ឈាមស្រែកស្បែកហៅ..! ករណីប្លន់សម្លាប់អ្នករត់ម៉ូតូឌុបនៅស្រុកមេសាង ខេត្តព្រៃវែង ត្រូវកម្លាំងនគរបាលបន្តតាមចាប់ខ្លួនបានបក្ខពួក២នាក់ទៀត

ព្រៃវែង ៖ ស្នងការនគរបាលខេត្តព្រៃវែង លោកឧត្តមសេនីយ៍ត្រី ព្រំ សន្ធរ បានប្រាប់បណ្តាញព័ត៌មាន នៅរសៀលថ្ងៃទី២៣ ខែមិថុនា ឆ្នាំ២០២០នេះថាករណីប្លន់សម្លាប់អ្នករត់ម៉ូតូឌុបនៅស្រុកមេសាង ខេត្តព្រៃវែង កាលពីថ្ងៃទី២១ ខែមិថុនា ឆ្នាំ២០២០ ត្រូវបានកម្លាំងនគរបាលរបស់លោកបន្តចាប់ខ្លួនបានបក្ខពួក២នាក់។

លោកឧត្តមសេនីយ៍ស្នងការ បានបញ្ជាក់ថា «ក្រោយការសួរនាំជនដៃដល់ ដែលចាប់បានកាលពីម្សិលមិញនោះ កម្លាំងនគរបាលរបស់យើង បានសហការគ្នាតាមទៅយកបាន២នាក់ទៀតជាបក្ខពួក ហើយនៅពេលនេះកំពុងធ្វើការសួរនាំ ដើម្បីចាត់ការតាមច្បាប់»។

សូមបញ្ជាក់ថា ករណីប្លន់សម្លាប់អ្នករត់ម៉ូតូឌុបនៅស្រុកមេសាង ខេត្តព្រៃវែង កាលពីថ្ងៃទី២១ ខែមិថុនា ឆ្នាំ២០២០ ត្រូវបានកម្លាំងនគរបាលបានបើកប្រតិបត្តិការតាមចាប់ខ្លួនបាន នៅវេលាម៉ោង ២១.១៥នាទី ថ្ងៃទី២២ ខែមិថុនា ឆ្នាំ២០២០ និងត្រៀមបញ្ជូនទៅកាន់តុលាការកាត់ទោសតាមច្បាប់។

លោកឧត្តមសេនីយ៍ត្រី ពៅ ជីវី ស្នងការរងនគរបាលខេត្ត
ព្រៃវែង ទទួលផែនព្រហ្មទណ្ឌបានឲ្យដឹងថា ក្រោមបទបញ្ជា ពីលោកឧត្តមសេនីយ៍ត្រី ព្រំ សន្ធរ ស្នងការនគរបាលខេត្ត លោកបានដឹកនាំកម្លាំងអធិការដ្ឋា នគរបាលស្រុកមេសាង សហការជាមួយកម្លាំងជំនាញនគរបាលខេត្ត កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ កម្លាំងនគរបាលរាជធានីភ្នំពេញ និងកម្លាំងប៉ុស្តិ៍នគរបាលស្រះចក បានឃាត់ខ្លួនជនសង្ស័យម្នាក់ នៅក្នងមន្ទីរពេទ្យកាល់ម៉ែត។

ជនសង្ស័យទី១មានឈ្មោះ បាន កាន អាយុ៣០ឆ្នាំរស់នៅភូមិចំបក់ជ្រុំ ឃុំច្រេស ស្រុកមេសាង បានប្លន់សម្លាប់ជនរងគ្រោះឈ្មោះ ភី ឃុន អាយុ៤៩ឆ្នាំ នៅភូមិព្រេជ ឃុំច្រេស ស្រុកមេសាង កាលពីយប់ម៉ោងប្រមាណជា ២៣.៣៥នាទី ថ្ងៃទី២១ ខែមិថុនា ឆ្នាំ២០២០ នៅចំណុចលើផ្លូវលំស្ថិតក្នុងភូមិចំបក់ជ្រុំ ឃុំច្រេស ស្រុកមេសាង។

ជនសង្ស័យទី២មានឈ្មោះ ធឿន ប្រេស ភេទប្រុស អាយុ
២៤ឆ្នាំ និងជនសង្ស័យទី៣ មានឈ្មោះ សុីន កុសល ហៅ ឈីត ភេទប្រុស អាយុ២៨ឆ្នាំ ទាំងពីរមានស្រុកកំណើតនៅភូមិទួលតារី ឃុំច្រេស ស្រុកមេសាង ខេត្តព្រៃវែង។

បច្ចុប្បន្នស្នាក់នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ឃាត់ខ្លួននៅចំណុច ភូមិប្រស្វា ឃុំត្រពាំងស្រែ ស្រុកមេសាង ខេត្តព្រៃវែង។

លោកឧត្តមសេនីយ៍ត្រីស្នងការរង បានបន្តថា ពេលចាប់ឃាត់ខ្លួន កម្លាំងជំនាញបានដកហូតវត្ថុតាងដែលជារបស់ជនរងគ្រោះម៉ូតូសង់ឌ្រីមសេ១២៥ ពណ៌ខ្មៅ ១គ្រឿង និងទូរសព្ទ័ដៃ ម៉ាកណូគា ១គ្រឿង៕