ហេតុអ្វី..? ហាងកាហ្វេ ដែលបង្កើតល្បែងស៊ីសង នៅតែបន្តបើកដំណើរការបានយ៉ាងរលូន ទោះបីជាធ្លាប់បានធ្វើកិច្ចសន្យា ចំពោះមុខសមត្ថកិច្ច_វគ្គ២

ហេតុអ្វី..? ហាងកាហ្វេ ដែលបង្កើតល្បែងស៊ីសង នៅតែបន្តបើកដំណើរការបានយ៉ាងរលូន ទោះបីជាធ្លាប់បានធ្វើកិច្ចសន្យា ចំពោះមុខសមត្ថកិច្ច_វគ្គ២

ផ្សាយចេញនៅថ្ងៃទី១៧ ខែតុលា ឆ្នាំ២០២១

កំពង់ស្ពឺ៖ ទីតាំងហាងកាហ្វេ បង្កើតល្បែងស៊ីសង ដុះស្លែដល់ធំ «មាន់ជល់ ហាយឡាយ» មួយកន្លែងស្ថិតនៅភូមិព្រៃគុយ ឃុំត្រពាំងគង ស្រុកសំរោងទង ខេត្តកំពង់ស្ពឺ នៅតែបន្តបើកដំណើរការបានយ៉ាងរលូន ទោះបីជា កន្លងទៅថ្មីនេះៗ ធ្លាប់បានសមត្ថកិច្ច កោះហៅម្ចាស់ទីតាំងឲ្យធ្វើកិច្ចសន្យាចំពោះមុខច្បាប់ម្ដងរួចមកហើយក្តី ប៉ុន្តែម្ចាស់ទីតាំងខាងលើនេះ នៅតែគឃ្លើន គ្មានខ្លាចញញើតច្បាប់បន្តិចសោះឡើយ។

មហាជនជាច្រើន កំពុងតែមានការងើយឆ្ងល់ថា៖ ហេតុអ្វី..? បានជាហាងកាហ្វេ ដែលបង្កើតល្បែងស៊ីសង មួយនេះ នៅតែបន្តបើកដំណើរការបានយ៉ាងរលូន ទោះបីជាធ្លាប់បានធ្វើកិច្ចសន្យា ចំពោះមុខសមត្ថកិច្ច! ឬមួយកិច្ចសន្យាមានអ្វីជាថ្នូរ.?

កន្លងមកលោក យ័ន្ត សន នាយប៉ុស្តិ៍នគរបាលរដ្ឋបាលឃុំត្រពាំងគង ធ្លាប់បានត្អូញត្អែរប្រាប់សារព័ត៌មានថា៖ ពាក់ព័ន្ធទៅនិងទីតាំងល្បែងស៊ីសងខុសច្បាប់ខាងលើនេះ គាត់គ្មានសម្ថភាព ទប់ស្កាត់និងបង្ក្រាបឡើយ ក្រោមហេតុផល៖ «មាន ឆ្នោតឡូតូ ប្រភេទកាស៊ីណូអនឡាញ នៅពីក្រោយ»។

ចំណែកលោក ឃុត សុផល អធិការនគរបាលស្រុកសំរោងទង ក៏ធ្លាប់បានប្រាប់សារព័ត៌មាន ដែលថា៖ «លោកនឹងបញ្ជារឲ្យមន្ត្រីក្រោមឱវាទ កោះហៅម្ចាស់ទីតាំងខាងលើនេះ មកធ្វើកិច្ចសន្យាសាជាថ្មីម្តងទៀត» ប៉ុន្តែជាក់ស្តែងនៅថ្ងៃទី១៧ ខែតុលា ឆ្នាំ២០២១ ទីតាំងហាងកាហ្វេ ខាងលើនេះ នៅតែបើកដំណើរការទទួលជនញៀនល្បែង បានដោយគឃ្លើន។

ពាក់ព័ន្ធទៅនិងករណីខាងលើនេះ មហាជនជាច្រើន បានរិះគន់ចំៗ ថា៖ លោក ឃុត សុផល អធិការនគរបាលស្រុកសំរោងទង អសមត្ថភាព ក្នុងការបង្រ្កាបបទល្មើស ក្នុងដែនដីរបស់ខ្លួន។

ប្រជាពលរដ្ឋ ជាច្រើន សុំសំណូមពរដល់លោក សម សាមួន ស្នងការនគរបាលខេត្តកំពង់ស្ពឺ មេត្តាជួយបញ្ជាមន្ត្រីជំនាញក្រោមឱវាទ ចាត់វិធានការក្តៅចំពោះទីតាំងល្បែងស៊ីសងខុសច្បាប់ ខាងលើនេះផងទាន៕

ជុំវិញការចុះផ្សាយខាងលើនេះ ខាងសារព័ត៌មានយើង និងព្យាយាមសុំការបំភ្លឺបន្ថែមទៀតពីសមត្ថកិច្ចពាក់ព័ន្ធក្នុងមូលដ្ឋាន។ សូមអរគុណ!