រដ្ឋមន្ត្រីបរិស្ថាន៖ គម្រោងប្រព័ន្ធ FMIS គឺធ្វើការកែលម្អនូវការទទួលព័ត៌មានហិរញ្ញវត្ថុ និងការផ្តល់សេវាកម្មលើវិស័យហិរញ្ញវត្ថុសាធារណៈ
![](https://blogger.googleusercontent.com/img/b/R29vZ2xl/AVvXsEgf9EPmJ3rLNBTz3w_gXke0chPJUf8IoQU_3lUVTB5wri_KrW-iGpbyobJIjsHQ19daNs1M8NbaD-lXZvbicPgg_Jdp4szqA4d3qVrM80OYcNdG8b0u_3tmtlVQqs90PSfQ6IWKpPmh_T2H9Wr8aNCaAkZzTWjN_AwFUUS5FOfC0jXnujycgULDnFtd/s1600/IMG_20230529_213324_607.jpg)
រដ្ឋមន្ត្រីបរិស្ថាន៖ គម្រោងប្រព័ន្ធ FMIS គឺធ្វើការកែលម្អនូវការទទួលព័ត៌មានហិរញ្ញវត្ថុ និងការផ្តល់សេវាកម្មលើវិស័យហិរញ្ញវត្ថុសាធារណៈ
------------------------------------
(ភ្នំពេញ)៖ លោក សាយ សំអាល់ រដ្ឋមន្រ្តីក្រសួងបរិស្ថាន បានថ្លែងថា គម្រោងប្រព័ន្ធ FMIS គឺធ្វើការកែលម្អនូវការទទួលព័ត៌មានហិរញ្ញវត្ថុ និងការផ្តល់សេវាកម្មលើវិស័យហិរញ្ញវត្ថុសាធារណៈ ដែលនេះជាគម្រោងសំខាន់សម្រាប់ប្រទេសកម្ពុជា ដែលមានទិសដៅផ្លាស់ប្តូរនូវនីតិវិធីអនុវត្តហិរញ្ញវត្ថុពីការប្រើប្រាស់ដោយដៃជាទូទៅឬដោយផ្នែកខ្លះបានដំណើរការជាលក្ខណៈប្រព័ន្ធតូចៗ ឱ្យទៅជាប្រព័ន្ធអេឡិចត្រូនិក (ដំណើរការជាប្រព័ន្ធកុំព្យូទ័រ)។
ការថ្លែងបែបនេះ របស់លោករដ្ឋមន្ត្រីបរិស្ថានបានធ្វើឡើងក្នុងសិក្ខាសាលាស្ដីពី «ការផ្សព្វផ្សាយប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS) ដល់មន្ត្រីថ្នាក់ជាតិ និងថ្នាក់ក្រោមជាតិ» នាព្រឹកថ្ងៃទី២៩ ខែឧសភា ឆ្នាំ២០២៣ នៅទីស្តីការក្រសួងបរិស្ថាន។
លោក ពុទ្ធ សូរិទ្ធី អនុរដ្ឋលេខាធិការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈក្រសួងបរិស្ថាន បានឱ្យដឹងថា ចំពោះការអនុវត្ត និងប្រតិបត្តិការគ្រប់គ្រងហិរញ្ញវត្ថុតាមប្រព័ន្ធព័ត៌មានវិទ្យា FMIS ទាំងស្រុងនេះ ក្រសួងបរិស្ថានត្រូវបានទទួលស្គាល់ និងលើកទឹកចិត្ត ថាជាស្ថាប័នគំរូ ពីក្រសួងសេដ្ឋកិច្ចនិងហិរញ្ញវត្ថុ និងបានផ្តល់ជាមេរៀន និងបទពិសោធន៍ល្អៗ ដើម្បីឱ្យក្រសួង-ស្ថាប័ន ដែលមិនទាន់បានចូលជាអង្គភាពថវិកាអាណាប័កផ្ទេរសិទ្ធិពេញលេញយកមកអនុវត្តឱ្យកាន់តែប្រសើរឡើង និងពេញលេញទាំងស្រុង។
លោក សាយ សំអាល់ បានបន្ថែមថា គោលដៅចម្បងរបស់ការអនុវត្តគម្រោងប្រព័ន្ធ FMIS គឺដើម្បីគាំទ្រ ជំរុញ និង ពន្លឿនសកម្មភាពទូទៅរបស់កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ (PFMRP) នៅគ្រប់ដំណាក់កាលដោយបង្កើននូវគណនេយ្យភាព ប្រសិទ្ធភាព ភាពស័ក្កិសិទ្ធិ និងការធ្វើទំនើបភាវូបនីយកម្មប្រព័ន្ធគ្រប់គ្រងហិរញ្ញវត្ថុសាធារណៈនៅកម្ពុជា ដែលនឹងផ្ដល់នូវព័ត៌មានចំណូលចំណាយថវិកាគ្រប់ជ្រុងជ្រោយ ទាន់ពេលវេលា និងនៅក្នុងរយៈពេលវែង។
