បារមីផ្លូវងងឹត បញ្ជាក់ថា លោក វ៉ន ផា នាយប៉ុស្តិ៍នគរបាលឃុំស្ដៅ បើកល្បែងភ្នាល់ដាក់លុយក្នុងទីស្នាក់ការប៉ុស្តិ៍ ខណៈលោកមេប៉ុស្តិ៍រូបនេះបដិសេធថាត្រឹមលេងដាក់ទឹកសុទ្ធ

ខេត្តកំពង់ចាម៖ តាមសេចក្តីរាយការណ៍បានឲ្យដឹងថា «ក្នុងស្នាក់ការប៉ុស្តិ៍នគរបាលរដ្ឋបាលឃុំស្តៅ នៃអធិការដ្ឋាននគរបាលស្រុកកងមាស ខេត្តកំពង់ចាម ត្រូវបានលោក វ៉ន ផា នាយមេប៉ុស្តិ៍ បើកឲ្យអ្នកស្រុកភូមិចូលលេងល្បែងស៊ីសង «បោះប៊ូល» ភ្នាល់ដាក់លុយជារៀងរាល់ថ្ងៃ ដោយមិនគិតរឿងធ្វើការងារនោះទេ»!

ក្រៅពីជួបជុំគ្នាលេងល្បែងដាក់លុយ ពេលយប់ឡើង មេប៉ុស្តិ៍នាំគ្នាផឹកស៊ីរហូតដល់ម៉ោង ១០ទៅ១១យប់ផឹកនៅកន្លែងលេងល្បែងផង ផឹកនៅកន្លែងក្នុងប៉ុស្តិ៍ផង ធ្វើឲ្យពិបាកដល់មន្ត្រីៗផ្សេងៗទៀតពិបាកក្នុងការធ្វើការងារណាស់។

ប្រភពព័ត៌មានបានគូសបញ្ជាក់យ៉ាងច្បាស់ថា៖ ដំបូងឡើយមេប៉ុស្តិ៍បើកកីឡា «បោះប៊ូល» ដើម្បីហាត់ប្រាណ ប៉ុន្តែក្រោយមកបែរជានាំមនុស្សពីខាងក្រៅ ដែលជាមុខសញ្ញាអ្នកលេងល្បែងជល់មាន់ ឲ្យចូលមកលេងល្បែងភ្នាល់ដាក់លុយជារៀងរាល់ថ្ងៃទៅវិញ! ចំណែកឯមន្រ្តីបម្រើការងារនៅក្នុងប៉ុស្តិ៍គឺមិនបានលេងកីឡាហាត់ប្រាណអីនោះទេ! ដោយមេប៉ុស្តិ៍ទុកកីឡានោះឲ្យអ្នកស្រុកភូមិចូលមកលេងភ្នាល់ដាក់លុយយកតុងវិញ។

ប្រភពដដែលបន្តទៀតថា៖ «ទីតាំងភ្នាល់ក្នុងស្នាក់ការប៉ុស្តិ៍នគរបាលឃុំស្តៅ គឺមានបុគ្គលឈ្មោះ ក្នា ភេទប្រុស អតីតជាជនពាលដើរលួចទាក់ឆ្កែក្នុងស្រុកភូមិ ឈរចាំប្រមូលតុង ដោយមានលោក វ៉ន ផា នាយប៉ុស្តិ៍ជាអ្នកកាងពីក្រោយខ្នង។

យ៉ាងណាករណីនេះនាយប៉ុស្តិ៍នគរបាលឃុំស្តៅ លោក វ៉ន ផា បានបំភ្លឺប្រាប់សារព័ត៌មាន កាលពីល្ងាចថ្ងៃទី១១កុម្ភៈ២០២៦នេះ ដោយលោកធ្វើការច្រានចោលទាំងស្រុងចំពោះប្រភពព័ត៌មាន «ដោយលោកមេប៉ុសិ៍បញ្ជាក់ថាមិនបានបើកឲ្យលេងល្បែងស៊ីសងភ្នាល់ដាក់លុយនោះទេ ដោយគ្រាន់តែលេងកីឡាបោះប៊ូលហាត់ប្រាណ ភ្នាល់ដាក់ទឹកសុទ្ធធម្មតា ហើយក៏អត់មានអ្នកឈរចាំយកលុយតុងអីដែរ ហើយលោកក៏មិនបានកាងឲ្យបុគ្គលឈ្មោះក្នា»! កាលបំភ្លឺនេះ ស្របពេលអធិការនគរបាលស្រុកកងមាស លោក ជា ជួន ក៏មិនបានដឹងអំពីការលេងភ្នាល់ដាក់លុយ ដោយលោក ជា ជួន ត្រឹមដឹងថាពិតជាឃើញមានកន្លែងបោះប៊ូលក្នុងស្នាក់ការប៉ុស្តិ៍រដ្ឋបាលពិតប្រាកដមែន។

ក្រោយពីលេចឮដំណឹងនេះភ្លាម សាធារណមតិបានលើកឡើងទាំងមិនសប្បាយចិត្ត ដោយស្នើឱ្យថ្នាក់ដឹកនាំ នៃស្នងការដ្ឋាននគរបាលខេត្តកំពង់ចាម ថ្នាក់ដឹកនាំក្រសួងមហាផ្ទៃ បើកការសួរនាំនិងធ្វើការដកមេប៉ុស្តិ៍រូបនេះគ្រវាត់ចោល ប្រសិនបើជារកឃើញថានាយប៉ុស្តិ៍រូបនេះ ពិតជាបានប្រព្រឹត្តអំពើអបាយមុខក្នុងស្នាក់ការប៉ុស្តិ៍រដ្ឋបាល ពិតប្រាកដមែន៕