កម្លាំងសមត្ថកិច្ចខេត្តបន្ទាយមានជ័យ បង្រ្កាបនៅទីតាំងស្តុកសាច់ជ្រូក ដែលនាំមកពីប្រទេសថៃជាង២តោន

កម្លាំងសមត្ថកិច្ចខេត្តបន្ទាយមានជ័យ បង្រ្កាបនៅទីតាំងស្តុកសាច់ជ្រូក ដែលនាំមកពីប្រទេសថៃជាង២តោន

បន្ទាយមានជ័យ៖ កម្លាំងជំនាញអគ្គនាយកដ្ឋានសុខភាពសត្វ និងផលិតកម្មសត្វចុះបង្រ្កាបសាច់ជ្រូកកាប់ហើយចម្រុះចំនួន ២,១១៣គីឡូក្រាម ដែលនាំចូលមកពីប្រទេសថៃ តាមច្រកអន្តរជាតិប៉ោយប៉ែត ខេត្តបន្ទាយមានជ័យ នៅថ្ងៃទី១២ ខែកក្កដា ឆ្នាំ២០២១។

លោក តាន់ ផាន់ណារ៉ា ប្រតិភូរាជារដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាមកយកដ្ឋានសុខភាពសត្វ និងផលិតកម្មសត្វ បានប្រាប់អ្នកយកព័ត៌មានឱ្យដឹងថា៖ ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយក្រុមការងារអន្តរាគមន៍បង្ក្រាបបទល្មើសចរាចរសត្វ ផលិតកម្មនិងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទ ខេត្តបន្ទាយមានជ័យ ក្នុងនោះដោយមានការចូលរួមដោយលោក កើត វណ្ណារ៉េត អយ្យការអមសាលាដំបូងខេត្តបន្ទាយមានជ័យ បានចុះត្រួតពិនិត្យទីតាំងស្តុបសាច់ជ្រូកកាប់ចម្រុះមួយកន្លែងស្ថិតនៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានរកឃើញសាច់ និងគ្រឿងក្នុងសត្វជ្រូកចំនួនជាង២តោន ស្មើនឹង ២,១១៣គីឡូក្រាម។

សាច់ជ្រូកចម្រុះកាប់ហើយទាំងនោះមានដូចជា៖ ក្បាលជ្រូក៦ក្បាល ស្មើ ២៨គីឡូក្រាម, ជើងចំនួន ១១៣ថង់ ស្មើ ៥៦៤គីឡូក្រាម, ពោះវៀន ចំនួន ៧២ថង់ ស្មើ ២៨៨គីឡូក្រាម, បេះដូង ចំនួន ៣៣ថង់ ស្មើ ១១៥គីឡូក្រាម, ក្រពះ ចំនួន ៤៥០គីឡូក្រាម, គ្រឿងក្នុងលាយក្បាល ចំនួន ១៩បាវ ស្មើ ៥៣២គីឡូក្រាម, និងសាច់លាយឣណ្ដាត ចំនួន ៣៩ថង់ ស្មើ ១៣៦គីឡូក្រាម។

សាច់ជ្រូកទាំងនោះបាននាំចូលមកពីប្រទេសថៃ តាមច្រកអន្តរជាតិប៉ោយប៉ែត ខេត្តបន្ទាយមានជ័យ សម្រាប់ចែកចាយបន្តតាមបណ្តាលខេត្តផ្សេងៗ ពុំមានលិខិតអនុញ្ញាតពីក្រសួងកសិកម្ម រុក្ខាប្រមាញ់ និងនេសាទ។

ចំណែកម្ចាស់សាច់ជ្រូកកាប់ចម្រុះមានឈ្មោះ ទេព សុភាព ភេទប្រុស អាយុ៥២ឆ្នាំ មានទីលំនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

លោក តាន់ ផាន់ណារ៉ា បានបញ្ជាក់ឱ្យដឹងបន្តទៀតថា៖ ក្រុមការងារបានបញ្ជូនវត្ថុតាងបទល្មើសខាងលើនេះទៅរក្សាទុកនៅមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ដើម្បីចាត់ការទៅតាមនីតិវិធីច្បាប់៕