អភិបាលរាជធានីភ្នំពេញ ចេញសេចក្តីជូនដំណឹង ពីការចាក់វ៉ាក់សាំងដូសទី៣ ជូនថ្នាក់ដឹកនាំ មន្ដ្រីសុខាភិបាល និងមន្ដ្រីរាជការចំណុះរដ្ឋបាលរាជធានីភ្នំពេញ

អភិបាលរាជធានីភ្នំពេញ ចេញសេចក្តីជូនដំណឹង ពីការចាក់វ៉ាក់សាំងដូសទី៣ ជូនថ្នាក់ដឹកនាំ មន្ដ្រីសុខាភិបាល និងមន្ដ្រីរាជការចំណុះរដ្ឋបាលរាជធានីភ្នំពេញ

ឯកឧត្តម ឃួង ស្រេង អភិបាលរាជធានីភ្នំពេញ នៅថ្ងៃទី១៧ ខែសីហា ឆ្នាំ២០២១នេះ បានចេញសេចក្ដីជូនដំណឹងស្ដីពីការចាក់វ៉ាក់សាំងអាស្ដ្រាហ្សេនីកា ដូសជំរុញ ឬដូសទី៣ ជូនដល់ថ្នាក់ដឹកនាំ មន្ដ្រីរាជការ មន្ដ្រីសុខាភិបាល និងបុគ្គលិក នៃរដ្ឋបាលរាជធានីភ្នំពេញ, រដ្ឋបាលខណ្ឌទាំង១៤, រដ្ឋបាលសង្កាត់ទាំង១០៥, មន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ ព្រមទាំងមន្ដ្រីសុខាភិបាលជួរមុខវិស័យឯកជន នៅរាជធានីភ្នំពេញ។

ក្នុងសេចក្ដីជូនដំណឹងនេះ រដ្ឋបាលរាជធានីភ្នំពេញ បានបញ្ជាក់ថា ដំណើរការចាក់វ៉ាក់សាំងដូសទី៣ ឬដូសជំរុញនេះ នឹងចាប់ផ្ដើមនៅថ្ងៃទី១៨ ខែសីហា ឆ្នាំ២០២១ខាងមុខ តាមកម្មវិធី និងទីកន្លែងដែលបានកំណត់ជូនក្នុងឧបសម្ព័ន្ធ នៃសេចក្ដីជូនដំណឹងនេះ។

ចំពោះឯកសារតម្រូវចាំបាច់ដែលត្រូវភ្ជាប់មកជាមួយរួមមាន៖ ទី១៖ ប័ណ្ណចាក់វ៉ាក់សាំងកូវីដ១៩, ទី២៖ ប័ណ្ណសម្គាល់ខ្លួនមន្ដ្រីរាជការ-បុគ្គលិក, ប័ណ្ណ ឬឯកសារបញ្ជាក់អត្តសញ្ញាណការងារនៅមន្ទីរពេទ្យ គ្លីនិក ឬវិស័យឯកជន និងទី៣៖ អត្តសញ្ញាណប័ណ្ណសញ្ជាតិខ្មែរ ឬឯកសារដែលបានប្រើប្រាស់ ក្នុងការចាក់វ់ាក់សាំងដូសទី១ ព្រមទាំងត្រូវគោរពនូវលក្ខខណ្ឌនៃការទទួលបានវ៉ាក់សាំងដូសជំរុញ ឬដូសទី៣ ពោលគឺធានានូវគម្លាតរយៈពេល៦ខែ គិតចាប់ពីកាលបរិច្ឆេទនៃការចាក់វ៉ាក់សាំងដូសទី១៕