ក្រសួងបរិស្ថានចុះសិក្សាស្រាវជ្រាវ “ទន្លេផែន” នៅលើកំពូលភ្នំសំកុស
![](https://blogger.googleusercontent.com/img/b/R29vZ2xl/AVvXsEikJoqf1sC0l5wLAhsWbk8RdBCgB-_mgTVtqPD1rj1xS1SJpXmKaiuTaFEZ5e4O7HHVwxsSMnddlH0sNFIJMndkNoqDPysVJ1wL1FPrfGw5t4Mx0cHaDbfqxytcR5r2TK73NFb4rMi3bGEziGX2XKaZBa27X6f14H23JWPbYw-LvH1_Wb7yG-42CujE/s1600/Polish_20230224_212812713.jpg)
ក្រសួងបរិស្ថានចុះសិក្សាស្រាវជ្រាវ “ទន្លេផែន” នៅលើកំពូលភ្នំសំកុស
ចេញផ្សាយនៅថ្ងៃទី២៤ ខែកុម្ភៈ ឆ្នាំ២០២៣ វេលាម៉ោង២១:៣២នាទីមន្រ្តីជាន់ខ្ពស់ក្រសួងបរិស្ថាន បានចុះសិក្សាស្រាវជ្រាវនៅតំបន់ផ្ទៃទឹក បឹងដ៏ធំ និងមានសម្រស់ដ៏ស្រស់ស្អាត ដែលគេឱ្យឈ្មោះថា បឹងអូរជាំ ឬអ្នកខ្លះហៅថាទន្លេផែន កំពុងស្ថិតនៅសភាពជាអាថ៌កំបាំង កំពុងលាក់ខ្លួនក្នុងព្រៃជ្រៅ និង ទីយ៉ាងខ្ពស់នៅលើកំពូលជួរភ្នំសំកុស ដែលស្ថិតនៅក្នុងតំបន់ទឹកធ្លាក់អូរជាំ ខេត្តបាត់ដំបង។
ទន្លេផែនដែលបានបង្កប់ខ្លួនទៅទីយ៉ាងខ្ពស់ និងស្ថិតនៅក្នុងព្រៃយ៉ាងជ្រៅនេះ ស្ថិតនៅត្រង់លើ កំពូលភ្នំអូរជាំ ដែលជារមណីយដ្ឋានធម្មជាតិស្ថិតនៅប៉ែកខាងលិចឆៀងខាងត្បូងទីរួមខេត្ដ បាត់ដំបង មានចម្ងាយ ៨០គីឡូម៉ែត្រពីទីរួមខេត្ដ ស្ថិតក្នុងភូមិ អូជាំលើ ឃុំកំពង់ល្ពៅ ស្រុកសំឡូត ខេត្តបាត់ដំបង។
បេសកកម្មចុះស្រាវជ្រាវនេះ បានដឹកនាំដោយ ឯកឧត្តម ជា សំអាង រដ្ឋលេខាធិការក្រសួងបរិស្ថាន , ឯកឧត្តម ខ្វែ អាទិត្យា អនុរដ្ឋលេខា ធិការក្រសួងបរិស្ថាន ប្រធានមន្ទីរបរិស្ថានខេត្តបាត់ដំបង និងមន្រ្តីឧទ្យានុរក្ស ចុះពិនិត្យនិងសិក្សាសក្តានុពលធនធានធម្មជាតិ ក្នុងដែនជម្រកសត្វព្រៃភ្នំសំកុស ក្នុងភូមិសាស្រ្តខេត្តបាត់ដំបង ចាប់ពីថ្ងៃទី១៨ ដល់ថ្ងៃទី២០ ខែកុម្ភៈ ឆ្នាំ២០២៣។
លោក កត បូរាន ប្រធានមន្ទីរបរិស្ថានខេត្តបាត់ដំបង បានឱ្យដឹងថា ការរកឃើញទន្លេផែន បឹងធម្មជាតិដ៏ធំ នៅលើកំពូលភ្នំសំកុស នឹងនាំឱ្យការពង្រឹងបន្ថែមទៀតលើការការពារនិងការអភិរក្សធនធានធម្មជាតិដ៏ល្អ និងមានសក្តានុពលសម្រាប់ទេសចរណ៍ធម្មជាតិថ្មីបន្ថែមទៀត ដែលផ្តល់ប្រយោជន៍បន្ថែមដល់សេដ្ឋកិច្ចជាតិ និងដល់សហគមន៍មូលដ្ឋាន។ លោកបានបញ្ជាក់ថា ទីកន្លែងនេះមិនត្រឹមតែសម្បូរទៅដោយ សក្តានុពលធម្មជាតិទេ តែនៅសម្បូរទៅដោយសត្វព្រៃពិសេសសត្វស្វា ទោចនៅពេលទៅដល់កន្លែងនេះវាបានស្រែកយំទ្រហឹងព្រៃតែម្តង។
