ខឹងស្រីស្នេហ៍ផ្ដាច់ទំនាក់ទំនងជាមួយ សម្រេចចិត្តបង្ហោះរូបអាក្រាតកាយដែលបានដេកជាមួយគ្នាក្នុងផ្ទះសំណាក់ចែកចាយពេញបណ្ដាញសង្គម

ខេត្តកណ្ដាល ៖ ជនសង្ស័យឈ្មោះ ង៉ែត សុផាត ភេទប្រុស អាយុ៣៦ឆ្នាំ មានទីលំនៅភូមិតាញព្រាម សង្កាត់ត្រើយកោះ ក្រុងកំពត ខេត្ដកំពត មុខរបរកម្មករសំណង់។ ចំណែកនារីរងគ្រោះមានអាយុ៣២ឆ្នាំ មានទីលំនៅភូមិពាមប្រជុំ ឃុំព្រែកអំបិល ស្រុកស្អាង ខេត្ដកណ្ដាល ។

បុរសម្នាក់នេះត្រូវបានឃាត់ខ្លួនបាននៅថ្ងៃទី០៣ ខែកក្កដាឆ្នាំ២០២០ នាំមកស្នងការដ្ឋាននគរបាលខេត្ត​ដើម្បីកសាង សំណុំរឿងចាត់ការតាមច្បាប់ បន្ទាប់ពីបុរសសង្ស័យរូបនេះបានយករូបថតអាក្រាតកាយរបស់ស្រីស្នេហ៍ ដែលបានឡើងឋានសួគ៌ជាមួយគ្នានៅក្នុងផ្ទះសំណាក់នោះទៅចែកចាយបរិហារកេរ្ដិ៍ជាសាធារណះ ដោយសារតែបុរសសង្ស័យរូបនេះខឹងស្រីស្នេហ៍ផ្ដាច់ទំនាក់ទំនងស្នេហា​ជាមួយខ្លួន។

ករណីនេះកើតឡើងកាលពីថ្ងៃទី១២ ខែឧសភា ឆ្នាំ២០២០ នៅចំណុចភូមិពាមប្រជុំ សង្កាត់ព្រែកអំបិល ស្រុកស្អាង ខេត្ដកណ្ដាល។

វត្ថុតាងដកហូតបានមាន​ ទូរស័ព្ទ០១គ្រឿង ម៉ាកOPPO ពណ៌ខ្មៅ ។

កន្លងមក​នារីរងគ្រោះ និង ជនសង្ស័យបានស្គាល់គ្នាតាមរយះបណ្ដាញសង្គមហ្វេសប៊ុក ដោយជនសង្ស័យប្រើប្រាស់ អាក់ខោនហ្វេសប៊ុកឈ្មោះ Punleu Meas រហូតមានទំនាក់ទំនងស្នេហាជាមួយគ្នា រហូតដល់ថ្ងៃទី ១៦ ខែកុម្ភ: ឆ្នាំ២០២០ វេលាម៉ោង ១០.០០នាទី នារីរងគ្រោះបានណាត់ជាមួយជនសង្ស័យតាមហ្វេសប៊ុក  ដើម្បីមកផ្ទះសំណាក់ម្តុំផ្សារ ដើមគរ (មិនចាំយីហោ) និងបានដេកនៅជាមួយគ្នារហូតដល់ម៉ោង៥ ហើយខណះដែលដេកជាមួយគ្នានោះ ជនសង្ស័យបានលួចថតសកម្មភាពរបស់ខ្លួន​ និង នារីរងគ្រោះក្នុងសភាពអាក្រាតកាយទុកក្នុងទូរស័ព្ទដៃរបស់ខ្លួន ។

រហូតមកដល់ថ្ងៃទី០៦ ខែមេសា​ ឆ្នាំ២០២០ ដោយសារតែជនសង្ស័យឈ្មោះ ង៉ែត សូផាត បានប្រើពាក្យសម្តីមាក់ងាយដល់នារីរងគ្រោះ ទើបនារីរងគ្រោះព្យាយាមផ្តាច់ទំនាក់ទំនងស្នេហា និងបានប្លុកលេខទូរស័ព្ទ ព្រមទាំងអាក់ខោនហ្វេសប៊ុកដែលធ្លាប់លេងជាមួយគ្នានោះក៏ប្លុកចោលដែរ។

ចាប់តាំងពីបែកបាក់ជាមួយស្រីស្នេហ៍មកដល់ថ្ងៃទី១២​ខែឧសភា ឆ្នាំ២០២០ ជនសង្ស័យបានឆាតរូបអាក្រាតកាយរបស់នារីរងគ្រោះនោះចូលក្នុងអាក់ខោនហ្វេសប៊ុករបស់ក្មួយប្រុសនារីរងគ្រោះ​ និង មិត្តភក្តិមួយចំនួនផ្សេងទៀត ដោយប្រើពាក្យប្រមាថមើលងាយទៅលើនារីរងគ្រោះទៀតផង។

រហូតបែកធ្លាយដល់នារីរងគ្រោះដឹងថាជនសង្ស័យចែកចាយរូបអាក្រាតកាយរបស់ខ្លួន ក៏ដាក់ពាក្យបណ្ដឹង ប្តឹង ទៅនគរបាលជំនាញខេត្តកណ្ដាល ហើយភ្លាមៗនោះសមត្ថកិច្ចបានចុះមកធ្វើការស្រាវជ្រាវរហូតចាប់ខ្លួនជនសង្ស័យបាន រួចយកមកស្នងការដ្ឋាននគរបាលខេត្ត ដើម្បីកសាងសំណុំរឿងចាត់ការតាមច្បាប់។

ចំណែកជនសង្ស័យក៏បានសារភាពថាខ្លួនពិតជាបានលួចថតរូបអាសអាភាស ពេលដេកជាមួយជនរងគ្រោះ ហើយបានផ្ញើរូបភាព និង សារជាសំឡេងបរិហារកេរ្ដិ៍ ទៅឲ្យបងប្អូន មិត្ដភក្តិជនរងគ្រោះបានឃើញពិតប្រាកដមែ។