ក្រសួងបរិស្ថានប្រកាសដាក់ឱ្យប្រើប្រាស់បណ្ណាល័យអេឡិចត្រូនិច (eLibrary)
![](https://blogger.googleusercontent.com/img/b/R29vZ2xl/AVvXsEjm4EqjcZ1oTngs_HdKPE7A6AQ3c8FUTIVXo3P904-L5s7hvSkAg0F3kz-pVn4Z8TYeOH7xL4wSalw6NQBZWo4dod3tKIMnV9pLc5sW1TgVcQyIwtebOmj5G45IjcXm7rhgKxKNvcQozRQ-oL41hAzv0WLkBt8xuq-vMPIXRjsrpcp-YXcUSZtEhn9CiHQ/s1600/IMG_1144.jpeg)
ក្រសួងបរិស្ថានប្រកាសដាក់ឱ្យប្រើប្រាស់បណ្ណាល័យអេឡិចត្រូនិច (eLibrary)
ដើម្បីចូលរួមចំណែកអនុវត្តគោលនយោបាយរបស់ក្រសួងបរិស្ថាន ក្នុងការពូនជ្រំ កសាង លើកកម្ពស់ចំណេះដឹងបរិស្ថាន ការធ្វើទំនើបកម្មស្ថាប័ន និងប្រែក្លាយជារដ្ឋបាលទំនើប ស្របតាមមាគ៌ាដ៏ត្រឹមត្រូវរបស់រាជរដ្ឋាភិបាល ក្រសួងបរិស្ថានបានប្រកាសដាក់ឱ្យប្រើប្រាស់បណ្ណាល័យអេឡិចត្រូនិច (eLibrary) ក្រោមអធិបតីភាពឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងមានការអញ្ជើញចូលរួមពីឯកឧត្តម លោកជំទាវ ជាថ្នាក់ដឹកនាំ សាកលវិទ្យាធិការនៃសាកលវិទ្យាល័យ លោក លោកស្រី តំណាងវិស័យឯកជន និងដៃគូអភិវឌ្ឍន៍ជាតិ-អន្តរជាតិ ព្រមទាំងលោកគ្រូ អ្នកគ្រូ និងបងប្អូនយុវជន ជាច្រើនរូបទៀត នៅរសៀលថ្ងៃទី២៨ខែកក្កដា ឆ្នាំ២០២៣ នាទីស្តីការក្រសួង។
ថ្លែងនូវរបាយការណ៍សង្ខេប ឯកឧត្តម កែន សេរីរដ្ឋា អគ្គនាយកនៃអគ្គនាយកដ្ឋានចំណេះដឹងនិងព័ត៌មានបរិស្ថាន បានគូសបញ្ជាក់ឱ្យដឹងថា គម្រោងបណ្ណាល័យអេឡិចត្រូនិចនៃក្រសួងបរិស្ថាន បានបង្កើតឡើងតបតាមគំនិតផ្តួចផ្តើម និងអនុសាសន៍ណែនាំរបស់ថ្នាក់ដឹកនាំក្រសួងបរិស្ថាន ស្របនឹងគោលនយោបាយរបស់រាជរដ្ឋាភិបាល។ គេហទំព័របណ្ណាល័យអេឡិចត្រូនិច នឹងក្លាយជាថ្នាលឌីជីថលដែលចូលរួមចំណែកយ៉ាងសកម្មក្នុងការចែករំលែកសម្រាប់ចែករំលែកចំណេះដឹង ព័ត៌មានបរិស្ថាននិងធនធានធម្មជាតិ ការធ្វើទំនើបកម្មស្ថាប័ន ក៏ដូចជាការផ្សព្វផ្សាយសក្តានុពលតំបន់ការពារធម្មជាតិ ជូនសិស្ស និស្សិត សាធារណជន វិស័យឯកជន និងអ្នកស្រាវជ្រាវ ជាពិសេសជាបណ្តុំចងក្រងទិន្នន័យសម្រាប់ក្រសួងបរិស្ថានរយៈពេលវែងផងដែរ។ ជាមួយគ្នានេះ យើងរីករាយស្វាគមន៍នូវរាល់កិច្ចសហការពីគ្រប់ស្ថាប័ន និងដៃគូនានា ក្នុងការចែករំលែកនូវគ្រប់ប្រភេទឯកសារ ទិន្នន័យនានា ក្រោមទម្រង់ជារូបភាព ឯកសារសំណេរ សារសំឡេង ឬវីដែអូ ដើម្បីចងក្រង រក្សាទុក និងជាការចែករំលែកចំណេះដឹងតាមរយៈបណ្ណាល័យអេឡិចត្រូនិច (eLibrary)មួយនេះ ប្រើប្រាស់ជាផលប្រយោជន៍រួម។
