ស្រុកព្រះស្តេច៖ កាស៊ីណូគ្មានយីហោមួយកន្លែង កំពុងតែប្រមូលផ្ដុំពលរដ្ឋខ្មែរ មកពពាក់ពពូនគ្នា លេងល្បែងយ៉ាងគឃ្លើន សង្ស័យសមត្ថកិច្ចបើកដៃអោយ

ស្រុកព្រះស្តេច៖ កាស៊ីណូគ្មានយីហោមួយកន្លែង កំពុងតែប្រមូលផ្ដុំពលរដ្ឋខ្មែរ មកពពាក់ពពូនគ្នា លេងល្បែងយ៉ាងគឃ្លើន សង្ស័យសមត្ថកិច្ចបើកដៃអោយ

ផ្សាយនៅថ្ងៃទី២៧ ខែកុម្ភៈ ឆ្នាំ២០២២ វេលាម៉ោង១២:១១នាទី

ខេត្តព្រៃវែង៖ កាស៊ីណូ មួយកន្លែង ដែលគ្មានយីហោ ច្បាស់លាស់ ស្ថិតនៅក្នុងឃុំបន្ទាយចក្រី ស្រុកព្រះស្តេច ខេត្តព្រៃវែង ពេលនេះកំពុងតែប្រមូលផ្ដុំពលរដ្ឋខ្មែរ មកពពាក់ពពូនគ្នាលេងល្បែងស៊ីសង «ជល់មាន់ អាប៉ោង យូគឺ» យ៉ាងគឃ្លើន ដោយគ្មានសមត្ថកិច្ចពាក់ព័ន្ធណាម្នាក់ចាត់វិធានការបង្ក្រាបសោះឡើយ នេះហាក់ដូចជាបណ្តែតបណ្ដោយពេកហើយ។

ប្រភពពីពលរដ្ឋបានឲ្យដឹងថា៖ កាស៊ីណូ គ្មានយីហោ មួយកន្លែងនេះ បានបើកទទួលភ្ញៀវគ្រប់មជ្ឈដ្ឋាន ជាពិសេសគឺសម្បូរដោយប្រជាពលរដ្ឋខ្មែរ ចេញចូលយ៉ាងសស្រាក់សស្រាំ ដោយគ្មានការខ្លាចញញើតច្បាប់បន្តិចសោះឡើយ។

ប្រភពដដែលបន្តទៀតថា៖ មូលហេតុដែលបនល្បែង ក្នុងកាស៊ីណូ នេះ អាចបើកដំណើរការបានដោយរលូន និងគ្មានការបង្ក្រាប សង្ស័យតែអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋានជាអ្នកបើកដៃអោយ (ពោលគឺ៖ មានភាគហ៊ុនជាមួយម្ចាស់កាស៊ីណូ)។

ប្រជាពលរដ្ឋជាច្រើនបានបន្តត្អូញត្អែរថា៖ សព្វថ្ងៃនេះប្រទេសជាតិទទួលបាននូវសន្តិភាពពេញលេញ ក៏ប៉ុន្តែករណីលួច ឆក់ ប្លន់ នៅមិនទាន់លុបបំបាត់ទាំងស្រុងនោះទេ ព្រោះតែមានកាស៊ីណូដែលល្មើស មិនគោរពតាមច្បាប់នៃក្រសួងពាក់ព័ន្ធ នេះឯង។

ប្រជាពលរដ្ឋជាច្រើនសំណូមពរដល់លោក ព្រុំ សន្ធរ ស្នងការនគរបាលខេត្តព្រៃវែង សូមចេញបញ្ជាដល់លោក ជៃ សេងហ៊ាង អធិការស្រុកព្រះស្តេច ដឹកនាំកម្លាំងចុះបង្ក្រាបទីតាំងល្បែងស៊ីសងខុសច្បាប់ ដែលច្រកក្រោមកាស៊ីណូ គ្មានយីហោខាងលើនេះផងទាន។

ពលរដ្ឋស្នើដល់លោក ជា សុមេធី អភិបាលខេត្តព្រៃវែង សូមជួយចាត់មន្ត្រីជំនាញចុះពិនិត្យមើលអាជ្ញាប័ណ្ណអាជីវកម្មកាស៊ីណូ ដែលគ្មានយីហោខាងលើនេះដោយក្តីអនុគ្រោះ៕

ទាក់ទិនទៅនឹងខាងផ្សាយព័ត៌មានខាងលើនេះ អង្គភាពសារព័ត៌មានយើង រងចាំការបំភ្លឺពីម្ចាស់កាស៊ីណូ និងអាជ្ញាធរពាក់ព័ន្ធ រៀងរាល់ម៉ោងធ្វើការ។ សូមអរគុណ!

ទំនាក់ទំនងការិយាល័យនិពន្ធ៖077906664/098906664