ដេប៉ូខ្សាច់០៤ទីតាំង ត្រូវបានលោកអភិបាលរាជធានីភ្នំពេញបិទចោរ ដោយសារតែមិនស្ដាប់ការណែនាំ និងបង្កខូចផ្លូវជាតិធ្លាក់ខ្សាច់ បែកភក់ លើផ្លូវសាធារណៈនិងបង្ករអោយគ្រោះថ្នាក់អ្នកធ្វើដំណើរថែមទៀត

ដេប៉ូខ្សាច់០៤ទីតាំង ត្រូវបានលោកអភិបាលរាជធានីភ្នំពេញបិទចោរ ដោយសារតែមិនស្ដាប់ការណែនាំ និងបង្កខូចផ្លូវជាតិធ្លាក់ខ្សាច់ បែកភក់ លើផ្លូវសាធារណៈនិងបង្ករអោយគ្រោះថ្នាក់អ្នកធ្វើដំណើរថែមទៀត

ផ្សាយនៅថ្ងៃទី០៨ ខែសីហា ឆ្នាំ២០២២ វេលាម៉ោង២០:០៩នាទី

ភ្នំពេញ៖ អនុវត្តតាមបទបញ្ជារបស់ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ នាព្រឹកថ្ងៃទី០៨ ខែសីហា ឆ្នាំ២០២២នេះ លោកស៊ុយ សេរិទ្ធ អភិបាលរង នៃគណៈអភិបាលរាជធានីភ្នំពេញ រួមជាមួយនឹងលោក ពេជ្រ កែវមុនី អភិបាលខណ្ឌមានជ័យ បានចុះបិទដេប៉ូខ្សាច់ចំនួន០៤ទីតាំង នៅតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែក្រោម និងចាក់អង្រែលើ ខណ្ឌមានជ័យ។

អភិបាលរងលោក ស៊ុយ សេរិទ្ធ បានឱ្យដឹងថា៖ ការចុះបិទដេប៉ូខ្សាច់ចំនួន០៤ទីតាំងខាងលើនេះធ្វើឡើងទៅតាមបទបញ្ជារបស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ដោយសារទីតាំងខាងលើមិនអនុវត្តតាមការណែនាំរបស់រដ្ឋបាលរាជធានីភ្នំពេញ ដោយធ្វើឱ្យដីខ្សាច់ហូរហៀរលើទ្រូងផ្លូវ ពិបាកការធ្វើដំណើរ បង្កឱ្យមានគ្រោះថ្នាក់ចរាចរណ៍ និងបណ្តាលឱ្យខូចខាតហេដ្ឋារចនាសម្ព័ន្ធមួយចំនួនថែមទៀត ដូចជាខូចខាតផ្លូវ ប្រព័ន្ធលូ ជាដើម។

អភិបាលរងលោក ស៊ុយ សេរិទ្ធ ក៏បានបញ្ជាក់ផងដែរថា៖ អាជីវកម្មទាំង០៤ទីតាំងខាងលើនេះ គឺត្រូវបិទទាំងស្រុងតែម្តង មិនទុកឱ្យដេប៉ូខ្សាច់ទាំងនេះ បំផ្លាញហេដ្ឋារចនាសម្ព័ន្ធទៀតទេ ហើយរាល់រចនាសម្ព័ន្ធ ដែលខូចខាត ដូចជាលូ ផ្លូវ នៅលើផ្លូវជាតិលេខ២ ផ្លូវ៦០ ម៉ែត្រនិងផ្លូវ ៣០ ម៉ែត្រ ម្ចាស់ដេប៉ូខ្សាច់ខាងលើត្រូវតែកើបដីខ្សាច់ចេញពីថ្នល់និងធ្វើការជួសជុលឡើងវិញទាំងលូនិងផ្លូវ។

លោកបានបញ្ជាក់ផងដែរថា៖ ទីតាំងដេប៉ូខ្សាច់ខាងលើនេះត្រូវបានអាជ្ញាធររាជធានីភ្នំពេញធ្វើការណែនាំនិងធ្វើកិច្ចសន្យាជាច្រើនលើកច្រើនសារួចមកហើយ និងបានណែនាំឱ្យពួកគាត់មានម៉ាស៊ីនលាងកង់រថយន្ត និង ដឹកជញ្ជូនខ្សាច់នៅពេលយប់វិញ ប៉ុន្តែទោះបីជាយ៉ាងណាក្តី ម្ចាស់អាជីវកម្ម នៅតែអនុវត្តមិនបានល្អទៅតាមការណែនាំរបស់រដ្ឋបាលរាជធានីភ្នំពេញ ទើបរដ្ឋបាលរាជធានីភ្នំពេញ សម្រេចបិទអាជីវកម្មទាំងស្រុងតែម្តង។

គួរបញ្ជាក់ថា៖ នៅថ្ងៃទី០៧ ខែសីហា ឆ្នាំ២០២២ យប់មិញនេះ មានករណីចរាចរណ៍កើតឡើងនៅលើផ្លូវជាតិលេខ២ ក្នុងសង្កាត់ចាក់អង្រែក្រោម ត្រង់ចំណុចដេប៉ូបូមខ្សាច់ទាំងនោះ ខណៈផ្លូវត្រូវជន់លិចដោយទឹក និងក្រាលដោយខ្សាច់ ភក់ ទើបបង្កឱ្យអ្នកធ្វើដំណើររអិលដួល ដាច់ផ្ងារ ដោយខ្លួនឯង៕