តើលោក «ជូ ឈិត» ជានរណា មានអំណាចអ្វី បានជាហ៊ានទន្ទ្រានយកភ្នំ មកធ្វើជាដីកម្មសិទ្ធិរបស់ខ្លួន បានដោយរលូនបែបនេះ_វគ្គ២

 តើលោក «ជូ ឈិត» ជានរណា មានអំណាចអ្វី បានជាហ៊ានទន្ទ្រានយកភ្នំ មកធ្វើជាដីកម្មសិទ្ធិរបស់ខ្លួន បានដោយរលូនបែបនេះ_វគ្គ២

ផ្សាយចេញនៅថ្ងៃទី២៦ ខែកញ្ញា ឆ្នាំ២០២១

ខេត្តតាកែវ៖ បរិវេណនៃតំបន់ដីភ្នំ រាប់សិបហិចតា ស្ថិតនៅស្រែជើងរាស្ត្រ ភូមិបុស្សតាផង់ ឃុំត្រពាំងក្រញូង ស្រុកត្រាំកក់ ខេត្តតាកែវ ត្រូវបានបុគ្គលឈ្មោះ ជូ ឈិត និងបក្សពួកមួយក្ដាប់តូច នាំគ្នាទន្ទ្រានយកមកធ្វើជាកម្មសិទ្ធិរបស់បក្សពួកខ្លួន យ៉ាងរំភើយ រហូតដល់ពេលនេះ អាជ្ញាធរពាក់ព័ន្ធ មិនទាន់ចាត់វិធានការទប់ស្កាត់លើបក្សពួកខិលខូចទាំងនោះ យកមកផ្តន្ទាទោសតាមច្បាប់។

យោងតាមរូបភាពជាក់ស្តែង ដែលក្រុមការងារសារព័ត៌មានយើងចុះទៅដល់បរិវេណតំបន់ដីភ្នំ បានសន្មត់ឲ្យដឹងថា៖ មានបុគ្គលឈ្មោះ ជូ ឈិត និងបក្សពួកខិលខូចមួយចំនួនតូច បាននាំគ្នាទន្ទ្រានយកដីតំបន់ភ្នំ ដែលជាសម្បត្តិរបស់រដ្ឋ យកមកធ្វើជាកម្មសិទ្ធិផ្ទាល់ខ្លួន ដោយបានធ្វើការដាំរបងហ៊ុមព័ទ្ធជុំវិញភ្នំ សង់ជាក្រចុះ និងធ្វើផ្ទះ លើកំពូលភ្នំ បានដោយរលូន និងគ្មានខ្លាចញញើតច្បាប់បន្តិចសោះឡើយ។

មហាជនជាច្រើន បានមានការងឿងឆ្ងល់ និងចោទជាសំណួរថា៖ តើ..? លោក ជូ ឈិត ជានរណា មានអំណាចអ្វី បានជាហ៊ានទន្ទ្រានយកភ្នំ មកធ្វើជាដីកម្មសិទ្ធិរបស់ខ្លួន បានដោយរលូនបែបនេះ។

ចំណែកឯ មន្ត្រីថ្នាក់ក្រោម ដែលពាក់ព័ន្ធ ហាក់បីដូចជាគ្មានចំណាត់ការទប់ស្កាត់ចំពោះក្រុមខិលខូចទាំងនោះសោះឡើយ.! ដោយមិនដឹងថា បក្សពួកខិលខូចទាំងនោះមានអំណាចអ្វី ទើបបានជាមន្ត្រីថ្នាក់ក្រោម ក្នុងមូលដ្ឋាន មិនហ៊ានមានវិធានការទប់ស្កាត់។

មហាជន រួមទាំងអ្នកសារព័ត៌មានក្នុងស្រុកជាច្រើន កំពុងរង់ចាំមើលចំណាត់ការណ៍លោក អ៊ូច ភា អភិបាលខេត្តតាកែវ និងក្រសួងស្ថាប័នមន្ទីរពាក់ព័ន្ធ ចាត់វិធានការក្តៅទប់ស្កាត់ចំពោះលោក ជូ ឈិត ដែលហ៊ានយកដីភ្នំមកធ្វើជាកម្មសិទ្ធិផ្ទាល់ខ្លួន។

ជុំវិញការចុះផ្សាយខាងលើនេះ ក្រុមការងារសារព័ត៌មានយើង និងរង់ចាំការបំភ្លឺ ពីអាជ្ញាធរនិងស្ថាប័នពាក់ព័ន្ធរៀងរាល់ម៉ោងធ្វើការ៕ សូមអរគុណ!