ស្រុកកោះធំ៖ ទីតាំងល្បែងស៊ីសងដុះស្លែ ជាច្រើនកន្លែង នៅតែបន្តបើកដំណើរការបានដោយគឃ្លើន ខណៈសមត្ថកិច្ចក្នុងមូលដ្ឋានគ្មានចំណាត់ការ_វគ្គ២
ស្រុកកោះធំ៖ ទីតាំងល្បែងស៊ីសងដុះស្លែ ជាច្រើនកន្លែង នៅតែបន្តបើកដំណើរការបានដោយគឃ្លើន ខណៈសមត្ថកិច្ចក្នុងមូលដ្ឋានគ្មានចំណាត់ការ_វគ្គ២
ផ្សាយនៅថ្ងៃទី២៣ ខែតុលា ឆ្នាំ២០២១ខេត្តកណ្ដាល៖ ទីតាំងល្បែងស៊ីសងខុសច្បាប់ ជាច្រើនកន្លែង «មាន់ជល់ ហាយឡាយ» ស្ថិតនៅក្នុងមូលដ្ឋានឃុំព្រែកស្តី ស្រុកកោះធំ ខេត្តកណ្ដាល ចំណុចស្ពានលេខ៥៥ - ស្ពានលេខ៦០ - ចំណុចស្ពានលេខ៦៣ និងនៅតាមទីតាំងហាងកាហ្វេផ្សេងៗទៀត នៅតែបន្តបើកដំណើរការបានដោយគឃ្លើន ខណៈសមត្ថកិច្ចក្នុងមូលដ្ឋាន គ្មានចំណាត់ការបង្ក្រាប។
ពាក់ព័ន្ធទៅនឹង ករណីបទល្មើសល្បែងស៊ីសងខុសច្បាប់ កំពុងតែរីកដូចផ្សិតនៅក្នុងមូលដ្ឋានឃុំព្រែកស្តី ស្រុកកោះធំ បានធ្វើឲ្យប្រជាពលរដ្ឋជាច្រើន សម្តែងការព្រួយបារម្ភយ៉ាងខ្លាំង ចំពោះសុវត្ថិភាព របស់ពួកគាត់ ព្រោះកាលណាមានល្បែងស៊ីសងនៅក្នុងមូលដ្ឋាន ប្រាកដជាមាន ករណីលួច ឆក់ ប្លន់ សម្លាប់កើតឡើងជាក់ជាមិនខាន។
ប្រជាពលរដ្ឋ បានបន្ត និងរិះគន់ ចំៗ ចំពោះសកម្មភាព និងទង្វើ អសមត្ថភាព របស់លោក ស៊ីម ឃាង អធិការនគរបាលស្រុកកោះធំ ហើយនិងលោក វ៉ែន វិបុល នាយប៉ុស្តិ៍នគរបាលឃុំព្រែកស្ដី ខណៈល្បែងស៊ីសងខុសច្បាប់រីកដូចផ្សិត នៅក្នុងមូលដ្ឋាន បែរជាពួកគាត់សម្ងំស្ងៀមទៅវិញ។
ប្រជាពលរដ្ឋ បានលើកឡើងទៀតថា៖ ភាពអសកម្ម របស់លោក វ៉ែន វិបុល នាយប៉ុស្តិ៍ឃុំព្រែកស្តី និងលោក ស៊ីម ឃាង អធិការនគរបាលស្រុកកោះធំ កំពុងតែអនុវត្តផ្ទុយពីគោលនយោបាយភូមិឃុំមានសុវត្ថិភាពទាំង៧ចំណុច ដែលចេញដោយក្រសួងមហាផ្ទៃ។
ប្រជាពលរដ្ឋ ជាច្រើនសុំសំណូមពរដល់លោក ឈឿន សុចិត្ត ស្នងការនគរបាលខេត្តកណ្តាល សូមមេត្តាចាត់កម្លាំងជំនាញ បង្ក្រាបបទល្មើសល្បែងស៊ីសងខុសច្បាប់ខាងលើនេះផងទាន! និងស្នើសុំដល់លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាល និងជាប្រធានគណៈបញ្ជាការឯកភាពខេត្ត សូមចាត់វិធានការទប់ស្កាត់បទល្មើសល្បែងស៊ីសងខាងលើដោយក្តីអនុគ្រោះ។
ជុំវិញការចុះផ្សាយខាងលើអង្គភាពសារព័ត៌មានយើង រង់ចាំការបំភ្លឺពីអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋាន រៀងរាល់ម៉ោងធ្វើការ៕ សូមអរគុណ!
ទំនាក់ទំនងការិយាល័យនិពន្ធ៖
☎️098906664
☎️077906664
No comments