គណ:កម្មការទី៣ នៃរដ្ឋសភា និងក្រសួងបរិស្ថានជួបប្រជុំពិភាក្សាលើសេចក្តីព្រាងក្រមបរិស្ថាន និងធនធានធម្មជាតិ
![](https://blogger.googleusercontent.com/img/b/R29vZ2xl/AVvXsEh2J1h9W9iifPhqjndarQxP-lzEk7jOvrwdnhVCAtfHoSkytg7XgHC98hkKJXpuBjPadlpeZhUpuvl2WdtXfS5Q5Bh8y--GDFuDXTTIFpt5eBYqf5ia7oxE9dn-Rsjr14yA82HPp4oNKrFUvDXRuued9jgaflP_b9r3sER1oVhYALOvEMXQj-GaDBra/s1600/IMG_20230524_135414_734.jpg)
គណ:កម្មការទី៣ នៃរដ្ឋសភា និងក្រសួងបរិស្ថានជួបប្រជុំពិភាក្សាលើសេចក្តីព្រាងក្រមបរិស្ថាន និងធនធានធម្មជាតិ
-------------------------------------------------
នៅវិមានរដ្ឋសភា នាព្រឹកថ្ងៃទី២៣ ខែឧសភា ឆ្នាំ២០២៣ គណ:កម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា ដឹកនាំដោយ ឯកឧត្តម ឡូយ សុផាត បានជួបពិនិត្យពិភាក្សាលើសេចក្តីព្រាងក្រមបរិស្ថាន និងធនធានធម្មជាតិ ជាមួយតំណាងរាជរដ្ឋាភិបាល ដែលដឹកនាំដោយ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងសហការី ក៏ព្រមទាំងមានការអញ្ជើញចូលរួមពីសំណាក់ឯកឧត្តម លោកជំទាវ ជាសមាជិក សមាជិកា គណ:កម្មការជំនាញនានារបស់រដ្ឋសភាផងដែរ។
ឯកឧត្តម សាយ សំអាល់ បានមានប្រសាសន៍ថា គោលបំណងចម្បងនៃសេចក្តីព្រាងក្រមបរិស្ថាន និងធនធានធម្មជាតិនេះ គឺប្រមូលផ្តុំសំយោគបញ្ចូលគ្នានូវបទប្បញ្ញត្តិនៃច្បាប់ និងលិខិតបទដ្ឋានគតិយុត្តនានាជាធរមានក្នុងវិស័យបរិស្ថាន និងធនធានធម្មជាតិ ដោយធ្វើសមាហរណកម្ម សុខដុមនីយកម្ម និងទំនើបកម្ម ឱ្យមានភាពជាក់ស្ដែងនិយម សង្គតិភាព វិសាលភាព និងភាពស៊ីសង្វាក់ប្រទាក់ក្រឡាគ្នា ដើម្បីក្លាយជាបទប្បញ្ញត្តិគោល ដែលកំណត់ពីដែនសមត្ថកិច្ចនៃក្រសួង ស្ថាប័នពាក់ព័ន្ធ សំដៅសម្រួលដល់ការអនុវត្តមុខងារ និងតួនាទីភារកិច្ចរៀងៗខ្លួន ស្របទៅនឹងបរិបទរីកចម្រើននៃសង្គមកម្ពុជាថ្មី ជាពិសេសបានបំពេញបន្ថែម និងមានភាពស៊ីសង្វាក់ប្រទាក់ក្រឡាគ្នាជាមួយនឹងច្បាប់ពាក់ព័ន្ធនានា ដូចជា ក្រមព្រហ្មទណ្ឌ ក្រមរដ្ឋប្បវេណី ច្បាប់ស្តីពីព្រៃឈើ ច្បាប់ស្តីពីជលផល ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ ច្បាប់ភូមិបាល ច្បាប់ស្ដីពីទេសចរណ៍ ច្បាប់ស្តីពីការគ្រប់គ្រងធនធានទឹក ។ល។
