សាច់គោ និងសាច់ក្របីខុសច្បាប់ រាប់តោន បាននាំចូលមកពីប្រទេសវៀតណាម តាមច្រកទ្វារអន្តរជាតិភ្នំឌិន បានយ៉ាងរលូន

សាច់គោ និងសាច់ក្របីខុសច្បាប់ រាប់តោន បាននាំចូលមកពីប្រទេសវៀតណាម តាមច្រកទ្វារអន្តរជាតិភ្នំឌិន បានយ៉ាងរលូន

សាច់គោ សាច់ក្របីខុសច្បាប់ រាប់តោន ត្រូវបានឈ្មួញដឹកចេញពីច្រកអន្តរជាតិ កម្ពុជា-វៀតណាម ភ្នំឌិន ស្រុកគិរីវង់ ខេត្តតាកែវ បានយ៉ាងរលូន ដោយគ្មានការរំខានដល់មន្ត្រីពាក់ព័ន្ធ ដែលប្រចាំការនៅច្រកទ្វារ ព្រំដែនអន្តរជាតិភ្នំឌិន បន្តិចសោះឡើយ។

យោងតាមរបាយការណ៍៖ សមត្ថកិច្ចនៃស្នងការដ្ឋាននគរបាលខេត្តកណ្តាល កាលពីថ្ងៃទី១០ ខែធ្នូ ឆ្នាំ២០២១ ម្សិលមិញ បានឲ្យដឹងថា កម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្តកណ្ដាល បានដឹកនាំកម្លាំង សហការជាមួយមន្ត្រីជំនាញពាក់ព័ន្ធ ចុះបើកប្រតិបត្តិការដ៏ក្ដៅគគុក រហូតឈានដល់ការឃាត់រថយន្តមួយគ្រឿងម៉ាក SSANGYONG ពណ៌ ស ពាក់ស្លាកលេខ ភ្នំពេញ 2H-3680 នៅចំណុច ផ្លូវជាតិលេខ៣ ភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល ដែលបានដឹកសាច់គោនិងសាច់ក្របី ដែលនាំចូលមកពីប្រទេសវៀតណាម ដោយគ្មានច្បាប់អនុញ្ញាត តាមច្រកទ្វារអន្តរជាតិកម្ពុជាវៀតណាមភ្នំឌិន ស្រុកគិរីវង់ ខេត្តតាកែវ។

វត្ថុតាងដកហូតមួយចំនួនរួមមាន៖
១-រថយន្តមួយគ្រឿងម៉ាក SSANGYONG ពណ៌ស ពាក់ស្លាកលេខ ភ្នំពេញ 2H-3680។
២-សាច់គោ ម៉ាក AL-AMMAR ដាក់ប្រអប់ ក្រដាសពណ៌លឿង ចំនួន ៧៥ប្រអប់ ក្នុងមួយប្រអប់ចំនួន ២០គីឡូក្រាម ស្មើនឹង ១៥០០គីឡូក្រាម។
៣-សាច់ក្របី ម៉ាក BLACK GOLD ប្រអប់ក្រដាសពណ៌សចំនួន ៧៥ប្រអប់ ក្នុងមួយប្រអប់ចំនួន ២០គីឡូក្រាម ស្មើរនឹង ១៥០០គីឡូក្រាម។ ដោយសរុបសាច់គោនិងសាច់ក្របី ដែលនាំចូលដោយខុសច្បាប់ចំនួន១៥០ប្រអប់ ស្មើនឹង ៣០០០គីឡូក្រាម។

របាយការណ៍បានបញ្ជាក់ច្បាស់ថា៖ «សាច់គោ សាច់ក្របីខុសច្បាប់ខាងលើនេះគឺដឹកចេញពីច្រកទ្វារអន្តរជាតិកម្ពុជា-វៀតណាម ភ្នំឌិន»

មហាជនជាច្រើន បានលើកឡើងថា៖ «សាច់គោ សាច់ក្របី ដឹកជញ្ជូនចេញពីច្រកទ្វារព្រំដែនអន្តរជាតិភ្នំឌិន បានដោយរលូន សង្ស័យតែឈ្មួញ ហើយនិងមន្ត្រីច្រកទ្វារទាំងនោះ ជាអ្នកបើកភ្លើងខៀវឱ្យ» (ដូចចាស់បុរាណពោលថា៖ បើខ្មោចស្រុកមិនបើកដៃ ខ្មោចព្រៃក៏មិនហ៊ានចូលដែរ)។

មហាជនបានលើកឡើងទៀតថា៖ «នេះសំណាងហើយ ដែលកម្លាំងជំនាញនៃការិយាល័យនគរបាលប្រឆាំងបទល្មើសសេដ្ឋកិច្ចខេត្តកណ្ដាល ដែលដឹកនាំបញ្ជាផ្ទាល់ដោយលោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល ចុះបើកប្រតិបត្តិការ និងបង្ក្រាបបានទាន់ពេលវេលា»។

ពាក់ព័ន្ធទៅនឹងករណី ឈ្មួញដឹកសាច់គោ និងសាច់ក្របី ខុសច្បាប់រាប់តោន តាមច្រកទ្វារអន្តរជាតិ កម្ពុជា-វៀតណាម ភ្នំឌិន បានដោយរលូន និងគ្មានការរំខានដល់មន្ត្រីពាក់ព័ន្ធដែលប្រចាំការច្រកភ្នំឌិន អង្គភាពព័ត៌មានយើងមិនអាចសុំការបំភ្លឺពីមន្ត្រីគយប្រចាំតំបន់ និងមន្ត្រីពាក់ព័ន្ធណាមួយបាននោះទេ៕