ប្រធានមន្ទីររូបនេះបានបញ្ជាក់បន្ថែមថា ទន្លេផែនមានប្រវត្តិដ៏យូរលង់ ហើយបង្កប់ទៅដោយអាថ៌កំបាំង តែពេលនេះក្រុមការងារបានចុះស្រាវជ្រាវឃើញដោយផ្ទាល់ពិតជាអស្ចារ្យ ហើយលោកសង្ឃឹម ថា ថ្ងៃខាងមុខនឹងក្លាយជាតំបន់ទេសចរណ៍សម្រាប់អ្នកដំណើរកម្សាន្តផ្សងព្រេង។ ទីបឹងធំវាពិតជាអស្ចារ្យមិនត្រឹមតែសម្បូរទៅដោយដើមឈើធំៗបង្ហាញនូវសម្រស់ស្រស់ត្រកាល ទេសភាពល្អឯក នោះទេ នៅជាទីកន្លែងបរិសុទ្ធគ្មាននរណាមកដល់បានដោយងាយឡើយ ពីព្រោះសំខាន់គ្មានផ្លូវ ,ត្រូវដើរកាត់ព្រៃភ្នំឡើងចុះតាំងតែពីព្រឹកព្រលឹមរហូតដល់ម៉ោង៥ល្ងាចទើបទៅដល់។
ទាក់ទិននឹងបឹងស្ថិតនៅលើ កំពូលភ្នំ ហើយកម្រមានមនុស្សទៅដល់កន្លែងនេះដែរ ត្រូវបានលោក វឹង វ៉ឺន អនុប្រធានសហគមន៍តំបន់ការពារធម្មជាតិទឹកធ្លាក់អូរជាំដែលបានទៅដល់ទីកន្លែងបឹងមួយនេះឱ្យដឹងថា លោកធ្លាប់ជូនដំណើរ អ្នកស្រាវជ្រាវ និងអ្នកដំណើរកម្សាន្តផ្សងព្រេងដែរ ប៉ុន្តែមិនញឹកញយទេពោលគឺ ១ឆ្នាំឬ២ឆ្នាំទើបបានឡើងទៅម្តង។ កន្លងមកមានអ្នកស្រាវជ្រាវតិចតួចបានទៅដល់បឹងនេះ ពីព្រោះថាការធ្វើដំណើរទៅ ជួបការលំបាកខ្លាំង និងឆ្ងាយផង។ តាមពិតបឹងនេះផ្តល់សក្តានុពលធនធានទឹកយ៉ាងសម្បើម និងថែមទាំងមានសក្តានុពលទាក់ទាញផ្នែកទេសចរណ៍ថែមទៀត។
អតីតកងទ័ពខ្មែរក្រហមរូបនេះបានឱ្យដឹងបន្ថែមថា៖”ទេសភាពនៅតំបន់បឹងកន្លែងនេះ ពិតជាស្រស់ស្អាតខ្លាំងណាស់ មានព្រៃស្រោង មានសត្វច្រើនប្រភេទ ក្នុងនេះពិសេសសត្វស្វា សត្វទោច ហើយឱ្យតែដល់ម៉ោង ៤ រសៀលសត្វទោចស្រែកយំទ្រហឹងអឺងកងតែម្តង។សត្វទោចមានទាំងពណ៌ ប្រផេះ ខ្មៅ និងខ្លះស។ បើយើងចង់ថតសត្វទោចឬស្វាអាចទៅកាន់កន្លែងនេះបាន។ក្រៅពីនេះក៏សម្បូរ ទៅដោយឱសថបុរាណច្រើនប្រភេទ គេអាចយកមកធ្វើថ្នាំបុរាណព្យាបាលរោគជំងឺក៏មិនចេះខ្វះដែរ”។
ទាក់ទិនក្នុងរឿងនេះដែរ លោក គឹម សុង ប្រធានសហគមន៍តំបន់ ការពារធម្មជាតិទឹកធ្លាក់អូរជាំបានឱ្យដឹងថា ទឹកធ្លាក់អូរជាំ ជាទីកន្លែងទឹកធ្លាក់ដ៏ល្អឯកមួយកន្លែង ដែលមានទឹកហូរមិនចេះរីងស្ងួតឡើយដោយសារថាបានមកពីប្រភពទឹក បឹងដ៏ធំមួយកន្លែង នេះឯង។ លោកបានរៀបរាប់ឱ្យដឹងថា “ទឹកបឹងនេះគេឱ្យឈ្មោះថាបឹងអូរជាំ ឬអ្នកខ្លះហៅថាទន្លេផែន ។ ទឹកធ្លាក់ចុះមកពីលើភ្នំដែលមានប្រភពមកពីបឹងដ៏ធំទំហំប្រមាណជិត៣ហិកតា ដោយបានបង្ហូរទម្លាក់កាត់តាមផ្ទាំងថ្មធំៗជាច្រើនដំណាក់ មកក្រោមបង្កើតជាផ្ទាំងទស្សនីយ ភាពគួរឱ្យគយគន់ណាស់”។
ប្រធានសហគមន៍រូបនេះ បានបន្តឱ្យដឹងថា “បឹងមួយកន្លែងនេះតាម ពិតមិនសូវមានអ្នកទៅដល់ទេដោយសារវាស្ថិតនៅលើកំពូលភ្នំ ហើយបានបង្ហូរទឹកគ្រប់រដូវកាល ដែលធ្វើឱ្យទឹកធ្លាក់អូរជាំមានខួបប្រាំងវស្សា”។ បើតាមលោកប្រធានសហគមន៍អូរជាំបានឱ្យដឹងបន្ថែមថា បើតាមការ ស្រាវជ្រាវទឹកបឹងមួយកន្លែងនេះមានជម្រៅប្រមាណ២០-៣០ម៉ែត្រ និងមានទំហំជិត៣ហិកតា។បច្ចុប្បន្នមានមនុស្សតិចតួចណាស់បានទៅដល់ ហើយបានស្គាល់។អ្នកស្រុកនៅទីនេះ ក៏កម្រអ្នកទៅ ដល់ និងបានឃើញដោយផ្ទាល់ដែរ៕