ឯកឧត្តមបន្តថា សេចក្តីព្រាងក្រមបរិស្ថាន និងធនធានធម្មជាតិ ត្រូវបានតាក់តែងឡើងដោយផ្អែកលើ គោលការណ៍សំខាន់៣គឺ៖
(១).ការធ្វើសមាហរណកម្មនៃលិខិតបទដ្ឋានគតិយុត្តក្នុងវិស័យបរិស្ថាន និងធនធានធម្មជាតិ
(២).លិខិតបទដ្ឋានគតិយុត្តពាក់ព័ន្ធនឹងវិស័យបរិស្ថាន និងធនធានធម្មជាតិត្រូវបានធ្វើសុខដុមនីយកម្ម និង
(៣).លិខិតបទដ្ឋានគតិយុត្តពាក់ព័ន្ធនានាត្រូវបានធ្វើទំនើបកម្ម ឱ្យឆ្លើយតបនឹងការវិវត្តន៍នៃសង្គម។
ហេតុនេះ សេចក្តីព្រាងក្រមបរិស្ថាន និងធនធានធម្មជាតិ អាចដើរតួជាគោលការណ៍គ្រឹះ និងជាក្របខ័ណ្ឌរួមសម្រាប់ចូលរួមរកដំណោះស្រាយគ្រប់ជ្រុងជ្រោយ និងសម្របសម្រួល ប្រកបដោយប្រសិទ្ធភាព ប្រសិទ្ធផល និងតុល្យភាព ចំពោះបណ្តាបញ្ហាស្មុគស្មាញជាច្រើនដែលកំពុងបន្តកើតមានឡើងក្នុងវិស័យបរិស្ថាន និងធនធានធម្មជាតិ ដោយសារអន្តរកម្មជិតស្និទ្ធជាមួយវិស័យផ្សេងៗជាច្រើន។
មិនតែប៉ុណ្ណោះ សេចក្តីព្រាង ក្រមនេះ នឹងរួមចំណែក៖
(១).ធ្វេីឱ្យប្រសើរឡើងនូវភាពខ្វះចន្លោះ ភាពមិនច្បាស់លាស់ ឬភាពហួសសម័យ នៃបទប្បញ្ញត្តិច្បាប់មួយចំនួន ដោយសារភាពស្មុគស្មាញ និងការវិវត្តយ៉ាងលឿនផ្នែកបច្ចេកទេសបរិស្ថាន
(២).ដោះស្រាយបញ្ហាដែនសមត្ថកិច្ចត្រួតគ្នា និងធ្វើឱ្យប្រសើរឡើងនូវកិច្ចសម្របសម្រួលរវាងភាគីពាក់ព័ន្ធទាំងអស់ក្នុងការងារគ្រប់គ្រងបរិស្ថាន និងធនធានធម្មជាតិ
(៣).លើកកម្ពស់ប្រសិទ្ធភាពការងារអភិរក្ស និងអភិវឌ្ឍន៍នៅកម្ពុជា។
ជារួម គុណប្រយោជន៍ចម្បងៗនៃសេចក្តីព្រាងក្រមបរិស្ថាន និងធនធានធម្មជាតិមានដូចខាងក្រោម៖
-ពង្រឹងនិងធ្វើឱ្យប្រសើរឡើងបន្ថែមទៀតលើការគ្រប់គ្រងបរិស្ថាន កិច្ចគាំពារ ការអភិរក្ស និងការ ស្តារឡើងវិញនូវធនធានធម្មជាតិ ជីវៈចម្រុះ មុខងារប្រព័ន្ធអេកូឡូស៊ី និងការរស់នៅប្រកបដោយ ចីរភាព
-កំណត់ទិសដៅរួមជាយុទ្ធសាស្ត្រសម្រាប់កិច្ចគាំពារបរិស្ថាន និងការអភិរក្សធនធានធម្មជាតិដល់ក្រសួងស្ថាប័ន និងអាជ្ញាធរដែលមានសមត្ថកិច្ចពាក់ព័ន្ធ ពង្រីកលទ្ធភាពយ៉ាងទូលំទូលាយដល់ក្រសួង ស្ថាប័ន និងមជ្ឈដ្ឋានទាំងអស់ ក្នុងការចូលរួមកាន់តែប្រសើរជាងមុននៅក្នុងកិច្ចគាំពារបរិស្ថាន ការគ្រប់គ្រង និងការអភិរក្សធនធានធម្មជាតិ និងជីវៈចម្រុះតាមរយៈការបង្កើត និងការគោរពនូវទំនាក់ទំនងនៃមុខងាររបស់ក្រសួងស្ថាប័ន និងមជ្ឈដ្ឋានសង្គមទាំងអស់
