អធិការនគរបាលស្រុកពញាឮ លោក ដួង តេង បាន បដិសេធអំពីរឿងរ៉ាវយកលុយ ២០០ដុល្លារ ជាថ្នូរក្នុងការតាមចាប់ជនសង្ស័យ

អធិការនគរបាលស្រុកពញាឮ លោក ដួង តេង បាន បដិសេធអំពីរឿងរ៉ាវយកលុយ ២០០ដុល្លារ ជាថ្នូរក្នុងការតាមចាប់ជនសង្ស័យ

ករណីបុគ្គលឈ្មោះ ហួត ចាន់សុខ នាយរងផ្នែកសន្តិសុខនៃអធិដ្ឋាននគរបាលស្រុកពញាឮ ខេត្តកណ្តាល ដែលបានប្រើប្រាស់ឈ្មោះអធិការស្រុកទាមទារលុយចំនួន ២០០ដុលា្លរ ពីក្រុមគ្រួសារជនរងគ្រោះ ដើម្បីជាថ្នូរក្នុងការតាមចាប់ខ្លួនជនសង្ស័យ ពេលនេះលោក ដួង តេង អធិការ នៃអធិការដ្ឋាននគរបាលស្រុកពញាឮ បានធ្វើការបដិសេធច្រានចោលអំពីរឿងរ៉ាវមួយនេះ។

យោងតាមរបាយការណ៍បំភ្លឺរបស់លោក ដួង តេង អធិការនគរបាលស្រុកពញាឮ នៅថ្ងៃទី១៨ ខែធ្នូ ឆ្នាំ២០២៣ គោរពជូនចំពោះលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បាន រៀបរាប់និងបដិសេធច្រានចោលទាំងស្រុង ចំពោះករណីទារលុយចំនួន២០០ដុល្លារ ពីក្រុមគ្រួសារជនរងគ្រោះដើម្បីជាថ្នូរក្នុងការតាមចាប់ជនសង្ស័យ។

អធិការស្រុក លោក ដួង តេង ដដែលរូបនេះ បាន បញ្ជាក់ឲ្យដឹងថា៖ រឿងរ៉ាវគឺបុគ្គលឈ្មោះ ហួត ចាន់សុខ តួនាទីនាយរងផ្នែកសន្តិសុខនៃអធិការដ្ឋាននគរបាលស្រុកពញាឮ គឺជាអ្នកទារលុយពីជនរងគ្រោះដោយអំពើចិត្តឯង លាក់បាំងអង្គភាព ដោយយកឈ្មោះអធិការនគរបាលស្រុកពញាឮ និងឈ្មោះព្រះរាជអាជ្ញាទៅប្រើក្នុងគោលបំណងឲ្យក្រុមគ្រួសារជនរងគ្រោះមានការជឿជាក់ទៅលើខ្លួន។

ដូចដែរបានរៀបរាប់តាមរបាយការណ៍បំភ្លឺ ពីសំណាក់លោក ដួង តេង អធិការនគរបាលស្រុកពញាឮ នៃស្នងការដ្ឋាននគរបាលខេត្តកណ្តាល សូមសារធារណៈជនមេត្តាជ្រាបថា «ករណីទារលុយ ២០០ដុល្លារ ដើម្បីជាថ្នូរក្នុងការតាមចាប់ជនសង្ស័យ គឺមិនមែនជាគំនិតរបស់លោកអធិការនគរបាលស្រុកពញាឮនោះទេ គឺជាគំនិតទាំងស្រុងរបស់លោកស្រី ហួត ចាន់សុខ នាយរងផ្នែកសន្តិសុខនៃអធិដ្ឋាននគរបាលស្រុកពញាឮ គិតម្នាក់ឯង ធ្វើម្នាក់ឯង យកលុយទៅចាយម្នាក់ឯង អត់ចែកគេចាយ ដល់ពេលផែនការធ្លាយបែកទើបព្រមទទួលកំហុស»។

សូមជម្រាបជូនថា៖ កាលពីថ្ងៃទី២០ ខែវិច្ឆិកា ឆ្នាំ២០២៣វេលាម៉ោង២៣និង២០នាទីយប់ មានករណីហិង្សាមានស្ថានទម្ងន់ទោស នៅចំណុចបឹងផ្សារដែក ភូមិផ្សារដែកក្រោម ឃុំផ្សារដែក ស្រុកពញាឮ ខេត្តកណ្ដាល បណ្ដាលឲ្យជនរងគ្រោះរង់របួសជាទម្ងន់ ។ ក្រោយកើតហេតុភ្លាមៗនោះដែរសមត្ថកិច្ចក៏បានចុះដល់កន្លែងកើតហេតុ ចំណែកឯកជនសង្ស័យរត់គេចខ្លួនបាត់ស្រមោល រហូតមកទល់ពេលនេះនៅមិនទាន់រកឃើញនោះទេ។

ទោះបីជាយ៉ាងណាពាក់ព័ន្ធរឿងរ៉ាវទារលុយ២០០ដុល្លារ ជាថ្នូរក្នុងការតាមចាប់ខ្លួនជនសង្ស័យ អង្គភាពសារព័ត៌មានយើងសង្ឃឹមថាជោគវាសនារបស់លោកស្រី ហួត ចាន់សុខ នាយរងផ្នែកសន្តិសុខនៃអធិដ្ឋាននគរបាលស្រុកពញាឮ មិនធ្ងន់ធ្ងរដល់ថ្នាក់ត្រូវបណ្តេញចេញពីក្របខណ្ឌនគរបាលជាតិនោះទេ យ៉ាងច្រើនត្រឹមទទួលពិន័យទៅតាមច្បាប់៕