ប្រទះឃើញសពបុរសម្នាក់ដេកស្លាប់ក្នុងថ្លុកឈាម សង្ស័យករណីឃាតកម្ម
ប្រទះឃើញសពបុរសម្នាក់ដេកស្លាប់ក្នុងថ្លុកឈាម សង្ស័យករណីឃាតកម្ម
ភ្នំពេញ៖ ប្រទះឃើញសពបុរសម្នាក់ ដេកស្លាប់នៅក្នុងថ្លុកឈាម សង្ស័យតែជាករណីឃាតកម្ម ហេតុការណ៍នេះបានបង្កឲ្យមានការភ្ញាក់ផ្អើលនាព្រឹកថ្ងៃទី២៥ ខែឧសភា ឆ្នាំ២០២១ ស្ថិតនៅចំណុចផ្លូវប៉េតុង ទល់មុខផ្សារបឹងទំពុន ភូមិសន្សំកុសល៣ សង្កាត់បឹងទំពុន១ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីប្រជាពលរដ្ឋរស់នៅតំបន់ក្បែរនោះ បានឱ្យដឹងថា នៅវេលាម៉ោង១រំលងអាធ្រាត្រយប់ ថ្ងៃទី២៤ ឈានចូលដល់ថ្ងៃទី២៥ ខែឧសភា ឆ្នាំ២០២១ មានឮសូរសំឡេងស្រែកប្រទូសរ៉ាយគ្នាមួយប្រ៉ាវ ហើយក៏ស្ងាត់ទៅវិញ។ លុះព្រឹកឡើង ទើបប្រទះឃើញមានសពដេកស្លាប់ក្នុងថ្លុកឈាមតែម្តង។
សពបុរសរងគ្រោះខាងលើមានភិនភាគ មាឌធំល្មម អាយុប្រមាណ ៣០ឆ្នាំ មានសភាពរងស្នាមបែកក្បាល និងបាក់ជើង។
តាមការសន្និដ្ឋានរបស់ប្រជាពលរដ្ឋបានប្រាប់សារព័ត៌មានឲ្យដឹងថា៖ សពបុរសរងគ្រោះខាងលើពុំមែនជាពលរដ្ឋក្នុងតំបន់ឡើយ ព្រោះកន្លងមកពុំធ្លាប់ដែលឃើញ និងស្គាល់ឡើយ។
ជុំវិញករណីខាងលើនេះ ខាងសារព័ត៌មានយើងនៅមិនទាន់ដឹងថាជាករណីវាយប្លន់សម្លាប់ ឬក៏គំនុំគំគួននៅឡើយទេ ខណៈកម្លាំងសមត្ថកិច្ចចម្រុះកំពុងពិនិត្យស្រាវជ្រាវ តាមរយៈកាមេរ៉ាសុវត្ថិភាពជុំវិញតំបន់កើតហេតុខាងលើ៕
About កងមាស
No comments