មហាព្រឹត្តិការណ៍ «រាត្រីចងចាំ» លើកទី៣ ឆ្នាំ២០២២ រម្លឹកគុណអង្គរ ប្រព្រឹត្តិទៅប្រកបដោយភាពជោគជ័យ

មហាព្រឹត្តិការណ៍ «រាត្រីចងចាំ» លើកទី៣ ឆ្នាំ២០២២ រម្លឹកគុណអង្គរ ប្រព្រឹត្តិទៅប្រកបដោយភាពជោគជ័យ

ចេញផ្សាយបន្តនៅថ្ងៃទី១៩ ខែធ្នូ ឆ្នាំ២០២២ វេលាម៉ោង០៨:៥៥នាទី

ដើម្បីចូលរួមអបអរសាទរខួប៣០ឆ្នាំ នៃការដាក់បញ្ចូលរមណីយដ្ឋានអង្គរ ក្នុងបញ្ជីបេតិកភណ្ឌវប្បធម៌រូបីនៃពិភពលោករបស់អង្គការយូណេស្កូ នាថ្ងៃទី១៤ ខែធ្នូ ឆ្នាំ២០២២ ក្រសួងវប្បធម៌និងវិចិត្រសិល្បៈ សហការដោយរដ្ឋបាលខេត្តសៀមរាប និងអាជ្ញាធរជាតិអប្សរា បានរៀបចំព្រឹត្តការណ៍ទស្សនីយភាពសិល្បៈ រាត្រីចងចាំ សម្តែងជូនសាធារណៈបានទស្សនា នាបរិវេណខាងក្រោយប្រាសាទអង្គរវត្ត ក្រោមអធិបតីភាពលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា លោកជំទាវបណ្ឌិតសភា ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្ប: និងតំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប។

នៅពេលបានទៅទស្សនា ការសម្តែងសិល្បៈក្នុងព្រឹត្តិការណ៍ «រាត្រីចងចាំ» នៅខាងក្រោយប្រាសាទអង្គរវត្ត ប្រជាពលរដ្ឋជាច្រើនរស់នៅក្នុងក្រុងសៀមរាប បានលើកឡើងថាម្នាក់ៗមានអារម្មណ៍សប្បាយរីករាយជាពន់ពេក ក្រោយពីបានទស្សនានូវមហាព្រឹត្តិការណ៍ដ៏អស្ចារ្យនេះ។

ក្នុងមហាព្រឹត្តិការណ៍ «រាត្រីចងចាំ» បែបនេះ អាចធ្វើឱ្យកូនខ្មែរជំនាន់ក្រោយ បានស្គាល់កាន់តែច្បាស់ និងជាការរម្លឹកឱ្យដឹងថា ខ្មែរមានវប្បធម៌ អរិយធម៌ដ៏ល្អផូរផង់ ហើយក៏ជាចំណែកមួយដើម្បីទាក់ទាញភ្ញៀវទេសចរនិងរួមចំណែកអភិវឌ្ឍវិស័យសេដ្ឋកិច្ចសង្គមតាមរយ:វិស័យសិល្បៈ វប្បធម៌។មហាព្រឹត្តិការណ៍ទស្សនីយភាពសិល្ប: វប្បធម៌ដ៏អស្ចារ្យខាងលើនេះ ក៏បានបង្ហាញជូននូវបេតិកភណ្ឌវប្បធម៌រូបីនិងអរូបី។

ឯកឧត្តម ទិត ថាវរិទ្ធ ដែលទទួលបន្ទុកដឹកនាំផ្ទាល់ នូវការងារទស្សនីយភាពបានបញ្ជាក់ថា ក្រុមការងារលោកគ្រូអ្នកគ្រូ និងសិល្បករទាំងអស់ប្រឹងប្រែងយកចិត្តទុកដាក់សំរិតសំរាំងនូវឈុតឆាកធំៗដែលបញ្ចូលនូវទំរង់សិល្បៈជាច្រើនរួមបញ្ចូលគ្នា ធ្វើយ៉ាងណាអោយទស្សនីយភាពសិល្បៈមួយនេះមានភាពទំនើប តែនៅរក្សាបាននូវដំណើររឿង និង ខ្លឹមសារជាខ្មែរដដែល ដើម្បីអោយទស្សនិកជនទទួលយកចាំជាប់អំពីសមត្ថភាពនៃការរៀបចំរបស់ក្រសួងវប្បធម៌និងវិចិត្រសិល្ប:។ ម្យ៉ាងទៀតមហាព្រឹត្តិការណ៍នេះមិនត្រឹមតែជាកិច្ចការផ្សព្វផ្សាយអំពីវប្បធម៌ប៉ុណ្ណោះទេ តែជាការជួយផ្សព្វផ្សាយអំពីទេសចរណ៍ផងដែរ ដើម្បីជួយជំរុញអោយភ្ញៀវទេសចរណ៍វិលត្រឡប់មកលេងនៅទឹកដីអង្គរសារជាថ្មីបន្ទាប់ពីវិបត្តិកូវីដ-១៩ ត្រូវបានកាត់បន្ថយ។

សូមជម្រាបផងដែរថា មហាព្រឹត្តិការណ៍ «រាត្រីចងចាំ» លើកទី៣ ឆ្នាំ២០២២ កាលពីរាត្រីថ្ងៃទី១៤ ខែធ្នូ ឆ្នាំ២០២២នេះ មានសិល្បករ សិល្បការិនីក្នុងប្រព័ន្ធ ក្រៅប្រព័ន្ធនិងក្រុមការងារប្រមាណ ៣៥០នាក់ ចូលរួមសម្តែងប្រកបដោយភាពជោគជ័យ និងបានបន្សល់ទុកនូវស្នាមញញឹម ព្រមទាំងរីករាយបំផុតដោយបានឃើញប្រជាពលរដ្ឋជាងមួយម៉ឺននាក់ចូលរួមទស្សនា ដោយផ្ទាល់នឹងបានសំនូមពរអោយក្រសួងវប្បធម៌និងវិចិត្រសិល្បៈ បន្តរៀបចំនូវព្រឹត្តិការណ៍នេះ នៅឆ្នាំ២០២៣ និងនៅឆ្នាំបន្តបន្ទាប់៕