ភ្លើងឆេះត្របាក់ ផ្ទះប្រជាពលរដ្ឋ រួមទាំងទ្រព្យសម្បត្តិជាច្រើន នៅស្រុកព្រៃនប់

ផ្ទះមួយខ្នងទំហំ ៦ម៉ែត្រ×៨ម៉ែត្រ ប្រកស៊ិបប្រូ ជញ្ជាំងធ្វើអំពីឈើ និងថ្មខាងក្រោម រួមទាំងទ្រព្យសម្បត្តិមានតម្លៃជាច្រើន ត្រូវបានភ្លើងអគ្គិសឆាបឆេះលេបត្របាក់ខ្លាយជាផេះ។

ហេតុការណ៍ដ៏សោកសង្រេង នេះបានកើតឡើងនៅវេលាម៉ោង ១២:២០នាទី ថ្ងៃទី១០ ខែធ្នូ ឆ្នាំ២០២៤ ស្ថិតនៅចំណុច ភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។

តាមសេចក្តីរាយការណ៍ព័ត៌មានបានឱ្យ ដឹងថា៖ ម្ចាស់ផ្ទះមានឈ្មោះ ពុធ វឿន ភេទស្រី អាយុ ៤៨ឆ្នាំ មុខរបរមេផ្ទះ រស់នៅភូមិឃុំកើតហេតុខាងលើ។ ទ្រព្យសម្បត្តិការឆេះខូចខាតបាត់បង់រួមមាន៖ លុយខ្មែរចំនួន២.០០០.០០០រៀល (ពីរលានរៀល) លុយដុល្លាចំនួន២៦០០ដុល្លា (ពីរពាន់ប្រាំមួយរយដុល្លា)។

ករណីអគ្គិភ័យខាងលើបានប្រើប្រាស់រថយន្តពន្លត់អគ្គិភ័យរបស់អធិការដ្ឋាននគរបាលស្រុកព្រៃនប់ចំនួន០២ឡានប្រើប្រាស់ទឹកអស់ចំនួន០៣ឡាន រថយន្តពន្លត់អគ្គីភ័យរបស់អ្នកឧកញ៉ា ទៀ វិចិត្រ ចំនួន០១ឡានប្រើប្រាស់ទឹកអស់ចំនួន០២ឡាន។

សរុបប្រើប្រាស់ឡានទឹកចំនួន០៣គ្រឿងនិងប្រើប្រាស់ទឹកអស់ចំនួន០៥ឡាន អគ្គីភ័យខាងលើនេះមិនបណ្ដាលឱ្យមនុស្សរងរបួសនិងស្លាប់ឡើយ៕