ពេលនេះអង្គភាពសារព័ត៌មានយើងមិនអាចសុំការបំភ្លឺបាននោះទេ ពាក់ព័ន្ធទៅនឹងករណីអន្តរាគមន៍រត់ការបិទបាំងរឿងក្តី ព្រោះគ្មានលេខទូរស័ព្ទទំនាក់ទំនង។

ទោះបីជាយ៉ាងណាក្តី យើងនៅមិនទាន់ដឹងនោះទេអំពីជោគវាសនារបស់លោក សោម សារ៉ន ដែលរងការការចោទប្រកាន់ថាជាអតីតមេក្លោងជួញដូរគ្រឿងញៀន និងលោកផ្កាយ១ អ៊ុក សំអៀង រងការចោទប្រកាន់ពាក់ព័ន្ធរត់ការបិទបាំងរឿងក្តីជូនប្អូនប្រុសបង្កើតរបស់ខ្លួន៕

ស្នងការខេត្តស្វាយរៀង

លោកអ៊ុកសំអៀង

លោកសោមសារ៉ន