ឯកឧត្តម អ៊ុន ចាន់ដា អញ្ជើញចុះសួរសុខទុក្ខ និងនាំយកអំណោយផ្តល់ជូនមន្ត្រីរាជការ ដែលកំពុងធ្វើចត្តាឡីស័ក នៅតាមមន្ទីរ-អង្គភាព

ឯកឧត្តម អ៊ុន ចាន់ដា អញ្ជើញចុះសួរសុខទុក្ខ និងនាំយកអំណោយផ្តល់ជូនមន្ត្រីរាជការ ដែលកំពុងធ្វើចត្តាឡីស័ក នៅតាមមន្ទីរ-អង្គភាព

កំពង់ចាម៖ នៅព្រឹកថ្ងៃទី០៣ ខែសីហា ឆ្នាំ២០២១នេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ អមដំណើរដោយអភិបាលរងខេត្ត នាយករដ្ឋបាល និងមន្ត្រីពាក់ព័ន្ធ អញ្ជើញចុះសួរសុខទុក្ខ និងនាំយកអំណោយរបស់រដ្ឋបាលខេត្ត ផ្តល់ជូនថ្នាក់ដឹកនាំ និងមន្រ្តីរាជការ នៃមន្ទីរចំនួនបី រួមមាន៖ មន្ទីរផែនការ-មន្ទីរទេសចរណ៍ និងមន្ទីរពាណិជ្ជកម្ម ដែលពួកគេកំពុងធ្វើចត្តាឡីស័កនៅតាមមន្ទីររាងៗខ្លួន បន្ទាប់ពីបានប៉ះពាល់ដោយផ្ទាល់ និងប្រយោលជាមួយនឹងអ្នកវិជ្ជមានកូវីដ-១៩។

ឯកឧត្តម អភិបាលខេត្ត បានគូសបញ្ចាក់ថា៖ ផ្អែកលើស្ថានការណ៍នៃការឆ្លងរាលដាលនៃជំងឺកូវីដ-១៩ ជាពិសេសមេរោគបម្លែងថ្មី ប្រភេទ ដែលតា (Delta) ដែលកំពុងមានសន្ទុះខ្លាំងនៅប្រទេសជិតខាង និងបានរាលដាលមកដល់ខេត្តមួយចំនួនដែលនៅជាប់ព្រំដែនជាមួយនឹងប្រទេសកម្ពុជា ក្នុងនោះខេត្តកំពង់ចាមយើងនាពេលថ្មីៗនេះក៏បានរកឃើញមេរោគបំលែងថ្មី ចំនួន០៣ នាក់ផងដែរ។

ក្នុងឱកាសនោះ ឯកឧត្តម អភិបាលខេត្ត បានស្នើដល់ថ្នាក់ដឹកនាំ និងមន្ត្រីទាំងបីមន្ទីរខាងលើដែលបានប៉ះពាល់ផ្ទាល់ ឬប្រយោលជាមួយនឹងអ្នកវិជ្ជមានកូវីដ-១៩ សូមថែរក្សាសុខភាពឲ្យបានល្អ ទាំងការស្នាក់នៅ ហូបចុក ជាពិសេសការហាត់ប្រាណឲ្យបានទៀងទាត់ និងត្រូវចូលរួមអនុវត្តនូវវិធានការអនាម័យតាមការណែនាំរបស់ក្រសួងសុខាភិបាល ក៏ដូចជាវិធានការ «៣កុំ និង ៣ការពារ» ដើម្បីជៀសផុតពីជំងឺដ៏កំណាចមួយនេះ។

អំណោយដែលរដ្ឋបាលខេត្ត ផ្តល់ជូនដល់ថ្នាក់ដឹកនាំ និងមន្ត្រីរាជការទាំងបីមន្ទីរខាងលើសរុប ៦៩នាក់ ដោយក្នុងម្នាក់ៗទទួលបាន៖

-អង្ករ ២៥គក្រ, មី ១កេស
-ទឹកបរិសុទ្ធ ១០កេស (សម្រាប់ ១មន្ទីរ)
-ជែល ១កេស (សម្រាប់ ១មន្ទីរ)
-ម៉ាស ១,០០០ម៉ាស (សម្រាប់ ១មន្ទីរ)៕

សូមចូលរួមទប់ស្កាត់រាល់ការឆ្លងរីករាលដាលនៃជំងឺកូវីដ១៩ ដោយប្រកាន់ខ្ជាប់នូវវិធានការ «៣កុំ និង ៣ការពារ»។