រដ្ឋមន្ត្រីក្រសួងព័ត៌មាន៖ ជនពិការក៏មានសមត្ថភាពក្នុងការបំពេញការងារដូចមនុស្សធម្មតាដែរ កុំចាត់ទុកជនពិការជាបន្ទុករបស់សង្គមកជាតិ
រដ្ឋមន្ត្រីក្រសួងព័ត៌មាន៖ ជនពិការក៏មានសមត្ថភាពក្នុងការបំពេញការងារដូចមនុស្សធម្មតាដែរ កុំចាត់ទុកជនពិការជាបន្ទុករបស់សង្គមកជាតិ
ផ្សាយនៅថ្ងៃទី២៨ ខែមីនា ឆ្នាំ២០២២ វេលាម៉ោង០៩:០២នាទីឯកឧត្តម ខៀវ កាញារឹទ្ឋ រដ្ឋមន្ត្រីក្រសួងព័ត៌មាន ថ្លែងថា ជនពិការក៏មានសមត្ថភាពក្នុងការបំពេញការងារដូចមនុស្សធម្មតាដែរ ដូចនេះយើងពុំគួរចាត់ទុកជនពិការជាបន្ទុករបស់សង្គមជាតិទេ។
ឯកឧត្តមរដ្ឋមន្ត្រី ខៀវ កាញារីទ្ធ បានថ្លែងបែបនេះនៅក្នុងកម្មវិធីប្រឡងសំនៀងជនពិការកម្ពុជា ពានរង្វាន់សម្តេចអគ្គមហាសេបតីតេជោ ហ៊ុន សែន លើកទី២ កាលថ្ងៃទី២៦ ខែមីនា ឆ្នាំ២០២២។
ឯកឧត្តម រដ្ឋមន្ត្រីក្រសួងព័ត៌មាន បានមានប្រសាសន៍ថា កម្មវិធីប្រឡងសំនៀងជនពិការកម្ពុជានេះ គឺជាកម្មវិធីមួយដែលធ្វើឡើងក្នុងគោលបំណងបង្ហាញពីគោលនយោបាយ របស់រាជរដ្ឋាភិបាលកម្ពុជា ដែលជានិច្ចកាល សម្តេចតេជោនាយករដ្ឋមន្ត្រី តែងតែគាំទ្រលើកស្ទួយ និងយកចិត្តទុកដាក់ខ្ពស់ចំពោះជនពិការកម្ពុជា ដើម្បីធ្វើឱ្យជីវភាពរស់នៅរបស់ពួកគាត់ប្រកបដោយភាពសមរម្យនិងមានទឹកចិត្តស្នេហាជាតិមាតុភូមិដូចពលរដ្ឋទូទៅដែរ និងដើម្បីផ្តល់ឱកាសដល់ជនពិការកម្ពុជា បញ្ចេញនូវសមត្ថភាព និងទេពកោសល្យក្នុងវិថីសិល្បៈសំដៅឱ្យមហាជនទូទៅបានយល់ដឹង និងចាប់អារម្មណ៍ពីស្នាដៃរបស់ពួកគាត់លើវិស័យសិល្បៈ តន្ត្រី ចម្រៀងប្រពៃណី និងសម័យ។
ឯកឧត្តមរដ្ឋមន្ត្រី បន្ដថា ជនពិការពួកគាត់ក៏មានលទ្ធភាព ក្នុងការរស់នៅចិញ្ចឹម ជីវិតដោយខ្លួនឯង និងមានសមត្ថភាពក្នុងការបំពេញការងារដូចមនុស្សធម្មតាដែរ ដូចនេះយើងពុំគួរចាត់ទុកជនពិការជាបន្ទុករបស់សង្គមជាតិនោះទេ អ្វីដែលយើងទាំងអស់គ្នាត្រូវធ្វើ គឺជួយគាំទ្រ និងការពារពួកគាត់ ដើម្បីឱ្យពួកគាត់ទទួលបាននូវសិទ្ធិ សេរីភាពស្របច្បាប់។
ឯកឧត្តមបន្តទៀតថា ជនពិការមែនពិត តែចិត្តគំនិត និងឆន្ទៈរបស់ពួកគាត់មិនពិការឡើយ ពួកគាត់ក៏ជាធនធានមនុស្សដ៏សំខាន់សម្រាប់អភិវឌ្ឍន៍សេដ្ឋកិច្ច សង្គមជាតិ ដែលពុំអាចខ្វះបានផងដែរ៕
About កងមាស
No comments