រន្ធត់ណាស់បុរសម្នាក់បានស្លាប់ភ្លាមៗនៅនិងកន្លែងកើតហេតុ....
ខេត្តព្រៃវែង ៖ បុរសម្នាក់បានស្លាប់ភ្លាមៗនៅកន្លែងកើតហេតុ ដោយសាររថយន្ត បត់ឆ្វេងមិនប្រយ័ត្ន ប៉ះម៉ូតូដួលស្លាប់ភ្លាមៗនៅកន្លែង។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង៦នឹង២០នាទីព្រឹក ថ្ងៃទី១០ ខែឧសភា ឆ្នាំ២០២០ នៅចំណុចមុខក្លោងទ្វារវត្តត្រកៀត ស្ថិតនៅភូមិត្រកៀត ឃុំរកា ស្រុកពារាំង ខេត្តព្រៃវែង ចំណុចចន្លោះគីឡូម៉ែត្រ 57-58 លើផ្លូវជាតិលេខ៨។
ប្រភពពីកន្លែងកើតហេតុបានឲ្យដឹងថា! មុនពេលកើតហេតុ មានរថយន្តមួយគ្រឿងម៉ាកហ៉ីយ៉ាន់ដាយពណ៌ស ពាក់ស្លាកលេខភ្នំពេញ 2AO.6240 បើកបរដោយឈ្មោះ សយ សល់ ភេទប្រុស អាយុ ២៥ឆ្នាំ រស់នៅភូមិរកា ឃុំរកា ស្រុកពារាំង ខេត្តព្រៃវែង បានបើកបត់ឆ្វេងខ្វះការប្រុងប្រយ័ត្ន ស្របពេលមានម៉ូតូមួយគ្រឿងមកដល់បានប៉ះចំហៀងរថយន្តផ្នែកខាងឆ្វេងដួល ហើយស្លាប់តែម្តង។
ហើយម៉ូតូម៉ាកហុងដា សេ125 ពណ៌ខ្មៅ ពាក់ស្លាកលេខ ភ្នំពេញ 1HQ1750 បើកបរដោយឈ្មោះ ភី រិទ្ធី ភេទប្រុស អាយុ ២២ឆ្នាំ រស់នៅភូមិ ចន្លាត់ដៃ ឃុំទងត្រឡាច ស្រុកស្រីសន្ធរ ខេត្តកំពង់ចាម ដែលកំពុងបើកបរក្នុងទិសដៅពីលិចទៅកើត ។
ក្រោយគ្រោះថ្នាក់នោះភ្លាមៗ បានបណ្ដាលឲ្យអ្នកបើកបរម៉ូតូ ស្លាប់នៅកន្លែងកើតហេតុ ចំណែកម៉ូតូរងការខូចខាតយ៉ាងដំណំ រីឯរថយន្ដរងការខូចខាតស្រាល។
ក្រោយពេលកើតហេតុ សមត្ថកិច្ចបានទៅដល់ធ្វើការវាស់វែង និងត្រួតពិនិត្យកន្លែងកើតហេតុ ចំណែកសាកសព ត្រូវបានបញ្ជូនយកទៅធ្វើបុណ្យតាមប្រពៃណី រីឯវត្ថុតាងទាំងពីរគ្រឿង រួមទាំងអ្នកបើកបររថយន្ត ត្រូវបានសមត្ថកិច្ចនាំយកមកធ្វើការសាកសួរ នៅអធិការដ្ឋាននគរបាលស្រុកពារាំង។