បឹងធម្មជាតិ ក្នុងស្រុកកងមាស ខេត្តកំពង់ចាម ត្រូវបានឈ្មួញទុច្ចរិត ឃុបឃិតគ្នា លក់ដូរ ដោយរលូន ខណៈអាជ្ញាធរស្រុកមិនហ៊ានបរិយាយ_វគ្គ១

បឹងធម្មជាតិ ក្នុងស្រុកកងមាស ខេត្តកំពង់ចាម ត្រូវបានឈ្មួញទុច្ចរិត ឃុបឃិតគ្នា លក់ដូរ ដោយរលូន ខណៈអាជ្ញាធរស្រុកមិនហ៊ានបរិយាយ_វគ្គ១

ផ្សាយនៅថ្ងៃទី១៣ ខែកុម្ភៈ ឆ្នាំ២០២២ វេលាម៉ោង១១:៣៧នាទី

កំពង់ចាម៖ បឹងធម្មជាតិជាច្រើនកន្លែង «បឹងត្រាវតូច-បឹងត្រាវធំ-បឹងរោងរាំង និងបឹងផ្សេងទៀត» ស្ថិតនៅមូលដ្ឋាន ឃុំកងតាណឹង ឃុំរកាអារ ស្រុកកងមាស ខេត្តកំពង់ចាម កំពុងតែរង់ការបាត់បង់ជាបណ្តើរៗហើយ ខណៈដែលមានឈ្មួញទុច្ចរិត ឃុបឃិតគ្នាជាប្រព័ន្ធ កាត់ជ្វាលក់យ៉ាងគឃ្លើន ដោយគ្មានខ្លាចញញើតច្បាប់បន្តិចឡើយ។

ពលរដ្ឋទន់ខ្សោយជាច្រើន កំពុងតែមានការភ្ញាក់ផ្អើល  និងងើយឆ្លល់យ៉ាងខ្លាំង ចំពោះទង្វើ និងសកម្មភាព លក់ដូរ បឹងធម្មជាតិ ដែលជាសម្បត្តិរដ្ឋ តាំងពីបុរមបុរាណ ដែលប្រព្រឹត្តដោយឈ្មួញ ឃុបឃិតគ្នា នឹងគ្មានការរំខានដល់អាជ្ញាធរពាក់ព័ន្ធ។

ចំណែកលោក ភោគ សាវុធ អភិបាលស្រុកកងមាស ខាងសារព័ត៌មានយើងមិនអាចសុំការបំភ្លឺបានទេ ព្រោះពេលដែលទូរស័ព្ទខលចូល គ្រាន់តែលឺពីសំណួរ ពាក់ព័ន្ធទៅនឹងការទិញលក់ដីបឹងធម្មជាតិ លោកឆ្លើយថារវល់ នឹងដេញឱ្យទៅសួរខាងបរិស្ថានវិញ។

ក្នុងនាមជាអភិបាលស្រុក ជាអាណាព្យាបាល របស់ប្រជាពលរដ្ឋ បែរជាបញ្ចេញនូវអាកប្បកិរិយាគេចវេស ហាក់បីដូចជាមិនមានភាពទទួលខុសត្រូវ ចំពោះសកម្មភាព និងទង្វើ ដែលឈ្មួញទុច្ចរិត ឃុបឃិតគ្នា ទន្ទ្រានយកដីបឹងធម្មជាតិរបស់រដ្ឋ លក់ដូរដោយអណាធិបតេយ្យ (តើឱ្យពលរដ្ឋសង្ឃឹមអ្វី)។

យ៉ាងមិញប្រជាពលរដ្ឋជាច្រើននៅតែទទួចស្នើសុំដល់ លោក ភោគ សាវុធ អភិបាលស្រុកកងមាស និងអាជ្ញាធរពាក់ព័ន្ធគ្រប់ស្ថាប័ន សូមមេត្តាចាត់មន្ត្រីជំនាញចុះស៊ើបអង្កេតអំពីករណីខាងលើផងទាន។

ជុំវិញការចុះផ្សាយខាងលើនេះអង្គភាពសារព័ត៌មានយើងនឹងរងចាំការបំភ្លឺពីអាជ្ញាធរពាក់ព័ន្ធរៀងរាល់ម៉ោងធ្វើការ៕ សូមអរគុណ!

ទំនាក់ទំនងការិយាល័យនិពន្ធ៖ 098906664/077906664