ភាពអសកម្ម របស់ចៅហ្វាយស្រុកពញាឮ លោក ថន សុវណ្ណា ធ្វើឱ្យក្រុមជនមានអំណាចទឹកលុយ ចាក់ដីលុប ប្លន់យកឆ្នេរទន្លេ បានដោយយ៉ាងស្រួល

តាមព័ត៌មានជាក់ស្តែងឆ្នេរទន្លេជម្រៅច្រើនម៉ែត្រត្រង់ចំណុចភូមិពោធិ៍មង្គល ឃុំព្រែកតាទែន ស្រុកពញាឮ ខេត្តកណ្តាល កំពុងបានចាក់ដីលុបដោយខុសច្បាប់ ដើម្បីប្លន់យកជាកម្មសិទ្ធិ ដែលប្រព្រឹត្តដោយជនមានអំណាចទឹកលុយ និងបក្ខពួកមួយក្តាប់តូច។

ករណីខាងលើនេះ នាយករដ្ឋបាលនៃសាលាស្រុកពញាឮ លោក ទឹម ចរិយា បានឲ្យសារព័ត៌មានដឹងនាព្រឹកថ្ងៃទី០៨ មីនា នេះថា «ទីតាំងចាក់ដីចូលទន្លេនេះ រដ្ឋបាលស្រុកបានធ្វើការហាមឃាត់មិនឱ្យបន្តសកម្មភាពទៀតនោះទេ! រីឯការអនុវត្តវិធានការផ្លូវច្បាប់ គឺ ទុកឲ្យលោកចៅហ្វាយស្រុក ជាអ្នកសម្រេច ព្រោះជាតួនាទីរបស់ចៅហ្វាយស្រុក។

ចៅហ្វាយស្រុកពញាឮ ខេត្តកណ្តាល លោក ថន សុវណ្ណា បានប្រាប់សារព័ត៌មាននាថ្ងៃដដែលនេះថា «ករណីចាក់ដីខុសច្បាប់ ចូលទន្លេ ត្រង់ចំណុចទីតាំងខាងលើពិតជាបានហាមឃាត់មិនឱ្យម្ចាស់ទីតាំងធ្វើសកម្មភាពចាក់ដីបន្ត! ចំណែកឯវិធានការផ្លូវច្បាប់ និងការតម្រូវឱ្យម្ចាស់ទីតាំងកាយដីចេញពីទន្លេវិញគឺមិនមាននោះទេ! ពោលគឺ (ចាក់ដីចូលបានត្រឹមណាទុកត្រឹមនោះ)។

លោកចៅហ្វាយស្រុក ថន សុវណ្ណា ដដែលរូបនេះ ក៏បានបញ្ជាក់ឲ្យដឹងទៀតថា «បច្ចុប្បន្ននេះរដ្ឋបាលស្រុកគឺទុក ឱកាសឱ្យម្ចាស់ទីតាំង ដែលបានចាក់ដីលុបចូលទន្លេ ទៅធ្វើការងារសុំច្បាប់អនុញ្ញាតពីក្រសួងមន្ទីរជំនាញពាក់ព័ន្ធ ដើម្បីទទួលបានសិទ្ធក្នុងការចាក់ដីលុបបន្តទៀត»។

ករណីខាងលើនេះសាធារណៈមតិបានចាត់ទុកថា ជា ភាពអសកម្មរបស់រដ្ឋបាលស្រុកពញាឮ ដឹកនាំដោយលោក ថន សុវណ្ណា ប្រធានគណបញ្ជាការឯកភាព ដែលគ្មានសមត្ថភាពក្នុងការគ្រប់គ្រងដែនច្បាប់របស់ខ្លួន និងបានបណ្តែតបណ្ដោយឲ្យជនមួយក្តាប់តូច ដែលមានអំណាចទឹកលុយចាក់ដី លុបប្លន់យកឆ្នេរទន្លេជាលក្ខណៈចំហ ដោយស្នើឱ្យ អភិបាលខេត្តកណ្តាល ឯកឧត្តម គួច ចំរើន និងថ្នាក់ដឹកនាំក្រសួងធនធានទឹកនិងឧតុនិយម ចាត់វិធានការតាមផ្លូវច្បាប់ជាបន្ទាន់៕