អធិការស្រុកស្ទឹងត្រង់ លោក ឯម វឌ្ឍនា កំពុងបណ្តោយឲ្យបនល្បែងស៊ីសងខុសច្បាប់ ដំណើរយ៉ាងគគ្រឹកគគ្រេង

តាមសេចក្តីរាយការណ៍ពីប្រជាពលរដ្ឋទីតាំងល្បែងស៊ីសងខុសច្បាប់ដុសស្លែដ៏ធំ «សង្វៀនជល់មាន់» កំពុងតែដំណើរការយ៉ាងរឹងមាំក្នុងភូមិសាស្ត្រឃុំខ្ពបតាងួន ស្រុកស្ទឹងត្រង់ ខេត្តកំពង់ចាម ដែលជាដែនសមត្ថកិច្ចរបស់លោក ឯម វឌ្ឍនា អធិការនគរបាលស្រុកស្ទឹងត្រង់។

ប្រជាពលរដ្ឋបានប្រាប់សារព័ត៌មានឲ្យដឹងថា៖ ទីតាំងបនល្បែងស៊ីសងដុសស្លែមួយនេះ ជារបស់ឈ្មោះ នឿ ដែលគេស្គាល់ថាជាបុគ្គលមានខ្នងបង្អែកដ៏រឹងមាំជាអ្នកមានឥទ្ធិពលក្នុងស្រុកស្ទឹងត្រង់ ខេត្តកំពង់ចាម។ បុគ្គលឈ្មោះ នឿ រូបនេះតែងតែបង្ករបង្កើតបនល្បែងភ្នាល់ខុសច្បាប់ ជាម្តងហើយម្តងទៀតក្នុងភូមិសាស្ត្រស្រុកស្ទឹងត្រង់ ខេត្តកំពង់ចាម ដោយគ្មានខ្លាចរអាច្បាប់បន្តិចនោះទេ។

ប្រភពព័ត៌មានពីប្រជាពលរដ្ឋបានបន្តទៀតថា៖ បនល្បែងស៊ីសង របស់ឈ្មោះ នឿ លេង៧ថ្ងៃក្នុង ១សប្ដាហ៍ ក្នុងមួយថ្ងៃៗលេងចាប់ផ្ដើមពីម៉ោង ១១ព្រឹក រហូតព្រះសូរិយាអស្តង្គត ទើបបំបែកជើងគ្នាទៅផ្ទះរៀងៗខ្លួន និងមានអ្នកចាញ់រាប់ពាន់ដុល្លារក្នុងម្នាក់ៗ ថែមទាំងស្រែកហ៊ោកញ្ជ្រៀវយ៉ាងកងរំពង។

ប្រជាពលរដ្ឋដែលរស់នៅក្នុងភូមិសាស្ត្រស្រុកស្ទឹងត្រង់ ខេត្តកំពង់ចាម បានលើកឡើងថា ករណីនេះប៉ូលីសនគរបាលរដ្ឋបាលឃុំខ្ពបតាងួន ហាក់បីដូចជាមិនអើពើចំពោះករណីនេះនោះទេ ជាពិសេសលោក ឯម វឌ្ឍនា អធិការនគរបាលស្រុកស្ទឹងត្រង់នេះតែម្តង គឺបណ្តែតបណ្ដោយខ្លាំងមែនទែន។

ប្រជាពលរដ្ឋជាច្រើនសូមសំណូមពរទៅកាន់កងកម្លាំងកងរាជអាវុធហត្ថខេត្តកំពង់ចាម ដែលមានលោកឧត្តមសេនីយ៍ត្រី ថេង ឆេងលីម មេបញ្ជាការ នៃបញ្ជាការដ្ឋានកងរាជអាវុធហត្ថខេត្តកំពង់ចាម សូមមេត្តាជួយដឹកនាំកម្លាំងចុះបង្ក្រាបទីតាំងល្បែងស៊ីសងខុសច្បាប់ខាងលើនេះផង៕