អភិបាលខេត្តកណ្ដាល បញ្ជាឱ្យអាជ្ញាធរក្រុង-ស្រុក និងមន្ទីរពាក់ព័ន្ធ ត្រូវបញ្ឈប់ជាបន្ទាន់ រាល់ការដាក់លក់សាំងដប និងការលក់ និងបញ្ចូលកំប៉ុងហ្គាសតូច នៅតាមមូលដ្ឋានរបស់ខ្លួន

អភិបាលខេត្តកណ្ដាល បញ្ជាឱ្យអាជ្ញាធរក្រុង-ស្រុក និងមន្ទីរពាក់ព័ន្ធ ត្រូវបញ្ឈប់ជាបន្ទាន់ រាល់ការដាក់លក់សាំងដប និងការលក់ និងបញ្ចូលកំប៉ុងហ្គាសតូច នៅតាមមូលដ្ឋានរបស់ខ្លួន

ខេត្តកណ្ដាល ៖ ឯកឧត្តមអភិបាលខេត្ត បានដាក់បទបញ្ជាបែបនេះ ក្នុងឱកាសឯកឧត្តមអញ្ជើញដឹកនាំកិច្ចប្រជុំ គណៈអភិបាលខេត្តកណ្ដាល កាលពីរសៀលថ្ងៃទី៥  ខែវិច្ឆិកា ឆ្នាំ២០២០ ដោយមានការអញ្ជើញចូលរួមពី ឯកឧត្តម លោកជំទាវ អភិបាលរងខេត្ត អភិបាលក្រុង-ស្រុកទាំង១១ កងកំលាំងទាំងបី និងមន្ទីរអង្គភាពនានាជាមួយខេត្ត។

ឯកឧត្តមអភិបាលខេត្ត បន្តថា កន្លងមកអគ្គិភ័យដែលបានឆាបឆេះ ភាគច្រើនបណ្ដាលមកពី កំប៉ុងហ្គាសតូចៗ និងទីកន្លែងលក់សាំងដប ពិសេសនៅក្នុងផ្សារ ដែលមានភាពងាយស្រួលក្នុងការបង្កអគ្គីភ័យ បានឆាប់រហ័ស។

ឯកឧត្តមអភិបាលខេត្ត បានស្នើដល់អាជ្ញាធរក្រុង-ស្រុកទាំងអស់ ត្រូវមានក្បាលម៉ាស៊ីនបូមទឹក សម្រាប់រថយន្តពន្លត់អគ្គីភ័យ ដើម្បីមានភាពងាយស្រួល ក្នុងករណីមាន គ្រោះអគ្គីភ័យកើតឡើងនៅក្នុងមូលដ្ឋានរបស់ខ្លួន ។ ជាងនេះទៅទៀត អាជ្ញាធរមូលដ្ឋានត្រូវយកចិត្តទុកដាក់ ក្នុងការបង្ការ និងទប់ស្កាត់ជំងឺកូវីដ-១៩ និងថែរក្សាសន្តិសុខសណ្តាប់ធ្នាប់ជូនប្រជាពលរដ្ឋឱ្យបានល្អផងដែរ។

ក្នុងកិច្ចប្រជុំនេះដែរ ឯកឧត្តមអភិបាលខេត្ត ក៏បានស្នើដល់មន្ទីរអង្គភាពពាក់ព័ន្ធ ត្រូវចុះសិក្សា ឮហេដ្ឋារចនាសម្ព័ន្ធនានា និងប្រព័ន្ធធារាសាស្ត្រ នៅក្នុងខេត្ត បន្ទាប់ពីជំនន់ទឹកភ្លៀងបានស្រស់ ដើម្បីធ្វើការជួសជុល និងការសម្រួលចរាចរណ៍ដល់បងប្អូនប្រជាពលរដ្ឋ ឱ្យមានភាពងាយស្រួលផងដែរ៕