-បង្កើនប្រសិទ្ធភាព និងប្រសិទ្ធផល នៃការអនុវត្តបេសកកម្មគ្រប់គ្រងការពារ អភិរក្ស និងស្ដារឡើងវិញនូវធនធានធម្មជាតិជីវៈចម្រុះបេតិកភណ្ឌធម្មជាតិ និងវប្បធម៌ សំដៅធានាបាននូវការអភិវឌ្ឍប្រកបដោយចីរភាព និងការចូលរួមថែរក្សានូវភាពរុងរឿងសម្រាប់ពលរដ្ឋកម្ពុជាគ្រប់ជំនាន់
-ជាយន្តការជំរុញ និងលើកកម្ពស់ការយល់ដឹង និងការស្រាវជ្រាវអំពីបរិស្ថានដល់គ្រប់មជ្ឈដ្ឋានសង្គម តាមរយៈការអប់រំ ការផ្សព្វផ្សាយ និងការបណ្ដុះបណ្តាល ទាំងយន្តការក្នុងប្រព័ន្ធ និងក្រៅប្រព័ន្ធ
-ដើរតួជាបទប្បញ្ញត្តិគោលមួយសម្រាប់មន្ត្រីអនុវត្តច្បាប់ ជាពិសេសមន្ត្រីដែលមានសមត្ថកិច្ចពាក់ព័ន្ធនឹងការបង្ក្រាបបទល្មើសបរិស្ថាន និងធនធានធម្មជាតិ និងមន្ត្រីអនុវត្តច្បាប់នៃក្រសួង ស្ថាប័ន ឬអង្គភាពពាក់ព័ន្ធទាំងអស់។
![](https://blogger.googleusercontent.com/img/b/R29vZ2xl/AVvXsEj7CM5gRvB8ztYeBR1LqNGiFrKVZeHnwts6da-T2w-kfslJA-KobNeTqtThJNgMgnShwOFMzNLEYU3oe9l0nJwk_dRwtsIN8SQmWKRbwCttFtvvq8-yWQnMUkGWUD-uTU7aAXJ_77inBxkknTUEdw1xY93Z21bYFIG7UtDkEkxXgbDAPEh4e7hErO-2/s1600/IMG_20230524_135414_593.jpg)
![](https://blogger.googleusercontent.com/img/b/R29vZ2xl/AVvXsEjZK-72tH6zjWHmH6xyUrGX8iBV6vPBupZuoTCQ77E-JChCCs5Kn5cRPEAaFw7BOG-7ef3R7cgBouFmtvkMZy8M5qsmVLBHBOedGjs_u7hkZpsCoe2U6hThOWhH45CMC1sL1KfHRSbJRRiH7kLmlHyg1wFSNAIkna9bwDmkbNTx1z1Og72o0OLsCjTb/s1600/IMG_20230524_135413_887.jpg)
![](https://blogger.googleusercontent.com/img/b/R29vZ2xl/AVvXsEi5jYKBrBaMjgg7-E1l2DD3Au40Xbhg62-CPa2vVyGEa6J9E6mxSF5pK565x9M7zlnjFIsIunn1krJBalwF1IHZRtF777lPn8ROxB8tZl3JW_aFqAl6CFmzWdWbcu-zj7EJcIxSIJFOuunOkM7STIWtTh70ftWdcKoigSUsePQ6sTL4UmsyL-QPv6zr/s1600/IMG_20230524_135414_388.jpg)
