ព្រឹទ្ធសភាបានពិនិត្យ និងឱ្យយោបល់ឯកភាពទាំងស្រុងលើសេចក្តីព្រាងច្បាប់ក្រមបរិស្ថាន និងធនធានធម្មជាតិ
![](https://blogger.googleusercontent.com/img/b/R29vZ2xl/AVvXsEjC34zARMJnKXtsr8mbL6t3krOnVrHkhxMtgrdIa_nwhBENRLIXsbnA3CZI6HKMPjGt3NNuN0-hwRO4rrpCE1P46GooVhm1k61CQQSQbXfYfY8ZiDNvaCxp0VFvWHlpMMQwa0Ol01G51CNRKd7ZzVnRTFs7-gXrgCPf2B6fR7k2dl3uOxGTf06U0uR-/s1600/IMG_0145.jpeg)
ព្រឹទ្ធសភាបានពិនិត្យ និងឱ្យយោបល់ឯកភាពទាំងស្រុងលើសេចក្តីព្រាងច្បាប់ក្រមបរិស្ថាន និងធនធានធម្មជាតិ
-------------------------------
ព្រឹទ្ធសភា នៃព្រះរាជាណាចក្រកម្ពុជា បានបន្តសម័យប្រជុំលើកទី១០ នីតិកាលទី៤ ក្រោមអធិបតីភាពដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី១៣ ខែមិថុនា ឆ្នាំ២០២៣។ កិច្ចប្រជុំនេះ មានសមាជិកព្រឹទ្ធសភាមានវត្តមានចំនួន៦០រូប។
អង្គប្រជុំបានដំណើរការដោយមានរបៀបវារៈចំនួន០២ ដូចខាងក្រោម៖
របៀបវារៈទី១៖ ពិនិត្យហើយឱ្យយោបល់លើសេចក្តីព្រាងក្រមបរិស្ថាន និងធនធានធម្មជាតិ។
សេចក្តីព្រាងក្រមនេះ តាក់តែងឡើងមានគោលបំណង ដើម្បីប្រមូលផ្តុំសំយោគបញ្ចូលគ្នានូវបទប្បញ្ញត្តិនៃច្បាប់ និងលិខិតបទដ្ឋានគតិយុត្តនានាជាធរមានពាក់ព័ន្ធនឹងវិស័យបរិស្ថាន និងធនធានធម្មជាតិ ដោយធ្វើសមាហរណកម្ម សុខដុមនីយកម្ម និងទំនើបកម្មឱ្យមានភាពជាក់ស្តែង-និយម សង្គតិភាព វិសាលភាព ទូលំទូលាយគ្រប់ជ្រុងជ្រោយ និងភាពស៊ីសង្វាក់ប្រទាក់ក្រឡាគ្នា ដើម្បីក្លាយជាបទប្បញ្ញត្តិគោល ដែលកំណត់ពីដែនសមត្ថកិច្ចនៃក្រសួង ស្ថាប័នពាក់ព័ន្ធ សំដៅសម្រួលដល់ការអនុវត្តមុខងារ និងតួនាទី ភារកិច្ចរៀងៗខ្លួន ក្នុងស្មារតីឯកភាពជាតិ ស្របទៅនឹងបរិបទរីកចម្រើននៃសង្គមកម្ពុជាថ្មី។
សេចក្តីព្រាងក្រមនេះមានគុណប្រយោជន៍៖
-ជួយពង្រឹង និងធ្វើឱ្យប្រសើរឡើងបន្ថែមទៀតលើការគ្រប់គ្រងបរិស្ថាន កិច្ចគាំពារ អភិរក្ស និងការស្តារឡើងវិញនូវធនធានធម្មជាតិជីវៈចម្រុះ មុខងារប្រព័ន្ធអេកូឡូស៊ី និងការរស់នៅប្រកបដោយចីរភាព
-កំណត់ទិសដៅរួមជាយុទ្ធសាស្ត្រ សម្រាប់កិច្ចគាំពារបរិស្ថាន និងការអភិរក្សធនធាន-ធម្មជាតិដល់ក្រសួង ស្ថាប័ន និងអាជ្ញាធរដែលមានសមត្ថកិច្ចពាក់ព័ន្ធ
-ពង្រីកលទ្ធភាពយ៉ាងទូលំទូលាយដល់ក្រសួង ស្ថាប័ន និងមជ្ឈដ្ឋានទាំងអស់ក្នុងការ
ចូលរួមកាន់តែប្រសើរជាងមុននៅក្នុងកិច្ចគាំពារបរិស្ថាន ការគ្រប់គ្រង និងការអភិរក្សធនធានធម្មជាតិ និងជីវៈចម្រុះតាមរយៈការបង្កើត និងការគោរពនូវទំនាក់ទំនងនៃមុខងាររបស់ក្រសួង ស្ថាប័ន និងមជ្ឈដ្ឋានសង្គមទាំងអស់
-បង្កើនប្រសិទ្ធភាព និងប្រសិទ្ធផលនៃការអនុវត្តបេសកកម្មគ្រប់គ្រង ការពារ អភិរក្ស និងស្តារឡើងវិញនូវធនធានធម្មជាតិ ជីវៈចម្រុះបេតិកភណ្ឌធម្មជាតិ និងវប្បធម៌ សំដៅធានាបាននូវការអភិវឌ្ឍប្រកបដោយចីរភាព និងការចូលរួមថែរក្សានូវភាពរុងរឿងសម្រាប់ពលរដ្ឋកម្ពុជាគ្រប់ជំនាន់
-ផ្តល់ជាយន្តការជំរុញ និងលើកកម្ពស់ការយល់ដឹង និងការស្រាវជ្រាវអំពីបរិស្ថានដល់គ្រប់មជ្ឈដ្ឋានសង្គមទាំងអស់តាមរយៈការអប់រំការផ្សព្វផ្សាយ និងការបណ្តុះ-បណ្តាលទាំងយន្តការក្នុងប្រព័ន្ធ និងក្រៅប្រព័ន្ធ
