រដ្ឋបាលខេត្តកំពង់ចាម បើកយុទ្ធនាការជិះកង់ ជុំវិញទាំង ១០ ក្រុង ស្រុក ដើម្បីប្រមូលថវិកា ជួយដល់មន្ទីរពេទ្យគន្ធបុប្ផា
![](https://blogger.googleusercontent.com/img/b/R29vZ2xl/AVvXsEiGla495U8UsIiDCsx5qo5ElbBe2LXf2rWgcZ1kViqTrddKfIhPml-ry1rPan44mpRmV41y_o6SBKLkqRTjppZwg_24j_jUuns5cstFXqzDiHufhWpgISRUyeRbSbznFUtZM-waunfw6MD2Dazztho016rtZZk2pFm1XmS0KY6bUZbcu1OkiSJh0BwUbsw/s1600/IMG_0167-1024x683.jpg)
កំពង់ចាម៖នៅព្រឹកថ្ងៃទី០១ ខែមេសា ឆ្នាំ២០២៤នេះ រដ្ឋបាលខេត្តកំពង់ចាម បានបើកនិងដំណើរការយុទ្ធនាការជិះកង់រៃអង្គាសថវិកាសម្រាប់ជួយទ្រទ្រង់មូលនិធិមន្ទីរពេទ្យគន្ធបុប្ផា ក្នុងក្របខ័ណ្ឌទូទាំងខេត្តកំពង់ចាម។
អភិបាលខេត្តកំពង់ចាម ឯកឧត្តម អ៊ុន ចាន់ដា បានមានប្រសាសន៍ឲ្យដឹងថា ការរៀបចំយុទ្ធនាការនេះ គឺស្របតាមគោលការណ៍ណែនាំ ជាពិសេស ពីអនុសាសន៍ដ៏ខ្ពង់ខ្ពស់ របស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានណែនាំឲ្យក្រសួង ស្ថាប័ន រដ្ឋបាលថ្នាក់ក្រោមជាតិបង្កើតគណៈកម្មការ ទ្រទ្រង់មូលនិធិមន្ទីរពេទ្យគន្ធបុប្ផា ដើម្បីចូលរួមក្នុងការគៀងគរ ថវិកាយកទៅផ្គត់ផ្គង់ដល់មន្ទីរពេទ្យគន្ធបុប្ផា ក្នុងការធ្វើសកម្មភាពជួយសង្គ្រោះដល់ក្មួយៗកុមារទាំងឡាយដែលមានបញ្ហាសុខភាព និងទទួលបាន ការពិនិត្យព្យាបាលដោយឥតគិតថ្លៃ នៅតាមបណ្ដាមន្ទីរពេទ្យគន្ធបុប្ផានោះ។
ឯកឧត្តមអភិបាលខេត្ត បានបញ្ជាក់ថា បច្ចុប្បន្នមន្ទីរពេទ្យគន្ធបុប្ផា ត្រូវការចំណាយថវិកាច្រើន ។ ប៉ុន្តែដោយសារថវិកាទ្រទ្រង់មន្ទីរពេទ្យបច្ចុប្បន្ន នៅមានកម្រិតនៅឡើយ ដូច្នេះចាំបាច់ត្រូវការឱ្យមានការចូលរួមគ្រប់ភាគីពាក់ព័ន្ធទាំងអស់ ។ ហេតុដូច្នេះហើយទើបរដ្ឋបាលខេត្តកំពង់ចាម បានរៀបចំគណៈកម្មការទ្រទ្រង់មន្ទីរពេទ្យគន្ធបុប្ផា នឹងបានសម្រេចយកថ្ងៃទី ១ ខែមេសានេះ ជាថ្ងៃចាប់ផ្ដើមដំណើរការយុទ្ធនាការ ប្រើរយៈពេល ៧ ថ្ងៃ ដើម្បីជិះកង់គៀងគររកថវិកា គ្រប់ទីកន្លែងក្នុងភូមិសាស្ត្រខេត្តកំពង់ចាម។
សូមបញ្ជាក់ផងដែរថា ក្នុងយុទ្ធនាការនេះ ជំហានដំបូង គឺជិះកង់រួមគ្នាជាក្រុមធំ ចេញពីគោលដៅសួនស្មៅ មុខសាលាខេត្ត ទៅកាន់”អក្សរខេត្តកំពង់ចាម”នៅមាត់ទន្លេ បន្ទាប់មកបំបែកជា ៧ក្រុម ដើម្បីជិះកង់ទៅកាន់គោលដៅដែលបានកំណត់ទុករួមមាន ផ្សារលក់ដូរ សាលារៀន វត្តអារាម អង្គភាពរដ្ឋបាលក្រុង ឬស្រុក មន្ទីរអង្គភាព ទីស្នាក់ការក្រុមហ៊ុន អាជីវកម្ម ឬគ្រឹះស្ថានឯកជន ធនាគារ ក្រុមហ៊ុនធានារ៉ាប់រង គ្រឹះស្ថានមីក្រូហិរញ្ញវត្ថុ ហាងលក់ដូរជាដើម៕
![](https://blogger.googleusercontent.com/img/b/R29vZ2xl/AVvXsEigN8quxJM3qMmfculDYMt96s06j9axYQDqYhygZmyjOVYjDhZvX-hOwFahli7Wlw8KjzCMKImb-eWOfwofJQW2Xw-HB-jcJ0mB4cs7UkWJJJPAgkDSbZRXldV1FwZJ6IsFaRFyU4X7-Dij10KU-U3bldPGaxmbiXNKbmhEwoOdppH3c5bMWY0Mi4kvq_s/s1600/IMG_8455-1024x768.jpg)
![](https://blogger.googleusercontent.com/img/b/R29vZ2xl/AVvXsEgaUa9Iq80coU0cqpnN6V4EufAraVnQCCGP5q2hAbLMvuT2bkEF2cGI9OJ25TlRjrnaBVm4vwb7mACklImPmOWMNTSBqMCgpCDZAj2mAn4NjryVkYORmEcl3eXLbDoSx239O24vwIZuJQtlBoyNUtKAkxp-mQ7kIZJY-iT8wenaJ9Dts1cx2AP0vs1btkE/s1600/IMG_8457-1024x768.jpg)
![](https://blogger.googleusercontent.com/img/b/R29vZ2xl/AVvXsEj4ZfC_MDOJKfzktGw2Jcsm0oZy_1pIpi8xsyeGFHL1M1cbZqULph4GVhawOMYL4wrNK4r721w9hhO6cdoLwbYKca-Nqs1duSNoUumx4H8t_W4iRdBOraPqzvRt532zRqCL3fELn1x2wh0wIUzhUjF_KYmNmaP5QsM92FFyivsSORmbyvBtdtXtfF2JkYA/s1600/IMG_8464-1024x683.jpg)
![](https://blogger.googleusercontent.com/img/b/R29vZ2xl/AVvXsEhKTA_ISDLmq6gLs6eFSxCvUoGNCQnO0TSpB646jfjsE4nJwDvZjM5aZaKGTUfdYQwCaVSPg4MLVwJFX5R059S7xU0WxMLPuiGiyfGrdsd6Qk8E7CYnTYdQAlgxjkt4SgGCI7Tm0gXg_mbRuPoPX997GMC0TTQVGoJ8LDUIMvjNViQevxY6VcRRKeZCiLw/s1600/IMG_0171-1024x683.jpg)
No comments