![](https://blogger.googleusercontent.com/img/b/R29vZ2xl/AVvXsEjnMSuHfqEGl5JXquEw7l-oHKfwksjyVs4i8rYLWt3zeu4QbO4NriGP8MVfV1mO5nvDs4Yr3UhgT7QLtyjC3pl4-prEDdXSyZqazp-VuNmG3nMtshXF6bDyRfL4q7nouUtkdPEmZOnPKKD8Ot__MPuI8Dvv4fwhoDe0US0U-VapcYXENHKjade3SU6u/s1600/IMG_20230524_135414_406.jpg)
![](https://blogger.googleusercontent.com/img/b/R29vZ2xl/AVvXsEhCAfcRuHHvXV5AUHruECCtxf7kRGS-Eriuv7yxendy26qwouQJWxOezyOzSN8z5pRB6oOaTcM0BEwYbKQeHyOV-Ynu4F0d1kER8encdzyS0XypAzGqIe_Ph2K3mb3p_B8KX0Ik5a5vdg6fMLoqQeaDgU5TCGUYAgTYb1IA-9615v6DfMeuePfVNIn_/s1600/IMG_20230524_135414_407.jpg)
![](https://blogger.googleusercontent.com/img/b/R29vZ2xl/AVvXsEhr7GgYMMMCaTQU68QCFtURVDTkdhCB4F7eQlyrpXH6AVgsKpJkFdYMCnjSRFwURXhGOOVFzP7vgjWzBVAG-Iduj431tLKB4uc1MJ6mhUkYCRbsL58zvbryEWmTtXVEttyrnfX5Ev2dAH1QMhWZ0_fY6D7_gLhoTGeLK_Qc7dLxMWCRaBo81QI6sSsa/s1600/IMG_20230524_135414_529.jpg)
![](https://blogger.googleusercontent.com/img/b/R29vZ2xl/AVvXsEjQIdPewbvXrpSr7agLd_Qm3VM4afnDYQxXUCcEEh4hzHqbh13Pmeyehj7HolF68TDmKgwdfUahgHcIVi_d50xxSmGH-XQOP-bUSA0gKBRiIzYMtbZFyNVyjcQZMDier9WLAAERzTT5l6mhxsNy2SrWlftikYT39LEOSKBbJQXUFGQqoB1GmIyw_HJA/s1600/IMG_20230524_135414_650.jpg)
![](https://blogger.googleusercontent.com/img/b/R29vZ2xl/AVvXsEhy_jlfENt8ge-ba_MWp4JdR-LmPznB0azcDuv0T8MXOkPUReF-0Ag-SKv-Wp6DzpTmO_OayN_S-XLE8dXr14VD6O0X51zSlzBxGqmsFiWafdkBhruhDaArEIRFPnmGqjRcZD_kDRDOO2JHKXmQmthxi_A137ybykL5gFPwgtk63x4BA-4PppSHoM1u/s1600/IMG_20230524_135414_742.jpg)
![](https://blogger.googleusercontent.com/img/b/R29vZ2xl/AVvXsEgDR74jKrotgtkJ7O6xupmj-xaGa5ET8_6z6otruHpFvkdacqll5ynp95kHN47_vVT3l-EL_InzKZ3EHKnZ5wiM7SRkgn2cbScnyO-xbPfeDKvc1tShBVDBO3NxBdVwPKYbrRQ6iyNoL5rii0-IY5mDF4J99YgZdhgr-u1Q8bB6gSruGYjcVlkHdR2_/s1600/IMG_20230524_135414_794.jpg)
No comments