-ដើរតួជាបទប្បញ្ញត្តិគោលមួយដ៏រឹងមាំសម្រាប់មន្រ្តីអនុវត្តច្បាប់ ជាពិសេសមន្រ្តីដែលមានសមត្ថកិច្ចពាក់ព័ន្ធនឹងការបង្រ្កាបបទល្មើសបរិស្ថាន និងធនធានធម្មជាតិ ព្រម-ទាំងមន្រ្តីអនុវត្តច្បាប់នៃក្រសួង ស្ថាប័ន ឬអង្គភាពពាក់ព័ន្ធទាំងអស់។
សេចក្តីព្រាងច្បាប់នេះតាក់តែងឡើងមាន១២គន្ថី និង ៨៦៥មាត្រា ត្រូវបានរដ្ឋសភា នៃព្រះរាជាណាចក្រកម្ពុជា អនុម័តយល់ព្រមចំនួន៩៨សំឡេង នៃចំនួនសមាជិករដ្ឋសភាទាំងមូល នៅថ្ងៃទី៣០ ខែឧសភា ឆ្នាំ២០២៣ នាសម័យប្រជុំរដ្ឋសភាលើកទី៩ នីតិកាលទី៦។
ក្រោយពីសមាជិកព្រឹទ្ធសភាចំនួន០៥រូប បានឡើងមានយោបល់រួចមក ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានបំភ្លឺជូនអង្គប្រជុំព្រឹទ្ធសភា។ អង្គប្រជុំព្រឹទ្ធសភាបានពិនិត្យ ហើយឱ្យយោបល់ឯកភាពទាំងស្រុងលើសេចក្តីព្រាងច្បាប់ទាំងមូលដោយឥតកែប្រែ ចំនួន៦០សំឡេង នៃចំនួនសមាជិកព្រឹទ្ធសភាទាំងមូល៕
![](https://blogger.googleusercontent.com/img/b/R29vZ2xl/AVvXsEj4oqIZa67heKZU0Z768t44CtqdP0NiMNpDtKw7l_QCE8p-o5AIE4sRR_i2f4Wfs5Dvh8fu12N9s-aqtrMnEi3uhbq8Lgl5s9xHjrY10k7oJbrtjoV1KyXEpPBlrpWNy0nkr3HrIu6mkdugYKdUpgoq6DuxxBbmGA3Ig6zdLO3Rri4PkpSEK4n7PuyM/s1600/IMG_0146.jpeg)
![](https://blogger.googleusercontent.com/img/b/R29vZ2xl/AVvXsEiw2VaBmaw5qx7NaQocxIrHhpbhgVrG1BjEUB-eNha4PLyHdKH0ntxASVJF-9TFbJxMgH1hixfz5mv-HCnD5132_qa-jgY5OPzwIAFSRNBdealm4MWzBRPm_nT_00dMWW7JWD_1wKBjTrVLrUYyeg792986O6exGId8KeTUx2W5-sqrLToPIuIhpgJA/s1600/IMG_0147.jpeg)
![](https://blogger.googleusercontent.com/img/b/R29vZ2xl/AVvXsEjMYwg3HAjBG5bv1jZJ_buirFjUXercQ2oVK_bFzdpa09Cm-dLVpRwaerWANo6k1GuEBtmszvsqYGbiVmh3dogwONkCCy_YhaYEemJlaJtuN9R5d2tpUdgOY2ICWYfYvbbhX8R28_pQi29M-IQzLZwEjRn2JiHSd3TmA2G8r98hoO8ZEuy6Q6Dv_N-j/s1600/IMG_0148.jpeg)
![](https://blogger.googleusercontent.com/img/b/R29vZ2xl/AVvXsEi9eJfIhysfCylidU9AIM6oEpVwnN-Mqqr2zLnljvV8yfN8LrvYP-p-I-qAhdsw40GRr9FMZf33ZD2wZG4ecOhZS77_PpV5lLj8_hiKtt86M7M8GyIH8rDwJ7xRJsq2UZ9InwHQYPzxcLv7uGEzJejQErJzs8293IAtmVXUXTQ1wDzT6sBCKbeeKxdQ/s1600/IMG_0149.jpeg)
![](https://blogger.googleusercontent.com/img/b/R29vZ2xl/AVvXsEji0LYTRBNkl5zWpj97WiinXGgdoYI8DHAIrx1ygFOs60xK3FiFn9Th2GOvg-UM518veHMbcgS8lR3tAIArth_ILe7mOh4jzlK9WtOETLHmWHI1HwAxZuiWd384nrt6LFvGjGRvljVXJiXUNrGOO_hdnIn7FmgPL98XSBvFtoDZpl5zSMoKf4o3sAQQ/s1600/IMG_0150.jpeg)
![](https://blogger.googleusercontent.com/img/b/R29vZ2xl/AVvXsEjbFK3byQZs2SsdxJeeT-GQT_aXxGakuaU0PpZv3wCzWSq8qG8G0SLN1i9ZKzX43vJHQauCpr68v2U_NPIgJTnQQ0pLMOt86P4jYvzJHke5U80a0WVJ_c_ptJ0lD41kc7UKY8Qstv01wJfCkHgALhIZPDDOhJGSGzhQQjKikN5lwtWlMg_OvOX1G55w/s1600/IMG_0151.jpeg)
No comments