ទីតាំងល្បែងស៊ីសងខុសច្បាប់ ជ្រកកោនក្រោមផ្លាកយីហោ «អាយីកាហ្វេ» កំពុងតែប្រមូលផ្តុំគ្នាលេងយ៉ាងគឃ្លើន

ទីតាំងល្បែងស៊ីសងខុសច្បាប់ ជ្រកកោនក្រោមផ្លាកយីហោ «អាយីកាហ្វេ» កំពុងតែប្រមូលផ្តុំគ្នាលេងយ៉ាងគឃ្លើន

ភ្នំពេញ៖ ទីតាំងល្បែងស៊ីសង «មាន់ជល់ហាយឡាយ បៀរ ការ៉ាត និង អាប៉ោង ប្រភេទកាស៊ីណូអនឡាញ» កំពុងតែប្រមូលផ្ដុំគ្នាលេងយ៉ាងគឃ្លើន ត្រង់ចំណុចផ្ទះលក់កាហ្វេ ដែលមានផ្លាកយីហោ «អាយីកាហ្វេ» នៅក្នុងបូរីរុងរឿង ភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ។

តាមប្រភពច្បាស់ការបានបញ្ជាក់ថា៖ ទីតាំងខាងលើនេះបានបើកដំណើរការធម្មតា ទោះបីជាកន្លងមកធ្លាប់បានអាជ្ញាធរមានសមត្ថកិច្ច ហៅប្រមាន និងធ្វើកិច្ចសន្យាជាច្រើនដងក៏ដោយ ក៏ម្ចាស់ទីតាំងខាងនៅតែបន្តលេងដោយរលូន ពោលគឺ៖ គ្មានខ្លាចញញើតសមត្ថកិច្ចបន្តិចសោះឡើយ។

ប្រភពដដែលបានបន្តទៀតថា៖ ម្ចាស់ទីតាំងហាងកាហ្វេ បង្គប់ល្បែងស៊ីសងខាងលើមានឈ្មោះ ឡេង ភេទប្រុស ដែលបានបើកលេងជារៀងរាល់ថ្ងៃ! ដោយមិនដឹងថាបុគ្គលម្នាក់នេះមានអំណាចពិសេសអ្វី? ទើបមិនខ្លាចរអាសមត្ថកិច្ចមូលដ្ឋាន?

ពាក់ព័ន្ធទៅនឹងករណីខាងលើនេះប្រជាពលរដ្ឋ សុំសំណូមពរដល់លោក ម៉ន វុធី អធិការនគរបាលខណ្ឌពោធិ៍សែនជ័យ មេត្តាជួយបញ្ជាកម្លាំងសមត្ថកិច្ចជំនាញចុះមកបង្ក្រាបទីតាំងនេះជាថ្មី ម្តងទៀតផងទាន៕