ឯកឧត្តម​ នាយឧត្តមសេនីយ៍​ ជួន​ សុវណ្ណ​ ដឹកនាំប្រតិភូអន្តរក្រសួងចុះពិភាក្សាការងារនៅមជ្ឈមណ្ឌលកងពលតូចអន្តរគមន៍លេខ៣១​ ខេត្តកំពត។

កំពត ៖ នៅល្ងាចថ្ងៃទី៦ ខែសីហា​ ឆ្នាំ​២០២០​ នៅមជ្ឈមណ្ឌលព្យាបាលនិងស្តារនីតិសម្បទាអ្នកញៀនគ្រឿងញៀនកងពលតូចអន្តរគមន៍លេខ៣១​ ស្ថិតនៅភូមិបាក់នឹម​ ឃុំច្រែស​ ឃុំបាក់នឹម​ ស្រុកជុំគិរី​ ខេត្តកំពត​ ឯកឧត្តម​ នាយឧត្តមសេនីយ៍​ ជួន​ សុវណ្ណ​ អនុប្រធាន​ តំណាងឯកឧត្តម​ នាយឧត្តមសេនីយ៍​ កែ​ គឹមយ៉ាន​ ឧបនាយករដ្ឋមន្ត្រី​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន​ បានដឹកនាំប្រតិភូអន្តរក្រសួងមានក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ ក្រសួងសុខាភិបាល​ និងក្រសួងសេដ្ឋកិច្ច​ និងហិរញ្ញវត្ថុ​ ចុះប្រជុំពិភាក្សាការងារ​ និងសំណេះសំណាលជាមួយជនរងគ្រោះ​កំពុងស្នាក់នៅព្យាបាលស្តារនីតិសម្បទាផ្តាច់សារធាតុញៀន។
លោកឧត្តមសេនីយ៍​ត្រី​ គឹម​ កុសលមេបញ្ជាការរង និងប្រធានមជ្ឈមណ្ឌលបានថ្លែងស្វាគមន៍និងរាយការណ៍​ឱ្យដឹងថា​មជ្ឈមណ្ឌលបានកសាងលើទំហំផ្ទៃដីសរុប ២២៣៦០ ម២ ចាប់ទទួលជនរងគ្រោះ​ ចាប់ពីថ្ងៃទី០៩ ខែមេសា​ ឆ្នាំ២០១៨ បានចំនួនសរុប ៩៣៨នាក់ ស្រី២៣នាក់ ។បានធ្វើសមាហរណកម្មទៅរស់នៅក្នុងសង្គមគ្រួសារវិញចំនួន ៥០៦នាក់ ស្រី ១៦នាក់ និងជនរងគ្រោះ កំពុងគ្រប់គ្រងសរុបចំនួន៤៣២នាក់ ស្រី ចំនួន០៧នាក់។
ថ្លែងក្នុងនាមឯកឧត្តម​ នាយឧត្តមសេនីយ៍​ កែ​ គឹមយ៉ាន​ ក្នុងឱកាសនោះ​ ឯកឧត្តម​ នាយឧត្តមសេនីយ៍​ ជួន​ សុវណ្ណ​ បានមានប្រសាសន៍សាទរនូវលទ្ធផលដែលគណ:គ្រប់គ្រង​និងមន្រ្តីរួមគ្នាផ្តល់សេវាព្យាបាលនិងស្តារនីតិសម្បទាដល់ជនរងគ្រោះមានប្រសិទ្ធភាពនិងការទទួលខុសត្រូវ​ ក្រមសីលធម៌វិជ្ជាជីវ:។
ក្នុងឱកាសនោះ​ដែរ ឯកឧត្តម​ នាយឧត្តមសេនីយ៍​ ជួន​ សុវណ្ណ​ បានស្នេីសុំឱ្យក្រសួងស្ថាប័នពាក់ព័ន្ធបន្តដោះស្រាយនូវរាល់សំណូមពរបំពេញតម្រូវការរបស់មជ្ឈមណ្ឌលសំដៅពង្រឹងប្រសិទ្ធភាពការផ្តល់សេវា​ និងសុខដុមរមនាដល់ការសម្រាកដេីម្បីទទួលសេវាពីក្មួយៗជាជនរងគ្រោះដោយសារធាតុញៀនញៀន​ ។
ក្នុងឱកាសសំណេះសំណាល​ ជាមួយជនរងគ្រោះ​ ឯកឧត្តម​ នាយឧត្តមសេនីយ៍​ ជួន​ សុវណ្ណ​ បានណែនាំដល់ក្មួយៗជាជនរងគ្រោះទាំងអស់បន្តខិតខំអប់រំ​ខ្លួនដេីម្បីក្លាយជាពលរដ្ឋល្អ​ឆាប់បានត្រឡប់ទៅរស់នៅ​និងក្លាយជាធនធានមនុស្សមានប្រយោជន៍សម្រាប់ក្រុមគ្រួសារ​ និងសហគមន៍​ ជួយអភិវឌ្ឍខ្លួនឯង​ ក្រុមគ្រួសារ​ និងសហគមន៍ឱ្យមានការរីកចម្រេីន។