បទល្មើសនេសាទខុសច្បាប់ នៅបន្តមាន យ៉ាងអនាធិបតេយ្យ ក្នុងស្រុកស្អាង និងស្រុកលើកដែក ខេត្តកណ្តាល

ចេញផ្សាយនៅថ្ងៃទី០៨ ខែវិច្ឆិកា ឆ្នាំ២០២៥ វេលាម៉ោង២១និង២៥នាទី

ខេត្តកណ្តាល៖ ទោះបីជាមន្ត្រីជំនាញ នៃរដ្ឋបាលជលផលខេត្តកណ្តាល និងមន្ត្រីជំនាញពាក់ព័ន្ធខេត្តកណ្តាល ព្យាយាមបង្រ្កាបយ៉ាងសស្រាក់សស្រាំយ៉ាងណា ក៏ឃើញថាបទល្មើសនេសាទខុសច្បាប់ទាំងនោះនៅបន្តមានវត្តមានយ៉ាងអនាធិបតេយ្យ និងលាតសន្ធឹងលើផ្ទៃទឹកយ៉ាងធំល្វឹងល្វើយទូទាំងស្រុកស្អាង និងស្រុកលើកដែក ខេត្តកណ្តាល។

ចំណែកឯលោក ហេង សុភារិទ្ធ នាយខណ្ឌរដ្ឋបាលជលផល ខេត្តកណ្តាល ដែលមហាជនជាច្រើន នាំគ្នារិះគន់ចំៗថាជាមន្ត្រីជើង១០ស្រលាញ់ម៉ាស៊ីនត្រជាក់ខ្លាចកំដៅ នៅតែបណ្តែតបណ្តោយឲ្យមានក្រុមនេសាទខុសច្បាប់ បន្តធ្វើសកម្មភាពទាំងយប់ទាំងថ្ងៃក្នុងដែនសមត្ថកិច្ចខ្លួន ហាក់ដូចជាគ្មានសមត្ថភាពក្នុងការទទួលខុសត្រូវចំពោះភារកិច្ចតួនាទីខ្លួនបន្តិចសោះឡើយ។

យ៉ាងណាពាក់ព័ន្ធទៅនិងបទល្មើសខាងលើនេះ នៅថ្ងៃទី០៨ ខែវិច្ឆិកា ឆ្នាំ២០២៥នេះ នាយខណ្ឌរដ្ឋបាលជលផល ខេត្តកណ្តាល លោក ហេង សុភារិទ្ធ រូបនេះ បានលើកឡើងប្រាប់អ្នកសារព័ត៌មានដោយប្តេជ្ញាចិត្តយ៉ាងមុតមាំម៉ត់ចត់ដូចមែនទែនថា៖ «បទល្មើសនេសាទដោយប្រើឧបករណ៍ខុសច្បាប់គ្រប់ប្រភេទ នៅស្រុកស្អាង និងស្រុកលើកដែក ខេត្តកណ្តាល គឺពិតជានៅមានពិតប្រាកដមែន ហើយលោកនិងធ្វើការបោសសំអាតបង្ក្រាបឲ្យអស់ ប្រសិនបើជានៅមានទៀតលោកនិងបន្តធ្វើការស្រាវជ្រាវ ធ្វើការស្រាវជ្រាវ»។

សូមជម្រាបថា៖ បទល្មើសឧបករណ៍នេសាទខុសច្បាប់នៅស្រុកស្អាង និងស្រុកលើកដែកខេត្តកណ្តាល គឺបច្ចុប្បន្ននេះមានជាហូរហែរជារៀងរាល់ថ្ងៃតែម្តង ហើយមន្ត្រីជំនាញនៃរដ្ឋបាលជលផល ខេត្តកណ្តាល ធ្លាប់បានចុះបង្ក្រាបជារើយៗមកហើយ! ពោលគឺ៖ បង្ក្រាបពេលថ្ងៃ ស្រាប់តែពេលយប់មានវិញ បង្ក្រាបពេលយប់ ស្រាប់តែថ្ងៃមានវិញ!! កាលបង្ក្រាបនេះគឺប្រៀបដូចជាចាប់ក្តាមដាក់ចង្អេរ គោះទឹកបង្អើលត្រី ដែលមហាជនរិះគន់ថាជាឆាកល្ខោនស្នេហ៍សន្យាឱ្យអូនស្ងប់ចិត្តតែប៉ុណ្ណោះ។

ទោះបីជាសកម្មភាពកន្លងមក លោកនាយខណ្ឌរដ្ឋបាលជលផល ហេង សុភារិទ្ធ មិនសូវមានជំនាញក្នុងការបំពេញតួនាទីក៏ដោយក៏ប្រជាពលរដ្ឋជាច្រើន នៅតែមានសង្ឃឹមយ៉ាងមុតមាំជាទីបំផុត ចំពោះលោក ហេង សុភារិទ្ធ នាយខណ្ឌរដ្ឋបាលជលផល ខេត្តកណ្តាល និងសង្ឃឹមថាលោកនាយខណ្ឌរូបនេះ មិនធ្វើការឱ្យរួចតែពីដៃទៀតនោះទេ និងឈប់ឲ្យមានវប្បធម៌គោះទឹកបង្អើលត្រីតទៀត៕