រដ្ឋបាលខេត្តព្រះសីហនុ សម្រេចផ្អាកអាជីវកម្មកាស៊ីណូទីងស៊ីង ជាបណ្តោះអាសន្ន បន្ទាប់ពីមានករណីចាប់បង្ខាំងមនុស្ស ធ្វើទារុណកម្ម ជំរិតទារប្រាក់ និងមិនបានអនុវត្តត្រឹមត្រូវតាមសេចក្តីជូនដំណឹង

រដ្ឋបាលខេត្តព្រះសីហនុ សម្រេចផ្អាកអាជីវកម្មកាស៊ីណូទីងស៊ីង ជាបណ្តោះអាសន្ន បន្ទាប់ពីមានករណីចាប់បង្ខាំងមនុស្ស ធ្វើទារុណកម្ម ជំរិតទារប្រាក់ និងមិនបានអនុវត្តត្រឹមត្រូវតាមសេចក្តីជូនដំណឹង

ព្រះសីហនុ៖ កាស៊ីណូមួយកន្លែង ដែលមានយីហោ «ទីងស៊ីង» ស្ថិតនៅផ្លូវមិត្តភាព ក្រុមអី៤ ភូមិ២ សង្កាត់លេខ២ ក្រុងព្រះសីហនុ ត្រូវបានរដ្ឋបាលខេត្តព្រះសីហនុ ដែលដឹកនាំផ្ទាល់ដោយឯកឧត្តម ម៉ាង ស៊ីណេត អភិបាលរង នៃគណៈអភិបាលខេត្ត បានដឹកនាំក្រុមការងារចម្រុះចុះផ្អាកអាជីវកម្ម ជាបណ្តោះអាសន្ន។

យោងតាមរបាយការណ៍ បានបញ្ជាក់ថា៖ ការផ្អាកជាបណ្តោះអាសន្នការប្រកបអាជីវកម្មរបស់កាស៊ីណូទីងស៊ីង នេះ គឺបន្ទាប់ពីរកឃើញកាស៊ីណូនេះ មិនបានអនុវត្តត្រឹមត្រូវតាមសេចក្តីជូនដំណឹងលេខ ៩០៧/២១ សជណ ចុះថ្ងៃទី២៧ ខែកញ្ញា ឆ្នាំ២០២១ របស់រដ្ឋបាលខេត្ត និងលិខិតបទដ្ឋានគតិយុត្តនានា ដែលកំពុងនៅជាធរមានឡើយ។

ជាក់ស្ដែងយោងតាមរបាយការណ៍របស់ស្នងការរដ្ឋាននគរបាលខេត្តព្រះសីហនុ បានបញ្ជាក់ច្បាស់ថា៖ «កាលពីថ្ងៃទី១៤ ខែធ្នូ ឆ្នាំ២០២១ កន្លងទៅនេះមានករណីចាប់បង្ខាំងមនុស្ស ធ្វើទារុណកម្ម និងជម្រិតទារប្រាក់នៅក្នុងទីតាំងកាស៊ីណូទីងស៊ីងខាងលើ ហើយត្រូវបានកម្លាំងមានសមត្ថកិច្ចបង្ក្រាបបាន តាមបណ្ដឹងរបស់ភាគីជនរងគ្រោះ»។

តាមរបាយការណ៍ បានបញ្ជាក់ទៀតថា៖ «ក្នុងអំឡុងពេល ផ្អាកអាជីវកម្មនេះ ស្នងការនគរបាលខេត្ត បានចាត់តាំងកម្លាំងប្រចាំការគ្រប់គ្រងទីតាំងនេះ ដើម្បីអនុវត្តនីតិវិធី និងទប់ស្កាត់បទល្មើស រង់ចាំក្រុមការងារចម្រុះរបស់រដ្ឋបាលខេត្ត ចុះអង្កេតស្រាវជ្រាវករណីនេះបានចប់សព្វគ្រប់»។

របាយការណ៍បានបន្ថែមទៀតថា៖ «មិនអនុញ្ញាតឱ្យមានការផ្ទេរសិទ្ធិ ឬការលក់ ការជួល ការបញ្ចាំ ឬការធ្វើអំណោយទីតាំងនោះទៅឱ្យអ្នកដទៃជាដាច់ខាត ដោយត្រូវរង់ចាំការទូទាត់ប្រាក់ឈ្នួល និងអត្ថប្រយោជន៍ផ្សេងៗជូនកម្មករ និយោជិតរួចរាល់សិន»។

ករណីមិនអនុវត្តតាមការសម្រេចខាងលើ រដ្ឋបាលខេត្តនឹងអនុវត្តវិធានការតាមផ្លូវច្បាប់ជាធរមាន។