លោករដ្ឋមន្ត្រីបរិស្ថាន បានថ្លែងអំណរគុណចំពោះក្រុមការងារនៃគម្រោងប្រព័ន្ធព័ត៌មានវិទ្យាគ្រប់គ្រងវិស័យហិរញ្ញវត្ថុសាធារណៈ (FMIS) នៃក្រសួងសេដ្ឋកិច្ចនិងហិរញ្ញវត្ថុ ក្នុងការរៀបចំឱ្យមានប្រព័ន្ធព័ត៌មានវិទ្យានេះឡើង និងបានបណ្ដុះបណ្ដាលដល់មន្ត្រីរាជការពាក់ព័ន្ធនៃក្រសួងបរិស្ថានក្នុងការប្រើប្រាស់ប្រព័ន្ធនេះ សំដៅជំរុញភាពជឿទុកចិត្តនៃថវិកា គណនេយ្យភាពហិរញ្ញវត្ថុ និងសមិទ្ធផលការងារ។
លោក សាយ សំអាល់ ក៏បានថ្លែងនូវការកោតសរសើរ និងវាយតម្លៃខ្ពស់ផងដែរ ចំពោះកិច្ចខិតខំប្រឹងប្រែងរបស់ក្រុមការងារកម្មវិធីកំណែទម្រង់ហិរញ្ញវត្ថុសាធារណៈ នៃក្រសួងបរិស្ថាន ដែលបានរៀបចំកម្មវិធីសិក្ខាសាលាផ្សព្វផ្សាយនេះឡើង ដើម្បីបន្តផ្សព្វផ្សាយ និងបញ្ជ្រាបការយល់ដឹងអំពីនីតិវិធីថ្មីៗនៃប្រព័ន្ធ FMIS លើគ្រប់មុខសញ្ញាចំណាយថវិកាចរន្ត ជូនដល់អង្គភាពថវិកាអាណាប័កផ្ទេរសិទ្ធិពេញលេញនៃក្រសួងបរិស្ថាន។
លោកបានបញ្ជាក់ថា តាមរយៈការបញ្ជ្រាបការយល់ដឹង និងការចែករំលែកនូវបទពិសោធន៍ក្នុងការអនុវត្តនីតិវិធីថ្មីតាមប្រព័ន្ធ FMIS ទាំងស្រុងលើចំណាយថវិកាចរន្តគ្រប់មុខសញ្ញាពីមន្ត្រីបច្ចេកទេស និងលេខាធិការដ្ឋានក្រុមការងារគ្រប់គ្រងគម្រោង FMIS អង្គភាពថវិកាទាំងអស់នៃក្រសួងបរិស្ថាន ជាពិសេសអង្គភាពថ្នាក់ក្រោមជាតិនឹងទទួលបាននូវព័ត៌មាន និងចំណេះដឹងបន្ថែមទៀត ដើម្បីជាមូលដ្ឋានក្នុងការត្រៀមខ្លួនចូលរួមអនុវត្ត និងប្រើប្រាស់ប្រព័ន្ធ FMIS ជាមួយនឹងការអនុវត្តនីតិវិធីថ្មីៗ។
សូមបញ្ជាក់ថា ក្រសួងសេដ្ឋកិច្ចនិងហិរញ្ញវត្ថុបានផ្តួចផ្តើមបង្កើតនូវកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ (PFMRP) និងបានដាក់ឱ្យអនុវត្តជាផ្លូវការនៅក្នុងខែធ្នូ ឆ្នាំ២០០៤។ កម្មវិធីនេះធ្វើឡើងក្នុងគោលបំណងដើម្បីជួយជំរុញអភិបាលកិច្ចល្អ និងតម្លាភាពក្នុងការគ្រប់គ្រងថវិកាជាតិ ឱ្យកាន់តែមានភាពប្រសើរឡើង ជាពិសេសការចំណាយថវិកាជាតិ ដែលនឹងត្រូវកែលម្អការគ្រប់គ្រង និងគណនេយ្យភាពឱ្យមានលក្ខណៈស្តង់ដារក្នុងការប្រើប្រាស់នូវធនធានរបស់រដ្ឋាភិបាលទាំងចរន្ត និងមូលធនប្រកបដោយប្រសិទ្ធភាព៕
