តើមូលហេតុអ្វី បានជា អាជ្ញាធរ និង សមត្ថកិច្ច ក្រុងសៀមរាប មិនបង្ក្រាបបទល្មើសល្បែងស៊ីសងខុសច្បាប់ នៅក្នុងមូលដ្ឋានរបស់ខ្លួន_វគ្គ១

តើមូលហេតុអ្វី បានជា អាជ្ញាធរ និង សមត្ថកិច្ច ក្រុងសៀមរាប មិនបង្ក្រាបបទល្មើសល្បែងស៊ីសងខុសច្បាប់ នៅក្នុងមូលដ្ឋានរបស់ខ្លួន_វគ្គ១

ខេត្តសៀមរាប៖ នៅតាមបណ្តាលហាងកាហ្វេជាច្រើនកន្លែង ទូទាំងក្រុងសៀមរាប សម្បូរទៅដោយការបង្កបង្កើតបទល្មើស ល្បែងស៊ីសងខុសច្បាប់ មាន់ជល់ហាយឡាយ តាមប្រព័ន្ធអនឡាញទូរទស្សន៍ ដែលសុទ្ធតែជាអំពើល្មើសច្បាប់ ដែលរាជរដ្ឋាភិបាលកម្ពុជា ឲ្យបង្ក្រាបខានតែបាន។

ក្នុងករណីនេះដែរ ខាងសារព័ត៌មានយើង សង្កេតឃើញថា អាជ្ញាធរ និងសមត្ថកិច្ច ក្រុងសៀមរាប ដែលមានលោក នួន ពុទ្ធារ៉ា អភិបាលក្រុងសៀមរាប ហើយនិងលោក ដា ចំរើន អធិការនគរបាលក្រុងសៀមរាប មិនមានវិធានការបង្ក្រាបបទល្មើសខុសច្បាប់ទាំងអស់នោះសោះ នេះហាក់បីដូចជាបណ្តែតបណ្ដោយខ្លាំងមែនទែន។

តាមប្រភពព័ត៌មានពីពលរដ្ឋមួយចំនួន ក៏បានលើកឡើង ដែរថា «បើសិនជាមិនមានការបើកដៃពីអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋាន ក៏ បទល្មើសល្បែងស៊ីសងខុសច្បាប់ ទាំងអស់នេះ មិនអាចបើកដំណើរការបានដោយរលូនល្អយ៉ាងនេះដែរ» ដូចពាក្យចចាមអារ៉ាមលោកថា បើខ្មោចស្រុកមិនបើកដៃ ខ្មោចព្រៃក៏មិនហ៊ានចូល។

ពលរដ្ឋក៏បានសម្តែងក្តីព្រួយបារម្ភយ៉ាងខ្លាំងចំពោះភាពអសកម្ម របស់អាជ្ញាធរនិងសមត្ថកិច្ចក្រុងសៀមរាប ដែលមិនមានការបង្ក្រាបបទល្មើស (ពោលគឺ) ព្រងើយកន្តើយខ្លាំងណាស់។

ពាក់ព័ន្ធទៅនឹងការបណ្តែតបណ្ដោយឲ្យបទល្មើសរីកដុះដាលដូចផ្សិតនៅក្នុងមូលដ្ឋានក្រុងសៀមរាប ខាងសារព័ត៌មានយើងមិនអាចសុំការបំភ្លឺពីលោក នួន ពុទ្ធារ៉ា អភិបាលក្រុងសៀមរាប ហើយនិងលោក ដា ចំរើន អធិការនគរបាលក្រុងសៀមរាប បានទេ ព្រោះទូរស័ព្ទខលចូលអត់សេវាស្ដាប់មិនច្បាស់ទាំងពីរនាក់។

ទាក់ទិនទៅនិងករណីខាងលើនេះ សារព័ត៌មានយើង មិនដឹងថាមកពីមូលហេតុអ្វីនោះទេ ទើប អាជ្ញាធរ និង សមត្ថកិច្ច ក្រុងសៀមរាបមិនបង្ក្រាបបទល្មើសល្បែងស៊ីសងខុសច្បាប់ នៅក្នុងមូលដ្ឋានរបស់ខ្លួន (ឬមួយខ្លាចបាត់ប្រយោជន៍)

មហាជន និង ខាងសារព័ត៌មានយើង និងរង់ចាំមើលបន្ត ថាតើ អាជ្ញាធរ និងសមត្ថកិច្ច ក្រុងសៀមរាប ហ៊ានបង្ក្រាបបទល្មើសល្បែងស៊ីសងខុសច្បាប់ដែលមាននៅក្នុងដែនគ្រប់គ្រងខ្លួនដែរឬយ៉ាងណា។

ករណីដ៏គួរឲ្យព្រុយបារម្មនេះដែរ តើលោក តេង ច័ន្ទណាត ស្នងការខេត្តសៀមរាប គួរតែមានវិធានការបន្ទាន់បែបណាចំពោះភាពអសកម្មរបស់លោក ដា ចំរើន អធិការនគរបាលក្រុងសៀមរាប ដែលបណ្តោយឲ្យបទល្មើសកើតឡើងពេញបន្ទុកមូលដ្ឋានរបស់ខ្លួន៕