ផ្សារទំនើបស៊ីធីម៉ល កំពុងតែលួចលាក់ បង្កើតបទល្មើសយ៉ាងគគ្រឹកគគ្រេង បែរជាមិនទាន់មានការបង្ក្រាប_វគ្គ២

ផ្សារទំនើបស៊ីធីម៉ល កំពុងតែលួចលាក់ បង្កើតបទល្មើសយ៉ាងគគ្រឹកគគ្រេង បែរជាមិនទាន់មានការបង្ក្រាប_វគ្គ២

ផ្សាយនៅថ្ងៃទី០៩ ខែមីនា ឆ្នាំ២០២២ វេលាម៉ោង១៣:១២នាទី

ភ្នំពេញ៖ ផ្សារទំនើបស៊ីធីម៉ល ដ៏ល្បីល្បាញក្នុងរាជធានីភ្នំពេញ ដែលមានទីតាំងស្ថិតនៅក្នុងសង្កាត់វាលវង់ ខណ្ឌ៧មករា កំពុងតែលួចលាក់បង្កើតបទល្មើស ល្បែងស៊ីសងខុសច្បាប់ «ហ្គេមបាញ់ត្រី» យ៉ាងគគ្រឹកគគ្រេង ដោយមិនមានអាជ្ញាធរនិងសមត្ថកិច្ចក្នុងមូលដ្ឋានណាម្នាក់ហ៊ានចេញមុខមកបង្ក្រាបឡើយ។

ប្រភពព័ត៌មានបានឲ្យដឹងថា៖ នៅក្នុងផ្សារទំនើបស៊ីធីម៉ល នេះ កំពុងតែនៅបន្តប្រមែប្រមូលផ្ដុំពលរដ្ឋខ្មែរ អោយមកលេងល្បែងស៊ីសង «ហ្គេមបាញ់ត្រី» យ៉ាងអណាធិបតេយ្យ និងសម្បូរដោយសិស្សសាលា វ័យក្រោមអាយុ១៨ឆ្នាំ ចូលទៅលេងយ៉ាងសស្រាក់សស្រាំ ដោយគ្មានសមត្ថកិច្ចពាក់ព័ន្ធណាម្នាក់ចាត់ វិធានការទប់ស្កាត់ នេះហាក់ដូចជាបណ្តែតបណ្ដោយខ្លាំងណាស់។

ទាក់ទិននឹងការបើកល្បែងស៊ីសងខុសច្បាប់ «ហ្គេមបាញ់» ដ៏ធំក្នុងផ្សារទំនើបនេះ មហាជនជាច្រើនបានរិះគន់ ប្រធានផ្សារ ចំៗថា «មិនគួរណាបណ្តែតបណ្ដោយឲ្យមានការបង្កើតល្បែងស៊ីសងខុសច្បាប់ ដែលជាហេតុនាំឱ្យមាន អំពើចោរកម្ម អំពើហិង្សា ជាពិសេសភាពអសន្តិសុខ ក្នុងសង្គម»។

ពាក់ព័ន្ធទៅនឹងករណីខាងលើនេះ អង្គភាពសារព័ត៌មានយើង មិនទាន់មានការបំភ្លឺពីប្រធានផ្សារ ឬ រដ្ឋបាលណាម្នាក់បានទេ។

ដោយសារតែភាពមិនប្រក្រតីខាងលើនេះ ប្រជាពលរដ្ឋអស់ជំនឿចំពោះអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋាន ដែលមានលោក លឹម សុភា អភិបាលខណ្ឌ៧មករា ហើយនិងលោក នេត ស៊ីថុន អធិការខណ្ឌ៧មករា ទៀតហើយ ក្រោមហេតុផល៖ បទល្មើសជាក់ស្តែងនៅនឹងភ្នែក បែរជាអស់លោកទាំងពីរមិនព្រមបង្ក្រាប (ពោលគឺ) បណ្តោយឲ្យល្បែងស៊ីសងទាំងនោះ បន្តធ្វើព្យុះភ្លៀងយ៉ាងអណាធិបតេយ្យទៅវិញ៕

ប្រជាពលរដ្ឋជាច្រើន សូមសំណូមពរដល់ឯកឧត្តម ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាព សូមឯកឧត្តមមេត្តាចាត់មន្ត្រីជំនាញចុះបង្ក្រាបទីតាំងល្បែងស៊ីសងខុសច្បាប់ នៅក្នុងផ្សារទំនើបស៊ីធីម៉ល ផងទាន។

ពលរដ្ឋស្នើដល់ឯកឧត្តមឧត្តមសេនីយ៍ឯក ស ថេត អគ្គស្នងការរង និងជាស្នងការ នៃស្នងការដ្ឋាននគរបាលរាជធានីភ្នំពេញ សូមឯកឧត្តមចាត់កម្លាំងនគរបាលជំនាញចុះបង្ក្រាបល្បែងស៊ីសងខុសច្បាប់ នៅក្នុងទីតាំងខាងលើនេះផងទាន៕ សូមអរគុណ!

ជុំវិញការចុះផ្សាយខាងលើនេះអង្គភាពសារព័ត៌មានយើង រងចាំការបំភ្លឺពីអាជ្ញាធរពាក់ព័ន្ធ នឹងប្រធានផ្សាររៀងរាល់ម៉ោងធ្វើការ។

ទំនាក់ទំនងការិយាល័យនិពន្ធ៖ 098906664/077906664