មន្ទីរសាធារណការខេត្តព្រះវិហារពន្លឿនការសាងសង់ផ្លូវឡើងទៅកាន់រម្មណីយដ្ឋានភ្នំត្បែង
មន្ទីរសាធារណការខេត្តព្រះវិហារកំពុងខិតខំពន្លឿននៃការសាងសង់ផ្លូវឡើងទៅកាន់រម្មណីយដ្ឋានភ្នំត្បែងដើម្បីសម្រួលដល់ការធ្វើដំណើររបស់ភ្ញៀវទេសចរនិងបង្កភាពងាយស្រួលដល់ប្រជាពលរដ្ឋក្នុងការដឹកជញ្ជូនកសិកផលផ្សេងៗ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូន ខេត្តព្រះវិហារមានប្រសាសន៍ប្រាប់វិទ្យុជាតិកម្ពុជាអោយដឹងថា ការកសាងផ្លូវឆ្ពោះទៅកាន់ភ្នំត្បែងត្រង់ចំនុចផ្លូវបំបែកផ្លូវជាតិលេខ៦២ រហូតដល់កន្លែងឡើងភ្នំត្បែងដែលស្ថាបនាដោយការចាក់ក្រាលកៅស៊ូ និងចាក់បេតុង ហើយផ្លូវមួយខ្សែនេះ ពិតជាមានសារៈសំខាន់បំផុតចំពោះប្រជាពលរដ្ឋ ក្នុងការសម្រួលជីវភាពរស់នៅប្រចាំថ្ងៃតាមការធ្វើដំណើរ ការដឹកកសិផលរបស់ខ្លួនទៅកាន់ទីផ្សារ ជាដើម ហើយអ្វីដែលពិសេសនោះផ្លូវមួយខ្សែនេះពិតជាមានសារៈសំខាន់បំផុតសម្រាប់វិស័យទេសចរណ៍ជាតិ។
«យើងបានចាក់កៅស៊ូពីផ្លូវជាតិលេខ៦២ទៅដល់ជើងភ្នំហើយកន្លែងខ្លះយើងក៏ចាក់បេតុងពីផ្លូវចូលទៅភ្នំត្បែងមានជ័យយើងហ្នឹងជាពិសេសឡើងទៅកន្លែងជាទីសក្ការៈបូជាគឺកន្លែងលោកឪសួងសច្ចំភ្នំត្បែងលើភ្នំនឹងទេសភាពស្អាតណាស់គឺថាមានព្រៃភ្នំនៅលើហ្នឹងហើយជាកន្លែងទីសក្ការៈហើយតំបន់ហ្នឹងបម្រើដល់វិស័យទេសចរណ៍បម្រើការដឹកកសិផលពីជើងភ្នំព្រះវិហារមកកាន់ទីតំបន់ប្រជុំជនខេត្តនិងសម្រួលការធ្វើដំណើររបស់បងប្អូនប្រជាពលរដ្ឋនៅជុំវិញតំបន់ហ្នឹង”។
លោកបានបន្តថា ការអភិវឌ្ឍនូវរាល់ហេឋារចនាសម្ព័ន្ធផ្លូវ ថ្នល់ លូទៅកាន់តំបន់ទេសចរណ៏ធម្មជាតិនេះ មិនត្រឹមតែទទួលបានភាពងាយស្រួល សោភ័ណ្ឌភាព និងទំនុកចិត្ត សម្រាប់ប្រជាពលរដ្ឋក្នុងការប្រកបរបរចិញ្ចឹមជីវិតប្រចាំថ្ងៃប៉ុនណ្ណោះទេតែវានិងជួយបង្កើនភាពទាក់ទាញភ្ញៀវទេសចរជាតិ អន្តរជាតិអោយចូលទស្សនាតំបន់ដែលមានទីសក្ការៈបូជាដ៏ស័កិ្កសិទ្ធមានទឹកធ្លាក់ធម្មជាតិដ៏ល្អឯក មានព្រៃភ្នំយ៉ាងខៀវស្រងាត់មិនចេះរីងស្ងួតគ្រប់រដូវការនេះកាន់តែច្រើនបន្ថែមទៀតនៅពេលជំងឺឆ្លងកូវីដ-១៩បញ្ចប់។
គួរបញ្ជាក់ថា មកដល់ពេលនេះផ្លូវឆ្ពោះទៅកាន់សហគមន៍ភ្នំត្បែងនេះបានស្ថាបនាបានប្រមាណជាង៨០ភាគរយហើយ យ៉ាងណាមិញមន្ទីរសាធារណការ និងដឹកជញ្ជូនខេត្តព្រះវិហារបានសាងសង់ស្ថាបនាផ្លូវប្រកបដោយស្តង់ដារ ការពង្រឹងគុណភាព ដោយមានការដាក់ស្លាកសញ្ញាចរាចរណ៍ ការដាក់ទ្រូងផ្លូវនៅចំកណ្តាលធ្វើអោយមានការងាយស្រួលក្នុងការបើកបរ និងឆ្លងកាត់ មានបំពាក់ភ្លើងបំភ្លឺផ្លូវជាដើមដោយធ្វើយ៉ាងណារក្សាសុវត្ថិភាពជូនប្រជាពលរដ្ឋ៕