![](https://blogger.googleusercontent.com/img/b/R29vZ2xl/AVvXsEgs2hCVSNPqhZQJVasrPgxqP2LS_l7gbs2ZoPnmy2AUFRv_sdiUzGiFgbarkO-T1X293Y1xKB-sVELCfeA6EBNBvavo3ECYgHqfsid6c30qtBJo21bRIGvsXPqf8hqDlQCnj-ui9QWSRthLqR48G--gELSr8Sbcn3_S5Ho1wAHDQj8gauJFQ2y2MNl9/s1600/photo-2023-02-22-11-15-42-2.jpg)
![](https://blogger.googleusercontent.com/img/b/R29vZ2xl/AVvXsEhbi3EqeAUxMICeg2-N-aR_ya4S1EL1ofXNTp7uFdki2lmJJz-rVDnMxUCHRJcHft8jGB3mmhzInadjhphQFVXgJT70xhiazXo2rPmV-zKcRt_wVC_rUWLwQ7sXnCRuai4LRm8d37s5R32-HUU-LsGCes0nDEqN6_ainnP-LKdYadsl7B2chS6c9kxT/s1600/photo-2023-02-22-11-15-42-3.jpg)
![](https://blogger.googleusercontent.com/img/b/R29vZ2xl/AVvXsEhPe0Fu1r7llm1yKihd2w8j0wIp41AHogyu5d_n3sACIvJrLOVIbSecu7O_EHxPjvaf53bKLcUh5ly_Z7GR2E5cTKrmBcKlkZ2-fFeDTHItJd5JyjjvJRtUsfXuCDOvFngELWgAeL17MUmUG7tk1E9Dy4YY5RWVCflf9gdJG_yo5pqaky56IgUGeMY6/s1600/photo-2023-02-22-11-15-42-4.jpg)
![](https://blogger.googleusercontent.com/img/b/R29vZ2xl/AVvXsEg0PcuoNmS9Euf_6picf5d-3f1XZQ5N_DgSiuaMQ9MnL_3daMnPd5o3s2oVB1tQOOS8-qB3HVrd_ocnGk67VaDbIfLVIz6DE5olvu17EkR4ju2JKfz6J5iH3SxoZtexOLSXgciNdaEHFi11gJGsYjsIa6e6ZJQI-Ex4l9F3F_67WTfhwqxqNKAmrmr2/s1600/photo-2023-02-22-11-15-42-5.jpg)
![](https://blogger.googleusercontent.com/img/b/R29vZ2xl/AVvXsEidtGjI58CAVVkp_9NT5X6HGzxd2tEouFoCcVO5L4Iim1usHaHCbzAeQ8-R76jSvbbvw05U7hNCoGm-G5tLbAPuKwXU8Jre0wsYTzQyBqREcZ_VcveAUNolys2C12ABQzmFxo8JFPLKKNb0jLaGKV0seqVsc_rUQl0MwJPszpRfjyupn8cDAz1dOZSm/s1600/photo-2023-02-22-11-15-42.jpg)
![](https://blogger.googleusercontent.com/img/b/R29vZ2xl/AVvXsEjWVct4RznNSSj74Bo250rfIy05WGzn4_p_0IuH6ejImHccyo_xvsXCNb2eyGM57ypwfJbra9HiR4AERJFuR5HFLiJygPOEFMBf6IBWlawcIs5BPRcmxat7RNoul0MglVd_GXFUvu7M8ABtefVk44aiyB6HFFefcpNgk2UifES7dOu-YIxF-PTDAIu3/s1600/photo-2023-02-22-11-15-43.jpg)
No comments