វិទ្យាល័យហ៊ុនសែនពាមជីកង តម្រូវឲ្យសិស្សបង់លុយ ៦០មុឺន ដល់ ១លានរៀលក្នុងសិស្សម្នាក់ គឺជាគោលការណ៍របស់ក្រសួង ដើម្បីយកលុយទាំងនោះ ឧបត្ថម្ភលើប្រាក់ខែយគ្រូបង្រៀន
![](https://blogger.googleusercontent.com/img/b/R29vZ2xl/AVvXsEj8dUk9xoniRmOMqm5-q2Fjezpse1rlJiiEVtbFo9cBg0AEUsikRz41H9yswAwKCsKEk-ZFnqe3YfmRQ_vVOlU9en5NvqTKVLSkYqwXX5Pj-4-p6VQZu_QdKuKP79zh_h9FQfl6LReCq5wx9slmCZX6ivHqFGcXuB79aO8V16QF8JS7rAHcktZ8J0kfduM/s1600/IMG_20231130_193247.png)
វិទ្យាល័យហ៊ុនសែនពាមជីកង តម្រូវឲ្យសិស្សបង់លុយ ៦០មុឺន ដល់ ១លានរៀលក្នុងសិស្សម្នាក់ គឺជាគោលការណ៍របស់ក្រសួង ដើម្បីយកលុយទាំងនោះឧបត្ថម្ភលើប្រាក់ខែគ្រូបង្រៀន
ដោយសារជីវភាពក្រលំបាក ប្រជាពលរដ្ឋដែលជាអាណាព្យាបាលសិស្ស នៃឃុំពាមជីកង ស្រុកកងមាស ខេត្តកំពង់ចាម បានត្អូញត្អែរប្រាប់សារព័ត៌មានថារូបគាត់គ្មានលុយ គ្មានលទ្ធភាពឲ្យកូនរៀននោះទេ ព្រោះតម្លៃថ្លៃសាលា ដែលវិទ្យាល័យហ៊ុនសែនពាមជីកងជំនាន់ថ្មី តម្រូវឲ្យរូបគាត់បង់ថ្លៃសាលាចំនួន ៦០មុឺនរៀល ដោយសិស្សខ្លះមានជីវភាពគ្រួសារសមរម្យ គឺតម្រូវឲ្យបង់ ចំនួន ១លានរៀល ក្នុងសិស្សម្នាក់។
ប្រជាពលរដ្ឋដែលជាអាណាព្យាបាលសិស្សដដែលបានបន្តឲ្យសារព័ត៌មានដឹងថា៖ ប្រសិនបើជាសិស្សណាម្នាក់ ឬអាណាព្យាបាលរូបណាមិនទាន់មានលុយគ្រប់ថ្លៃបង់សាលា គឺអាណាព្យាបាលសិស្សរូបនោះក៏អាចបង់រំលោះជាតំណាក់កាលបានដែរ (ពោលគឺអាចបង់រំលោះបានដូចជាម៉ូតូឡាន ឬដីឡូត៍ជាដើម)។
ករណីនេះមន្ទីរអប់រំយុវជន និងកីឡាខេត្តកំពង់ចាម លោក កុក ស៊ីជឿន ខាងសារព័ត៌មានយើងមិនអាចសុំការបំភ្លឺបានទេ ពោលគឺឲ្យទំនាក់ទំនងទៅកាន់ប្រធានការិយាល័យអប់រំយុវជននិងកីឡានៃរដ្ឋបាលស្រុកកងមាស វិញទៅ ទើបដឹងរឿងហ្នឹងច្បាស់។
លោកស្រី ជោត សុម៉ាលី ប្រធានការិយាល័យអប់រំយុវជននិងកីឡានៃរដ្ឋបាលស្រុកកងមាស បានប្រាប់សារព័ត៌មានឲ្យដឹងនៅថ្ងៃទី៣០ ខែវិច្ឆិកា ឆ្នាំ២០២៣នេះថា «ការតម្រូវយកលុយថ្លៃសាលាពីសិស្ស គឺជាគោលការណ៍របស់ក្រសួងអប់រំយុវជននិងកីឡា ព្រោះនេះគឺជាវិទ្យាល័យជំនាន់ថ្មី ដូច្នេះត្រូវតែឲ្យអាណាព្យាបាលជួយជាបដិភាគ ដើម្បីយកលុយទាំងនោះ ឧបត្ថម្ភលើប្រាក់ខែយគ្រូបង្រៀន និងទុកបង់ថ្លៃទឹក បង់ថ្លៃភ្លើងជាដើម» ហើយការបង់ប្រាក់នេះគឺមិនមានការបង្ខិតបង្ខំនោះទេ គឺឲ្យសម្រេចជាការស្ម័គ្រចិត្ត។
នាយកវិទ្យាល័យហ៊ុនសែនពាមជីកង នៃស្រុកកងមាស ខេត្តកំពង់ចាម លោក ទូច វុទ្ធី ក៏បានបំភ្លឺប្រាប់សារព័ត៌មានយើងដែរថា៖ «ការតម្រូវឲ្យអាណាព្យាបាលសិស្សបង់ថ្លៃសាលាគឺមិនមែនសាលាធ្វើតាមតែចិត្តនោះទេ គឺសាលាធ្វើតាមគោលការណ៍របស់រដ្ឋមន្ត្រីក្រសួងអប់រំយុវជននិងកីឡា» ហើយការបង់លុយក៏អាចអនុគ្រោះបានចំពោះសិស្សដែលមានប័ណ្ណក្រីក្រ ឬមានលិខិតបញ្ជាក់ពីអាជ្ញាធរមូលដ្ឋានថាជាសិស្សក្រីក្រ ចំណែកឯសិស្សណាដែលមានជីវភាពធម្មតាគឺបង់លុយធម្មតា ហើយក៏អាចបន្ធូរបន្ថយបានទៅតាមការជាក់ស្ដែង។
