ប្រទះឃើញបុរសចំណាស់វ័យ៦៥ឆ្នាំម្នាក់ ដេកស្លាប់នៅខ្ទមចាំស្រែរបស់អ្នកស្រុក

ប្រទះឃើញបុរសចំណាស់វ័យ៦៥ឆ្នាំម្នាក់ ដេកស្លាប់នៅខ្ទមចាំស្រែរបស់អ្នកស្រុក

ផ្សាយនៅថ្ងៃទី០៣ ខែមេសា ឆ្នាំ២០២២ វេលាម៉ោង១៨:១៥នាទី

បន្ទាយមានជ័យ៖ បុរសវ័យចំណាស់ម្នាក់ត្រូវបានគេប្រទះឃើញដេកស្លាប់ក្នុងខ្ទមចាំស្រែ នៅផ្លូវវាងក្រុងសិរីសោភ័ណ ក្នុងភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។

ហេតុការណ៍នេះបង្កការភ្ញាក់ផ្អើលនៅថ្ងៃទី០៣ ខែមេសា ឆ្នាំ២០២២ វេលាម៉ោង០៩:៣០នាទី នៅចំណុចទីតាំងខាងលើ សាកសពមិនស្គាល់អត្តសញ្ញាណជាមនុស្សអនាថាដេកស្លាប់នៅរោងចាំស្រែផ្លូវវាំងក្រុង មានភិនភាគរាង្គស្កូមខ្មៅ សក់កន្តាញ់ ស្លៀកខោយឺតព៌ណខ្មៅរហែក កំពស់ប្រហែល១,៦០ម៉ែត្រអាយុប្រហែល៦៥ឆ្នាំ។

តាមការសាកសួរបំភ្លឺ​របស់​ឈ្មោះ សុន តេង ភេទប្រុស អាយុ ៥៨ឆ្នាំ រស់នៅភូមិព្រហូត សង្កាត់អូរអំបិល ក្រុងសិរីសោភ័ណ និងឈ្មោះ ឆាត ឆេង ភេទប្រុស អាយុ ៥៥ឆ្នាំ រស់នៅភូមិអូរអំបិល សង្កាត់អូរអំបិល ជាអ្នកឃ្វាលគោនៅទីនេះជាប្រចាំបានអោយដឹងថាជនអនាថានេះមិនដឹងមកពីណាទេឃើញមកស្នាក់នៅរោងដែលគេធ្វើចាំស្រែនេះប្រហែល៤ថ្ងៃហើយ ធ្លាប់បានសុំទឹកខ្លួនផឹក ហើយនឹងសុំបារីជក់ ហើយតែងតែឃើញដើរទៅមកនៅជិតៗរោង មើលទៅមិនមានកម្លាំងក្នុងខ្លួនទេ ហើយក៏មិនដឹងបានហូបបាយឫអត់ដែល។

លុះដល់ព្រឹកថ្ងៃទី០៣ ខែមេសា ឆ្នាំ២០២២ វេលាម៉ោង ០៩:៣០នាទី ពេលដែលពួកគាត់ដេញគោមកឃ្វាលក៏ឃើញដេកស្លាប់នៅនឹងរោង ទើបពួកគាត់រាយការណ៍អោយសមត្ថកិច្ច។

តាមការបំភ្លឺរបស់ឈ្មោះ អីវ ឈីន ភេទស្រី អាយុ៥៥ឆ្នាំ រស់នៅចម្ងាយពីកន្លែងកើតហេតុប្រហែល២០០ម៉ែត្រ  ស្ថិតក្នុងភូមិក្បាលស្ពាន សង្កាត់ព្រះពន្លា បានអោយដឹងថាមនុស្សចាស់ម្នាក់នេះធ្លាប់ទៅសុំបាយគាត់ហូបចំនួន៣ថ្ងៃហើយទើបតែម្សិលមិញមិនឃើញទៅទេក្រោយមកទើបលឺដំណឹងថាស្លាប់។

សាកសពត្រូវបានសមត្ថកិច្ចជំនាញពិនិត្យកោសល្យវិច័យបានសន្និដ្ឋានថា​ សាកសពស្លាប់ដោយសារ​ខ្វះ​ជាតិ​ស្ករ​ មិនសូវបាន​ហូប​អាហារ​គ្រប់គ្រាន់ ពុំមានពាក់ព័ន្ទនឹងអំពេីឃាតកម្មរឺអត្តឃាតឡេីយ។ និងស្នើរសុំប្រគល់សាកសព អោយលោកមេភូមិរោងម៉ាស៊ីនយកទៅធ្វេីបុណ្យតាមប្រពៃណីនៅវត្តសុភមង្គល៕