អាជីវករលក់ដូរក្នុងផ្សារសាមគ្គីចំនួន៣២តូប និងឈ្មោះ លី ហួយ បានពេញចិត្ត និង គាំទ្រចំពោះ ដំណោះស្រាយឈ្នះឈ្នះ របស់ ឯកឧត្តម ជាវ តាយ អភិបាល នៃគណៈអភិបាលខេត្តកំពត

អាជីវករលក់ដូរក្នុងផ្សារសាមគ្គីចំនួន៣២តូប និងឈ្មោះ លី ហួយ បានពេញចិត្ត និង គាំទ្រចំពោះ ដំណោះស្រាយឈ្នះឈ្នះ របស់ ឯកឧត្តម ជាវ តាយ អភិបាល នៃគណៈអភិបាលខេត្តកំពត

ខេត្តកំពត៖ ថ្ងៃសុក្រ ៣កើត ខែអស្សុជ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី០៩ ខែតុលា ឆ្នាំ២០២១ អាជីវករលក់ដូរក្នុងផ្សារសាមគ្គី ចំនួន ៣២តូប និងឈ្មោះ លី ហួយ រីករាយពេញចិត្ត និង គាំទ្រចំពោះ ដំណោះស្រាយ ឈ្នះឈ្នះ របស់ ឯកឧត្តម ជាវ តាយ អភិបាល នៃគណៈអភិបាលខេត្តកំពត។

ជម្លោះដ៏រ៉ាំរ៉ៃអស់រយៈពេល ៨ឆ្នាំ រវាងអាជីវករ ចំនួន ៣២ តូប និងលោកស្រី លី ហួយ ត្រូវបានបញ្ចប់១០០% ក្រោមកិច្ចសម្របសម្រួលដ៏បុិនប្រសប់របស់ ឯកឧត្តម ជាវ តាយ អភិបាលនៃគណៈអភិបាលខេត្តកំពត។

កាលពីថ្ងៃទី២១ ខែសីហា ឆ្នាំ២០២១ នៅសាលប្រជុំឈ្មោះ ទុរេន ក្នុងសាលាខេត្តកំពត បានរៀបចំកិច្ចសម្រុះសម្រួលអាជីវករចំនួន ៣២ តូប និងឈ្មោះ លី ហួយ ក្រោមកិច្ចសម្របសម្រួលរបស់ ឯកឧត្តម ជាវ តាយ អភិបាល នៃគណៈអភិបាលខេត្តកំពត។ដោយមានការចូលរួមពី៖

- លោកនាយករដ្ឋបាលសាលាខេត្តកំពត
- លោក លាង រឿនសុធី អភិបាល នៃគណៈអភិបាលក្រុងកំពត
- ក្រុមការងារររដ្ឋបាលសាលាខេត្តកំពត
- ក្រុមការងាររដ្ឋបាលសាលាក្រុងកំពត
- និងប្រធានផ្សារសាមគ្គីទីរួមខេត្តកំពត។

ភាគីទាំងសងខាងបានព្រមព្រៀងគ្នាទទួលយកតាមយុទ្ធសាស្រ្ត និងលក្ខខណ្ឌដែល ឯកឧត្តម ជាវ តាយ ដាក់ជូនដូចខាងក្រោម៖

១-អាជីវករផ្សារត្រីចំនួន៣២ តូបត្រូវប្រគល់ប្រាក់ចំនួន ៥,០០០(ប្រាំពាន់)ដុល្លារអាមេរិក ក្នុង ១តូប សរុបជាទឹកប្រាក់ទាំង៣២តូប ស្មើនឹង ១៦០,០០០(ដប់ប្រាំមួយម៉ឺន)ដុល្លារអាមេរិកឱ្យទៅឈ្មោះ លី ហួយ ហៅ លាងហួយ តាមរយៈរដ្ឋបាលសាលាក្រុងកំពត ដែលមានលោក លាង រឿនសុធី អភិបាល នៃគណៈអភិបាលក្រុងកំពត។

២-លោកស្រី លី ហួយ យល់ព្រមទទួលយកប្រាក់នេះ ព្រមទាំងដកពាក្យបណ្ដឹងរដ្ឋប្បវរណីពីតុលាការដោយគ្មានលក្ខខណ្ឌ ដើម្បីបញ្ចប់ទំនាស់នេះជាស្ថាពរ។

៣-លោកស្រី ជុំ សុគន្ធា អ្នកវិនិយោគផ្សារសាមគ្គីយល់ព្រមឧបត្ថម្ភថវិកាផ្ទាល់ខ្លួនចំនួន ២៥,០០(ពីរពាន់ប្រាំរយ) ដុល្លារអារមេរិក ដើម្បីជួសជុលដំបូលផ្សារត្រី ក្នុងករណីមានការខ្វះថវិកា ហើយរដ្ឋបាលសាលាខេត្តនិងជួយបន្ថែម។

៤- រដ្ឋបាលសាលាក្រុងកំពត ក៏បានធ្វើលិខិតបញ្ជាក់សិទ្ធិកាន់កាប់តូបទៅឱ្យអាជីវករលក់ដូរទាំង៣២តូបផងដែរ។

សូមបញ្ជាក់ថា៖ ករណីទំនាស់ខាងលើនេះ លោក លាង រឿនសុធីអភិបាល នៃគណៈអភិបាលក្រុងកំពត ក៏បានខិតខំព្យាយាមដោះស្រាយជាច្រើនលើកច្រើនសារមកហើយ ដោយឡែកគូភាគីទំនាស់ពុំព្រមទទួលយកការសម្របសម្រួលក្រៅប្រព័ន្ធតុលាការ ដែលជាយុទ្ធសាស្ត្រឈ្នះឈ្នះរបស់រាជរដ្ឋាភិបាលកម្ពុជានោះទេ។