ក្នុងឱកាសនោះដែរ ឯកឧត្តម សាយ សំអាល់ បានបង្ហាញនូវសេចក្តីសោមនស្សរីករាយ និងថ្លែងអំណរគុណយ៉ាងជ្រាលជ្រៅបំផុតចំពោះក្រុមការងារដែលបានអនុវត្តបានជោគជ័យសម្រេចបាននូវបណ្ណាល័យអេឡិចត្រូនិច (eLibrary) នេះឡើង ដែលជាមជ្ឍមណ្ឌលប្រមូលព័ត៌មានយ៉ាងសំខាន់មួយ។ ឯកឧត្តមរដ្ឋមន្ត្រីបានសង្កត់ធ្ងន់ថា បណ្ណាល័យអេឡិចត្រូនិច មិនត្រឹមតែជាបណ្ណាល័យប៉ុណ្ណោះទេ ប៉ុន្តែគឺជាឧបករណ៍ដែលនឹងប្រែក្លាយសង្គមកម្ពុជា ប្រជាជនកម្ពុជា ទៅជាសង្គមសកល ប្រជាជនសក ដែលពោរពេញដោយបំណិនជីវិត ប្រកបដោយភាពច្នៃប្រឌិត។
គួរបញ្ជាក់ឱ្យដឹងថា បណ្ណាល័យអេឡិចត្រូនិច (eLibrary) នឹងក្លាយជាផ្នែកមួយដ៏សំខាន់នៅក្នុងគេហទំព័រផ្លូវការនៃក្រសួងបរិស្ថានដែលមានស្រាប់ ដែលក្នុងគេហទំព័រនេះ នឹងធ្វើបច្ចុប្បន្នភាព ប្រែក្លាយទៅជាគេហទំព័រដ៏សំបូរបែប និងប្រមូលផ្តុំគ្រប់ប្រព័ន្ធទិន្នន័យដែលបាននឹងកំពុងអនុវត្តស្ថិតក្នុងរចនាសម្ព័ន្ធចាត់តាំងរបស់ក្រសួងបរិស្ថាន ដែលរួមមាន៖ (១)ព័ត៌មានដែលទាក់ទងនឹងក្រសួង និងមន្ទីរបរិស្ថាន (២)ចំណេះដឹងទូទៅពីបរិស្ថាន ព្រឹត្តិការណ៍ ឬយុទ្ធនាការបរិស្ថានផ្សេងៗ (៣)ព័ត៌មានអំពីប្រព័ន្ធ CEMIS ដែលជាប្រព័ន្ធបច្ចេកវិទ្យាប្រមូលព័ត៌មាន ថ្នាក់ជាតិលើការគ្រប់គ្រងបរិស្ថាន (៤)ព័ត៌មានអំពីប្រព័ន្ធ NRMIS ដែលជាប្រព័ន្ធបច្ចេកវិទ្យាព័ត៌មានគ្រប់គ្រង ចំណូលមិនមែនសារពើពន្ធ (៥)ព័ត៌មានអំពីប្រព័ន្ធ SARMIS ដែលជា ប្រព័ន្ធបច្ចេកវិទ្យាព័ត៌មានគ្រប់គ្រងទ្រព្យសម្បត្តិរដ្ឋ (៦)ព័ត៌មានអំពីប្រព័ន្ធ FMIS ដែលជាប្រព័ន្ធបច្ចេកវិទ្យាព័ត៌មានគ្រប់គ្រងគ្រប់មុខសញ្ញាការចំណាយរបស់ក្រសួង-ស្ថាប័ន និង(៧)បណ្ណាល័យអេឡិចត្រូនិច(eLibrary)៕
![](https://blogger.googleusercontent.com/img/b/R29vZ2xl/AVvXsEj2PY4HOVcwA7upGdEB3w0DBcxUfo6jGc0gs6t_lZQ_mc3g8KX_NQdOczuB8ZoGucoJ_eD6zGSHMqBnYJddZ9ZWTaQKGGdo2hGmb6ac6c_s1QIiO9k5XiS-VNQAzxL101-wIZB45zWr4BgYFsH4n0aVTjAbrdp6ohEW9zC6JsWN-3NoSU8m98sDJakOHzA/s1600/IMG_1143.jpeg)
![](https://blogger.googleusercontent.com/img/b/R29vZ2xl/AVvXsEjoyD85S0pkTJRWH3R4V-xC-d5UwgLx8Ceyfdh5oiCy_PY8VXBMZHzKoTgtCQFyF3YdejKy1j7wJcDMZ6j3rbOZZg7PT0Kq4D1LoSf6OOHDE5WUvWSXPq6GUOT1L1CdRERj0b9bmXqQgoa-fqTypwsbrUVO5m-JnVglH_6xcHbV1QsqxlfBWl7JHPLvYCo/s1600/IMG_1145.jpeg)
