ចាស់ជរា ៣៩៨នាក់ នៅក្រុងតាខ្មៅ បានទទួលអាវរងា និងភួយ ពីសាខាកាកបាទក្រហមកម្ពុជាខេត្តកណ្តាល

ចាស់ជរា ៣៩៨នាក់ នៅក្រុងតាខ្មៅ បានទទួលអាវរងា និងភួយ ពីសាខាកាកបាទក្រហមកម្ពុជាខេត្តកណ្តាល

ខេត្តកណ្ដាល៖ ចាស់ជរា ងាយរងគ្រោះមានជីវភាពខ្វះខាត ប្រមាណ៣៩៨នាក់ មកពីសង្កាត់ទាំង៦ ក្នុងក្រុងតាខ្មៅ ទទួលបានអាវរងា​ ​ភួយ​ ​និង​ស្បៀងអាហារ ពីសាខាកាកបាទក្រហម កម្ពុជា ខេត្តកណ្តាល ដើម្បីទុកប្រើប្រាស់ ទប់ទល់និងភាពត្រជាក់ នៅរដូវរងារ។

ថ្លែងក្នុងពិធី ចែកអំណោយ នាឱកាសនេះ ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល និងជាប្រធានគណៈកម្មាធិការសាខាកាកបាទក្រហមកម្ពុជា ខេត្ត បានបញ្ជាក់ថា៖ «ការចែក​អំណោយ​នេះ​ធ្វើឡើង​ដើម្បីឆ្លើយតប តាមការអំពាវនាវសម្ដេចតេជោ ហ៊ុន​ ​សែន​ ​នាយករដ្ឋមន្ត្រី​កម្ពុជា បានឱ្យអាជ្ញាធរ​ត្រូវយកចិត្តទុកដាក់​ ចំពោះ​ជន​ងាយ​រងគ្រោះ​ ក្នុង​ពេល​មាន​ធាតុអាកាសត្រជាក់ចូល​មកដល់​ ដើម្បី​រក្សា​ភាព​កក់ក្តៅ​ ​និង​សុវត្ថិភាព​ ក្នុង​ពេល​អាកាសធាតុ​ ចុះ​ត្រជាក់​»។​

ឯកឧត្តមអភិបាលខេត្ត បន្តថា៖ ការចែកអំណោយ អាវរងា ភួយ និងស្បៀងអាហារ នឹងបន្តចែកជូន នៅទូទាំងខេត្តកណ្ដាល ជាបន្តបន្ទាប់ទៀត ដើម្បីជួយសម្រាល ទុក្ខលំបាករបស់ប្រជាពលរដ្ឋ ក្នុងមូលដ្ឋាន នៅរដូវរងារ។

ឯកឧត្ដម អភិបាលខេត្ត បានអំពាវនាវដល់ប្រជាពលរដ្ឋ ត្រូវថែទាំសុខភាព ដោយរស់នៅស្អាត ហូបស្អាត ផឹកស្អាត មានអនាម័យជាប់ជាប្រចាំ និងត្រូវការពារនូវការឆ្លងនៃជំងឺកូវីដ-១៩ ដោយអនុវត្តអោយបានមុឺងម៉ាត់នូវវិធាន ការរបស់ក្រសួងសុខាភិបាល និងអនុវត្តតាមអនុសាសន៍ របស់សម្តេចប្រមុខរាជរដ្ឋាភិបាលគឺ ៣កុំ ៣ការពារ។

គួរបញ្ជាក់ថា៖ ចាស់ជរា ងាយរងគ្រោះខ្វះខាតជីវភាព ទទួលអំណោយពីសាខាកាកបាទក្រហម ខេត្តសរុប៣៩៨នាក់ ដែលក្នុងម្នាក់ៗ រួមមាន៖ភួយ១ ,អាវរងារ១,មី១កេស,ត្រីខ១យួរ,ជែលលាងដៃ១ដប,សាប៊ូ១ដុំ និងម៉ាស១០បន្ទះ៕