រថយន្តធុនធំ២គ្រឿង បោលបុកគ្នាពេញទំហឹង បណ្ដាលអោយមនុស្ស២នាក់ រងរបួសធ្ងន់ស្រាល នៅក្នុងស្រុកកំពង់ត្រឡាច
កំពង់ឆ្នាំង ៖ មនុស្ស២នាក់ បានរងរបួសធ្ងន់ស្រាល នៅក្នុងករណីគ្រោះថ្នាក់ចរាចរណ៍ រវាងរថយន្តធុនធំ២គ្រឿង បុកគ្នាពេញទំហឹង នៅលើកំណាត់ផ្លូវជាតិលេខ៥ កើតឡើងនៅវេលាម៉ោង៥និង១៥នាទីព្រឹក ថ្ងៃទី០៩ ខែឧសភា ឆ្នាំ២០២០ នៅចន្លោះបង្គោលគីឡូម៉ែត្រលេខ៥៤ និង៥៥ ស្ថិតនៅក្នុងភូមិច្រករមៀត ឃំុឈូកស ស្រុកកំពង់ត្រឡាច ខេត្តកំពង់ឆ្នាំង។
លោកវរសេនីយ៍ឯក នន ស៊ីណាត អធិការនគបាលស្រុកកំពង់ត្រឡាច បានឱ្យដឹងតាមរយៈទូរស័ព្ទថា ករណីគ្រោះថ្នាក់ចរាចរណ៍ខាងលើនេះ បានកើតឡើងរវាងរថយន្តម៉ាក Hyundai ពណ៍ស ពាក់ស្លាកលេខ កំពង់ឆ្នាំង 3A-0707 អ្នកបើកបរឈ្មោះ អ៊ូ តង់ ភេទប្រុស អាយុ៣០ឆ្នាំ រស់នៅភូមិអូរលាជ ឃំុបន្ទាយព្រាល ស្រុករលាប្អៀរ ខេត្តកំពង់ឆ្នាំង បើកបរក្នុងទិសដៅពីខាងត្បូង ឆ្ពោះទៅទិសខាងជើង នៅពេលដែលមកដល់ចំណុចខាងលើ ក៏បានបែកកង់មុខខាងឆ្វេង និងបានរេចង្កូតមកខាងឆ្វេង ទៅបុកនិងរថយន្តម៉ាក ISUZU ពណ៍ស ពាក់ស្លាកលេខ ព្រះសីហនុ 3A-2643 អ្នកបើកបរដោយឈ្មោះ សាំង សិលា ភេទប្រុស អាយុ៣៣ឆ្នាំ រស់នៅភូមិ១ សង្កាត់៤ ក្រុងព្រះសីហនុ ខេត្តព្រះសីហនុ បើកបរពីទិសខាងជើង ឆ្ពោះទៅទិសខាងត្បូង ក្នុងដំណើរច្រាស់ទិសគ្នា។
នៅក្នុងករណីគ្រោះថ្នាក់ចរាចរណ៍ខាងលើនេះ សមត្ថកិច្ចបានដាក់ការសន្និដ្ឋានថា បណ្ដាលមកពីកត្តារថយន្តនេះ (បែកកង់មុខខាងឆ្វេង) ហើយបណ្ដាលឲ្យជនរងគ្រោះ ចំនួន២នាក់ រងរបួសធ្ងន់ស្រាល និងរថយន្ត ០២គ្រឿងខូចខាតយ៉ាងធ្ងន់ធ្ងរ។
បច្ចុប្បន្ន វត្ថុតាងត្រូវបានកម្លាំងជំនាញនាំយកមកទៅរក្សាទុក នៅអធិការដ្ឋាននគរបាលស្រុកកំពង់ត្រឡាច ដើម្បីរង់ចាំធ្វើការដោះស្រាយតាមនិតិវិធីនៅពេលក្រោយ។
No comments