រដ្ឋមន្ត្រីក្រសួងព័ត៌មាន បន្ដណែនាំអ្នកសារព័ត៌មានទាំងអស់ឲ្យគោរពក្រមសីលធម៌នៃការផ្សព្វផ្សាយព័ត៌មាន
![](https://blogger.googleusercontent.com/img/b/R29vZ2xl/AVvXsEh4NeWdmTfWUtSLwfG1YKnJvpiyAj6WN_G1LgzKJ2u7iN3MjbSca0I5Ht_mL2RUJFZhOVDB4f0kjAa5du72DnEqSK0rlkb8_oY0cQTEXBjPORkbTPbqwtcGGqMMts4OueLTLwIm7f68AOA/s0/PicsArt_07-29-07.00.51.jpg)
រដ្ឋមន្ត្រីក្រសួងព័ត៌មាន បន្ដណែនាំអ្នកសារព័ត៌មានទាំងអស់ឲ្យគោរពក្រមសីលធម៌នៃការផ្សព្វផ្សាយព័ត៌មាន
ភ្នំពេញ៖ ឯកឧត្ដម ខៀវ កាញារឹទ្ឋ រដ្ឋមន្ត្រីក្រសួងព័ត៌មាន នៅតែបន្ដណែនាំឲ្យអ្នកសារព័ត៌មានទាំងអស់ត្រូវគោរពក្រមសីលធម៌វិជ្ជាជីវៈនៃការផ្សព្វផ្សាយព័ត៌មានរបស់ខ្លួន ដើម្បីឲ្យសារធារណជនអាចទទួលព័ត៌មានបានពិត និងចៀសផុតពីបញ្ហាប្រឈមផ្លូវច្បាប់។
ក្នុងឱកាសអញ្ជើញជាអធិបតីក្នុងកម្មវីធីកិច្ចពិភាក្សាសារព័ត៌មាន «ក្រមសីលធម៌នៃការផ្សាយព័ត៌មានផ្ទាល់តាមហ្វេសប៊ុក» នៅថ្ងៃព្រឹកថ្ងៃទី២៩ ខែកក្កដា ឆ្នាំ២០២១ ឯកឧត្តម ខៀវកាញារីទ្ធ រដ្ឋមន្ត្រីក្រសួងព័ត៌មាន បានថ្លែងថា៖ «អ្នកសារព័ត៌មាន មានវិជ្ជាជីវៈមានសារសំខាន់ណាស់ដែលធ្វើឲ្យប្រទេសជាតិទាំងមូលប្រែប្រួលនិងរីកចម្រើន»។
ឯកឧត្តមបានបន្ដថា៖ នៅសតវត្សរ៍ទី២១នេះអ្នកសារព័ត៌មានមានសារសំខាន់ដោយសារកត្ដាបីគឺកត្ដាអ៊ីនធឺណិត ប្រព័ន្ធផ្សព្វផ្សាយសង្គម និងបច្ចេកវិទ្យាសារព័ត៌មាន ដូចនេះ ក្រមសីលធម៌នៃការផ្សាយព័ត៌មានគឺអាចធ្វើឲ្យពិភពលោករីកចម្រើនបានលឿន។
សំឡេង៖ «សារសំខាន់នៃព័ត៌មានវាសំខាន់ធ្វើឲ្យសង្គមមួយប្រែប្រួលរីកចម្រើនឬធ្លាក់ចុះគឺព័ត៌មានហ្នឹងឯង អ៊ីចឹងហើយបានសតវត្សរ៍ទី ២១នេះ យើងឃើញថា មានការរីកចម្រើនខ្លាំងក្លា ហើយយើងត្រូវយល់ឃើញថាសតវត្សរ៍ទី២១ដែលមានការរីកចម្រើននេះ ហើយបាត់វិញយ៉ាងលឿន អាស្រ័យដោយសារកត្តាបីគឺបញ្ហាដែលយើងរកឃើញអ៊ីនធឺណិតនេះគឺជាកត្តាធំណាស់ដែលធ្វើឲ្យការផ្លាស់ប្ដូរព័ត៌មានបានលឿនឆាប់រហ័ស ទីពីរគឺទម្រង់ប្រព័ន្ធផ្សព្វផ្សាយសង្គមគឺវារុញឲ្យទំនាក់ទំនងផ្សព្វផ្សាយព័ត៌មានរត់កាន់តែលឿន។ មួយទៀតយើងដឹងហើយថាបណ្ណាល័យសកលមួយដែលធ្វើឲ្យយើងយកពីប្រភពដែលយើងតែនិយាយថាពិភពលោកនៅនឹងចង្អុលដៃរបស់យើង។ កត្តានេះវាជាកត្តាមួយដែលធ្វើឲ្យមានការប្រែប្រួលនៅក្នុងសតវត្សរ៍ទី២១ ក្នុងសង្គមបច្ចុប្បន្នឆ្នាំ២០២១នេះ មានការប្រែប្រួលនៅក្នុងសកលលោក ការក្រឡាប់ចាក់មួយចំនួនក្ដីក៏អាស្រ័យទៅដោយការអភិវឌ្ឍន៍នូវបច្ចេកវិទ្យាសារព័ត៌មាន។ជាការពិតគេតែងនិយាយថាព័ត៌មានអត់មានផលិតអ្វីចេញទេ វាមិនដូចសេវាឧស្សាហកម្មផលិតរបស់នេះរបស់នោះ. ប៉ុន្តែសារព័ត៌មានគឺជាស្នូរដែលធ្វើឲ្យអ្វីៗបានប្រែប្រួល។ ដូច្នេះហើយយើងត្រូវមើលឃើញអំពីសារសំខាន់នៃសារព័ត៌មាន នៅសតវត្សរ៍ទី២១ ដោយការរីកចម្រើននេះដែលធ្វើឲ្យយើងបានឃើញមានការឈ្លោះគ្នារវាងអ្នកកាសែតដែល មានអាជ្ញាប័ណ្ណ អ្នកកាសែតបោះពុម្ពអ្នកកាសែតធ្វើការនៅវិទ្យុ ទូរទស្សន៍ ជាមួយអ្នកកាសែត ហ្វេសប៊ុក»។
ឯកឧត្តមរដ្ឋមន្ត្រីបានមានប្រសាសន៍បន្ដថា ក្រមសីលធម៌វិជ្ជាជីវៈសារព័ត៌មានគឺជាអាវក្រោះរបស់អ្នកសារព័ត៌មាន និងអាចរក្សាតម្លៃខ្លួនបាន។ ឯកឧត្តម បានលើកឡើងថា សម្រាប់អ្នកសារព័ត៌មានគឺមានសិទ្ធ ហើយការប្រើប្រាស់សិទ្ធិសេរីភាពនោះ កុំហួសព្រំដែនដែលអាចធ្វើឲ្យប៉ះពាល់ ឬក្លាយជាការបរិហារ ទៅដល់ស្ថាប័ន ឬក៏បុគ្គលផ្សេងៗ នឹងត្រូវទទួលខុសត្រូវចំពោះមុខច្បាប់។
ក្នុងឱកាសនោះដែរ លោក ប៉ែន បូណា ប្រធានក្លឹបអ្នកកាសែតកម្ពុជា ក៏បានឲ្យដឹងថា បច្ចុប្បន្ន មានអ្នកលេងសង្គមហ្វេសប៊ុកមួយចំនួនបានតាំងខ្លួនជាអ្នកសារព័ត៌មាន ដែលធ្វើឲ្យប្រជាពលរដ្ឋមួយចំនួនអាចយល់ច្រឡំនិងទទួលបានព័ត៌មានដែលមិនពិត ដោយសារតែពួកគេពុំឆ្លងកាត់ការបណ្តុះ បណ្តាលឬការយល់ដឹងពីក្រមសីលធម៌វិជ្ជាជីវៈ។
ដូចនេះហើយលោកបានបញ្ជាក់ថា៖ អ្នកសារព័ត៌មានទាំងមានវិជ្ជាជីវៈ និងគ្មានវិជ្ជាជីវៈត្រូវយកចិត្តទុកដាក់ក្នុងការអនុវត្តន៍តួនាទីភារកិច្ចរបស់អ្នកសារព័ត៌មាន នៅកម្ពុជាធ្វើយ៉ាងណាឲ្យការអនុវត្តន៍នោះ អនុលោមតាម ក្រមសីលធម៌វិជ្ជាជីវៈ និងច្បាប់ របស់សង្គម៕
![](https://blogger.googleusercontent.com/img/b/R29vZ2xl/AVvXsEggrDp-JvRjYw-JGhJIN4fq12CkRLouZAIs8RI7ef59hM2JP64YuVWm2bWS9ev4g9jYDbHO_WII5rplNtRhy1zPfw1NDz2Doq_DKnpMd2dPo5QgUJgVKtHr0VdH9Cqhcm7FfnsESfRPRS8/s0/CBF8D72B-D327-4A2E-9AA4-C74BBDC.jpeg)
![](https://blogger.googleusercontent.com/img/b/R29vZ2xl/AVvXsEgjHOjWLYce1kt-gVZfjxLZffg_GwlEjWpAT5Ioy5bVQoBx-GxITNGutaMFVopT6IOrD038vosPhH4AKswxFg5v8pagQXJVG-FUh3ycg06bqXIrNigpz2W9nN6eExBSUgvyBB0sNsS2nA4/s0/40E39762-E16D-4E8F-BAE3-73DCA39.jpeg)
![](https://blogger.googleusercontent.com/img/b/R29vZ2xl/AVvXsEjkvxzlQPVJs885R5Nt78SXm2AeNiaT8qzpKgWVYhuZd-EYHpjlFhM1-hHa1fgWPj723N56g0wCJsh_9M2AYOvCwj3qbKEtAkVFcLEi6n_I1yjbrXq_7xj0JxAKofIOrS_QvWZAO90-dZI/s0/76CFD36B-3C92-43CF-AD94-0385EB8.jpeg)
No comments