ក្នុងពេលសវនាការតាមរយៈ Zoom ទាក់ទងនឹងមេខ្លោងលួចចូលគណនី Twitter ត្រូវបានរំខានជាមួយនឹងវីដេអូអាសអាភាសទៅវិញ

កាលពីចុងខែមុនមានករណីលួចចូលគណនី Twitter របស់អ្នកនយោបាយ និងតារាល្បីៗជាច្រើន។ លោក Graham Ivan Clark អាយុ១៧ឆ្នាំ ដែលគេដឹងថាជាមេខ្លោងត្រូវបានចាប់ខ្លួននៅរដ្ឋ Florida ហើយពេលនេះកំពុងត្រូវបានឃុំខ្លួនផងដែរ។ សវនាការកាលពីថ្ងៃពុធកន្លងទៅនេះ ធ្វើឡើងតាមរយៈកម្មវិធី Zoom ដើម្បីឆ្លើយតបនឹងការស្នើសុំរបស់កូនក្ដីក្នុងការបន្ថយចំនួនទឹកប្រាក់ធានាឱ្យនៅក្រៅឃុំ។
សវនាការនេះ ត្រូវបានផ្សព្វផ្សាយជាសាធារណៈទាំងពេលវេលានិង លេខសម្គាល់របស់កម្មវិធី Zoom។ នៅពេលដែលសវនាការបានចាប់ផ្ដើមគេឃើញមានការរំខានពីសំឡេងបន្តិចបន្តួចប៉ុណ្ណោះ ប៉ុន្តែមិនបានយូរប៉ុន្មានផងក៏មានជនអនាមិកបានបង្ហោះវីដេអូអាសអាភាសចូល នៅក្នុងពេលសវនាការដែលធ្វើឱ្យ លោក Christopher Nash ចៅក្រមនៅសាលាកាត់ក្តី Hillsborough Circuit បង្ខំចិត្តបិទសវនាការជាបណ្តោះអាសន្ត។ ទោះបីជាមានការរំខានជាបន្តបន្ទាប់នៅពេលដែលបើកសវនាការឡើងវិញម្តងៗក៏ដោយ លោកចៅក្រមបានសម្រេចដោយបដិសេធបន្ថយចំនួនទឹកប្រាក់ ៧៥០,០០០ដុល្លារ ដើម្បីធានាកូនក្ដីឱ្យនៅក្រៅឃុំ។ បច្ចុប្បន្នជនជាប់ចោទត្រូវបានហាមឃាត់មិនឱ្យប្រើអ៊ីនធឺណិត ដោយសូម្បីតែចូលប្រើគណនី bitcoin របស់គាត់ក៏មិនត្រូវបានអនុញ្ញាតផងដែរ។
ទន្ទឹមនឹងការសម្រេចនេះលោក Christopher Nash ក៏បានសម្រេចផងដែរថា លោកនឹងមិនឱ្យមានជនអនាមិកជ្រៀតចូលក្នុងពេលសវនាការនៅថ្ងៃមុខទៀតទេដោយលោកនឹងប្រើលេខសម្ងាត់។ គួររំឭកផងដែរថា នាយកដ្ឋានប្រឆាំងបទល្មើសបច្ចេកវិទ្យាធ្លាប់បានផ្សព្វផ្សាយដល់ប្រជាពលរដ្ឋ ឱ្យមានការប្រុងប្រយ័ត្នរួចមកហើយទាក់ទងនឹងបញ្ហានេះជាមួយនឹងកម្មវិធី Zoom ហើយក្រុមហ៊ុនក៏បានបន្ថែមមុខងារលេខសម្ងាត់នេះដើម្បីចៀសវាងកុំឱ្យមានការជ្រៀតចូលដែលគេឱ្យឈ្មោះថា zoom bombed នេះផងដែរ៕