ក្រសួងព័ត៌មានណែនាំឱ្យរៀបចំសិក្ខាសាលា ស្ដីពីបច្ចេកទេសនៅក្នុងការផ្ទៀងផ្ទាត់ប្រភពព័ត៌មាន

ក្រសួងព័ត៌មានណែនាំឱ្យរៀបចំសិក្ខាសាលា ស្ដីពីបច្ចេកទេសនៅក្នុងការផ្ទៀងផ្ទាត់ប្រភពព័ត៌មាន

ភ្នំពេញ៖ ឯកឧត្ដម ខៀវ កាញារឹទ្ឋ រដ្ឋមន្ត្រីក្រសួងព័ត៌មានបានណែនាំគណៈកម្មការទំនាក់ទំនងនិងសម្របសម្រួលកិច្ចការប្រតិបត្តិការអន្តរជាតិ ត្រូវរៀបចំសិក្ខាសាលា ស្ដីពីបច្ចេកទេសនៅក្នុងការផ្ទៀងផ្ទាត់ប្រភពព័ត៌មានជាមួយនឹងមន្ទីររាជធានីព័ត៌មានខេត្ត ដើម្បីបង្កើនសមត្ថភាព លើជំនាញផ្ទៀងផ្ទាត់ព័ត៌មាន ឈានទៅលុបបំបាត់ព័ត៌មានក្លែងក្លាយបានទាន់ពេលវេលា។

ឯកឧត្តម មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបញ្ជាក់ថា ក្នុងឱកាសកិច្ចប្រជុំប្រចាំសប្តាហ៍ដោយផ្ទាល់ និងតាមរយៈប្រព័ន្ធវីដេអូ ជាមួយថ្នាក់ដឹកនាំ និងអគ្គនាយកនៃអគ្គនាយកដ្ឋានទាំង៥ របស់ក្រសួងព័ត៌មាន ដើម្បីពិនិត្យការងារដែលបាន អនុវត្តកន្លងមក និងពិភាក្សាការងារ នៅព្រឹកថ្ងៃទី២៦ ខែកក្កដា ឆ្នាំ២០២១ នាទីស្តីការក្រសួងព័ត៌មាន ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន បានផ្ដល់អនុសាសន៍ណែនាំដល់គណៈកម្មការ ក៏ដូចជាអគ្គនាយកដ្ឋានជំនាញមួយចំនួន ដើម្បីអនុវត្តការងាររបស់ខ្លួន ឲ្យកាន់តែមានប្រសិទ្ធភាពនិងប្រសិទ្ធផលខ្ពស់។

ឯកឧត្តម បានបន្ដថា ក្នុងឱកាសកិច្ចប្រជុំនេះដែរ ឯកឧត្តមរដ្ឋមន្ត្រីលោកបានណែនាំទៅដល់គណៈកម្មការទំនាក់ទំនង និងសម្របសម្រួល កិច្ចការប្រតិបត្តិការអន្តរជាតិនៃក្រសួងព័ត៌មាន ត្រូវរៀបចំនូវសិក្ខាសាលាផ្សព្វផ្សាយអំពីរបៀបរបបនិងបច្ចេកទេសផ្ទៀងផ្ទាត់ ប្រភពព័ត៌មាន ជូនដល់មន្រ្តីនៃមន្ទីរព័ត៌មាន ខេត្ត រាជធានី ទាំង ២៥ តាមរយ:បទ ពិសោធន៍ដែលទទួលបានពីសិក្ខាសាលា ជាមួយ ទីភ្នាក់ងារសារព័ត៌មាន រុស្ស៊ី Sputnik សហការជាមួយក្រសួងព័ត៌មានកម្ពុជា ក្រោមប្រធានបទ “ស្តីពីរបៀប ផ្ទៀងផ្ទាត់ព័ត៌មានលើ បណ្តាញផ្សព្វផ្សាយប្រភេទថ្មី ដើម្បីបញ្ចៀសនូវដំណឹងក្លែងក្លាយ” ។

សំឡេង៖ «ក្នុងនោះឯកឧត្តមរដ្ឋមន្ត្រីលោកបានណែនាំទៅដល់គណៈកម្មការទំនាក់ទំនងនិងសម្របសម្រួលកិច្ចការប្រតិបត្តិការអន្តរជាតិ ធ្វើយ៉ាងណារៀបចំនូវសិក្ខាសាលាផ្សព្វផ្សាយមួយអំពីរបៀបរបប ក៏ដូចជាបច្ចេកទេសនៅក្នុងការផ្ទៀងផ្ទាត់ នូវប្រភពព័ត៌មានជាមួយនឹង មន្ទីររាជធានីព័ត៌មានខេត្តទាំង២៥រាជធានីខេត្ត តាមរយៈសិក្ខាសាលា តាមរយៈការទទួលបានលទ្ធផល ពីសិក្ខាសាលាជាមួយនឹងអង្គភាព សារព័ត៌មាន Sputnik នៃប្រទេសរុស្ស៊ី។

អ្នកនាំពាក្យក្រសួងព័ត៌មាន បានបន្ដថា ឯកឧត្តមរដ្ឋមន្ត្រីក៏បានណែនាំទៅដល់គណៈកម្មការសម្របសម្រួលកិច្ចសហប្រតិបត្តិការអន្តរជាតិ ត្រូវពិនិត្យនឹងបន្តពិភាក្សាការងារជាមួយនឹងសមភាគីចិនខាងយូណាន់ ដើម្បីបន្តពិនិត្យនិងពិភាក្សាអំពីវឌ្ឍនភាពនៅក្នុងការ ត្រៀមរៀបចំ វេទិកាធុរកិច្ចកម្ពុជាចិន ដែលគ្រោងនឹងធ្វើនៅចុងឆ្នាំ២០២១ នេះផងដែរ។ ឯកឧត្តម មាស សុភ័ណ្ឌ បញ្ជាក់ថា ដោយសារតែស្ថានភាព នៃការរីករាលដាលនៃជំងឺកូវីដ១៩ពេលបច្ចុប្បន្ន មិនទាន់មានភាពច្បាស់លាស់ថាតើនឹងត្រូវអនុវត្តយ៉ាងម៉េច ឯកឧត្តមរដ្ឋមន្ត្រី ក៏ណែនាំ ឲ្យគណៈកម្មការសម្របសម្រួលអន្តរជាតិនេះបន្តពិភាក្សាឲ្យបានលម្អិតជាមួយនឹងសមភាគីចិនខាងយូណាន់ ដើម្បីពិនិត្យលទ្ធភាពនៅក្នុង ការរៀបចំនេះផងដែរ៕