ឃាត់ខ្លួន អធិការរងនគរបាល ខណ្ឌដង្កោ ពាក់ព័ន្ធករណី ដកកាំភ្លេីងបាញ់គំរាម ប្រជាពលរដ្ឋ នៅ ខណ្ឌកំបូល

កម្លាំងសមត្ថកិច្ចនគរបាលខណ្ឌកំបូល នៃស្នងការដ្ឋាននគរបាលរាជធានីភ្នំពេញ បានធ្វើការឃាត់ខ្លួន អធិការរង ម្នាក់ នៃអធិការដ្ឋាននគរបាលខណ្ឌដង្កោ បន្ទាប់ពីរអធិការរងរូបនោះ បានដកកាំភ្លេីងបាញ់មេឃមួយគ្រាប់ ដេីម្បីគំរាមប្រជាពលរដ្ឋ។

ហេតុការណ៍នេះបានបង្កឱ្យមានការភ្ញាក់ផ្អេីលកាលពីវេលាម៉ោង១០យប់ ថ្ងៃទី៣០ ខែមិថុនា ឆ្នាំ២០២៥ ស្ថិតនៅតាមបណ្ដោយផ្លូវបេតុង ក្នុងភូមិកន្ទោកជេីង សង្កាត់កន្ទោក ខណ្ឌកំបូល រាជធានីភ្នំពេញ។

យោងតាមយុវជនម្នាក់បានអះអាងថា បុរសម្នាក់បានអង្គុយផឹកស៉ីនៅផ្ទះក្បែរហាងរបស់ខ្លួន ហេីយបានដកកាំភ្លេីង បាញ់ឡេីងលេី ចំនួនមួយគ្រាប់ ដេីម្បីគំរាមរូបខ្លួន បន្ទាប់ពីជិះម៉ូតូកាត់កន្លែងគាត់ផឹកស៉ី ហេីយបានចោទប្រកាន់រូបខ្លួនថាជិះម៉ូតូលឿនក្នុងភូមិ។

ជនសង្ស័យដែលដកកាំភ្លើងបាញ់គំរាមប្រជាពលរដ្ឋនោះ ត្រូវបានគេស្គាល់ថា ជាកម្លាំងសមត្ថកិច្ច  តួនាទីអធិការរង ទទួលបន្ទុកផ្នែកគ្រឿងញៀន នៃអធិការដ្ឋាននគរបាលខណ្ឌដង្កោ ឈ្មោះ ទូច សេងហ៊។

បច្ចុប្បន្នជនសង្ស័យ ដែលមានតួនាទីជាមន្ត្រីនគរបាល ត្រូវបានកម្លាំងសមត្ថកិច្ចនគរបាលឃាត់ខ្លួន បញ្ជូនទៅកាន់អធិការដ្ឋានខណ្ឌកំបូល និងកំពុងសួរនាំដេីម្បីចាត់ការតាមនីតិវិធី៕