![](https://blogger.googleusercontent.com/img/b/R29vZ2xl/AVvXsEioQHZ08Ylf_IBkgE-eWRc1H-3ci5KKQLrl0isfZ4O3xc9cuIFhN2miA_Zs5NXRdM5oKbQrXagLDbEmBXA4whfn2dyprkYsfHca3pcud2xLgTjeqBRbpmdcx-NWvbGtT3C6O8OhaDgedO_qWuiiAkxN5lj4QZDEAN3WMnD87RTlZ7djCKelpA6n5YpX/s1600/IMG_20230529_213327_397.jpg)
![](https://blogger.googleusercontent.com/img/b/R29vZ2xl/AVvXsEjAUOp1Nc2-t4A3NJtl8xwuqdgNyUsYwE5YOPeg9N9MoiAxUv6AqkXn1d85yyuCZYyGy0ErO7_lsMijhFCojEgGRJTFhOOO-g8gjrUbI72Wpg206hUnHF-tDYBIcZQ7MD44eDHUd2eTT_g3sZW8pCTq32cOfy46K8pQrcInpOcBKI6lnUxwTzhNaegu/s1600/IMG_20230529_213327_876.jpg)
![](https://blogger.googleusercontent.com/img/b/R29vZ2xl/AVvXsEgzq2Lnuz5WlI2nMpv-RjIJ3Cse4YTcVTuBqy4Nh0gkqH42jvR5AxD_64pBS31NeMM45otoyEMWhaJpGid86yBXHjEu9fyv3OWrxvqcgHsFuMjQQv5tHMQ4vqJCbIrihy1qVTcgEhr8Uc0Ebowqxs7i9XaDHERVyLenJO9tI2aGqAZvBX_OT0ANMHvU/s1600/IMG_20230529_213327_974.jpg)
![](https://blogger.googleusercontent.com/img/b/R29vZ2xl/AVvXsEg4dc9kIQ3KWwPDXM1f6uoe6EmjMHJDdcoEKY9iz_qrGmNla1Ln3GEPXUKz5C8dkBw1pciL4ONSHto61wK1KELi-nHgrfmJ6n3W9KmiKoC6bxrZNqJavuf6CGBEsKhQS4Xh078xuECkgexprxEYX6llBI-nfaCjXUEbOf0lFYULXAsqzdzasVbo3Zm2/s1600/IMG_20230529_213328_026.jpg)
![](https://blogger.googleusercontent.com/img/b/R29vZ2xl/AVvXsEhynabplMNql-ZMcuaxUVW_hdEPmJqPr_-XmDLbY_xEKSVv8Vhig_0yA4dEATW2UyLaVzPzHyw8pHxubZ6TMt3I-7Dj0wWrRs_vZ4fMmqSZiQeb_jqfc6IS0B3IG33j_nqAct3GHMdDAn65GDYmdb93QU1xeWMTlLc7rEjnbVpXJKGIpdS96G8704w3/s1600/IMG_20230529_213328_148.jpg)
![](https://blogger.googleusercontent.com/img/b/R29vZ2xl/AVvXsEj9we3tU5LMS5VXaOw0GtG81BDHf_ai5ACK1mZIIDi0VaUTzeD1320uxogtOnseGJnrje80Z8R26_Xkh3vioLOhF3qZpjDqVIGYFhsveRNmiRs4_oJN3vWOm8kRkZt2KlYOUmkTNnFGzJ6Gtz2pRvwdx24RXCjTo3oQTh8Lz9RVoflnECYP94Ku9IHt/s1600/IMG_20230529_213328_171.jpg)
![](https://blogger.googleusercontent.com/img/b/R29vZ2xl/AVvXsEhC8O3GwThY7EEVNWmtGPMNmOZIcH1A4Dc90kbPg3_-ZGxawWH6ut_x6zPc5PUyc9XT5KLGBZtRb_26uNmDHAXnfuk_wP9UfJIy07xgvq9WzHqZA8AoqWW2_IZcYxoQ0L7521aMQlKG4K80iEvxtup1o1Y3qkYHlTPtl8vyntPbdiBgbnwi97raZvkq/s1600/IMG_20230529_213328_190.jpg)
No comments