![](https://blogger.googleusercontent.com/img/b/R29vZ2xl/AVvXsEg1WS-Mb07wahu6v6y0rOAIoiZzJjoREtilLoj54PIbLU-Nc-f_Kzd0cDcT5AOGAhRGKKY9R0-AX_qPWBTvxgOgcr5ufRFZIe7rSTKQmUcY-2N1uFXbr7v-pL7ickxTBELXj_3_r85wYYE7V1y7nK1EHqOTNqMidFoNSB2tVMx5D-nboKFBEmus37eRPXc/s1600/IMG_1146.jpeg)
![](https://blogger.googleusercontent.com/img/b/R29vZ2xl/AVvXsEjFOI1-suc8mALIQtnwh3p-XdP-6-QQHA8pYr0IsG5obZ86n5zvI_7HBYuj_YOx547InwSnSr8fjg3vHmc23kQv_ghcY6dU-nhYGcgFghJmID4h-N6p2FZc2nmH3QABrGSxJIbDsO3MD7ZFNohEJXFqmlO7TUnSWcRMTMUs_tw8c6Ybj0CE-Ek_WIs0tbg/s1600/IMG_1147.jpeg)
![](https://blogger.googleusercontent.com/img/b/R29vZ2xl/AVvXsEgBlBVOzztiB1p3sy4q49W6VQrd00CQ73ci6u4x7TMrvgMA2s2w2dkgelUuvU2WP0ftjPv6wud3-wbDn-j16lW_6-Nb-GHbCiZgBL55cKPBKhPy8kL5P2i6AwgfP07_Uo5ShjPnQ16uIjFcWog6rAWH6kC8yLeMqq1zbvObGY22tzURBZ50uV6qc3V8HzM/s1600/IMG_1148.jpeg)
![](https://blogger.googleusercontent.com/img/b/R29vZ2xl/AVvXsEiG92kfTSFkb2F5KtxVAlNUdyk2PVW2W6IWdkE97mmlkv9e-zCe1GW3mWhZ6ze5HZgKn0Ejo6_shz7CqmSSetEWJb-CsHharsX-x-sbi_iYSt4TyMtVQA5zHBtjTZ4EpeUmHjQG1rw06XLFnH9bhyjp3ilC_qKtoTGg4yeSiwn554D-R22_nMeoYB-A6os/s1600/IMG_1149.jpeg)
![](https://blogger.googleusercontent.com/img/b/R29vZ2xl/AVvXsEj9IvTtfkVilLjn5tiK4LvmfjhwjWGcSY1-lgpbZXkzk1bmL6WoHt0MnhhLfQbyT7E6aDQ-y6pzRL8e2x7lpPME0UMXrW9oAuxBlZRBKdiuhthrSd6jKBvQiwOC9I9UHYzcJO8qaSa5y-C5y5-Pi3nm75nynvXQIE-1jfGHZl0Q41J6oveqMbX2F1K7fIk/s1600/IMG_1150.jpeg)
![](https://blogger.googleusercontent.com/img/b/R29vZ2xl/AVvXsEis5W1REMJ3t9wwfyzjT8xZjNsssr9Tl11IP60t64bpBO8OW5J93oBAnV2etJnqBKfi_iEdhsWo0E_gE2Uzb5l8yNejT4sFvA4RHOyD-QIyC2VVzCBKi3sBLdSZktxmz9GY7uH5lLvHxdoZvqjK-7Pkcg3yEQdzkryvZOE7u5o5KHoeeO-KUvl9P-rd9OA/s1600/IMG_1151.jpeg)
![](https://blogger.googleusercontent.com/img/b/R29vZ2xl/AVvXsEhhJzuf4UC0QmXP59YTT_h33zd8l9b3DDIlOSM-rnnxMFIYe2-h-vu9YgPNEzKRODjNmBUxBXxx3VV5SJnp9BW8TgjRxNW2Uwxn-FkdmHYzOIZoccipRIRak5DQ7J3mav1EaXZpdZGPDBXNGS52TO-Wkch2ytUpF18ymmUwiebCapVDRQuMqbDnWiQ0n-o/s1600/IMG_1152.jpeg)
No comments