បើយោងតាមការលើកឡើងពីសំណាក់លោកស្រីប្រធានការិយាល័យអប់រំយុវជននិងកីឡាស្រុកកងមាស និងលោកនាយកវិទ្យាល័យហ៊ុនសែនពាមជីកង ថាលុយដែលយកពីសិស្ស គឺទុកឧបត្ថម្ភលើប្រាក់ខែគ្រូបង្រៀន និងទុកគ្រាន់បង់ថ្លៃទឹក បង់ថ្លៃភ្លើង សូមរាជរដ្ឋាភិបាលកម្ពុជាដែលមានសម្តេចមហាបវរធិបតី ហ៊ុន ម៉ាណែត សូមមេត្តាជួយសម្រូបសម្រួលឲ្យសិស្សដែលបានរៀននៅវិទ្យាល័យហ៊ុនសែនពាមជីកង បានចូលរៀនធម្មតាដោយមិនចាំបាច់បង់ប្រាក់ថ្លៃឈ្នួលផង។
ពលរដ្ឋស្នើសុំដល់សម្តេច ហ៊ុន ម៉ាណែត ប្រមុខដឹកនាំនៃរាជរដ្ឋាភិបាលកម្ពុជា ជួយពិនិត្យមើលប្រាក់ខែលោកគ្រូអ្នកគ្រូនៃវិទ្យាល័យហ៊ុនសែនពាមជីកងជំនាន់ថ្មីផង ថាតើលោកគ្រូអ្នកគ្រូទាំងនោះសព្វដង បើកប្រាក់ខែតាមរយៈណា ហើយលុយប្រាក់ខែដែលបើកសព្វដងនោះជាលុយរបស់អាណាព្យាបាលសិស្ស ឬក៏ជាលុយរបស់រដ្ឋ៕
![](https://blogger.googleusercontent.com/img/b/R29vZ2xl/AVvXsEjXWOCzL2X4fF3IumpIgq1R_pP9uf0K-2ZZZVe4EXPRTYV95jTThIltPLVH-WlO7XlzIO_hrfjAPCWkQiIUfpe6D56nLKSXRdqrwF-_FqEGGgaKqUZ169G6ZjFMnwRNREK4Pm2o8nBiUEgwawqoGwmQnIdXlG6f6rBAVZXLkXMP7z1Sbywgfbtlq-5RXGA/s1600/IMG_20231130_192411.jpg)
![](https://blogger.googleusercontent.com/img/b/R29vZ2xl/AVvXsEhwliSvrzEBv9B2RpvcHNFW5YEz_KkTI9ZnVMNZ55-EnxjIFE_1ws5cM-RRMfKP4uotAzUExUx_-EkHkT_p8qwZn8P86K5gyn6dtKupf4xwn9hjCcdI01SobW9DFPl2XSFmoMTk34DBJFK-Jy3Pj0P6HC-NG2SGzyIlRL5qjHMclyjaJ5tGyOkoEK8u5Dg/s1600/%E1%9E%A0%E1%9E%84%E1%9F%8B%E1%9E%87%E1%9E%BD%E1%9E%93-%E1%9E%8E%E1%9E%B6%E1%9E%9A%E1%9F%89%E1%9E%BB%E1%9E%93.jpg)
![](https://blogger.googleusercontent.com/img/b/R29vZ2xl/AVvXsEgMY155jNyH7Kr5tITEFMmoAJ6JnN_DtjLb4HZjrlMSiSZ69BeMcUNDsSViU_r2r2ii3elT2_svbYolHakX3EvdltuTIWw2P3vyh1SQtZXqSo93c3iIHTL_jKTntdTVWQOFHcn-_Kb5bv4XCSHlioKIAVd9T-hX7r6mCiTZxhkcqqfXfdq43iEdb2BN4hE/s1600/IMG_20231130_192046_348.jpg)
![](https://blogger.googleusercontent.com/img/b/R29vZ2xl/AVvXsEggNkwQ4Rfolsf3iMY0IoW7eJlgExUjVOkwhiGRqR978HswP12_i8E11-pIalmwjsEtu1DoOpmdnsSDi6VgPtC20he5bSBIgNAja7QOBx_1t7WTHHnsPRAIDpcnFkrtLC5gNiAEnGgOvTys4EBUF-TRgZnZC3Vvvnqt0IJoXsOJHkS0tTN3FJAJ2idqOG0/s1600/IMG_20231130_192610.jpg)
No comments