ជនសង្ស័យម្នាក់ត្រូវ កម្លាំងនគរបាលប៉ុស្តិ៍ទួលសង្កែ១ ធ្វើការឃាត់ខ្លួន ក្រោយពេលទទួលពាក្យបណ្ដឹងពីនារីរងគ្រោះម្នាក់ ដោយចោទប្រកាន់ថាប៉ុនប៉ងចាប់រំលោភ

ជនសង្ស័យម្នាក់ត្រូវ កម្លាំងនគរបាលប៉ុស្តិ៍ទួលសង្កែ១ ធ្វើការឃាត់ខ្លួន ក្រោយពេលទទួលពាក្យបណ្ដឹងពីនារីរងគ្រោះម្នាក់ ដោយចោទប្រកាន់ថាប៉ុនប៉ងចាប់រំលោភ 

ភ្នំពេញ ៖ នាព្រឹកថ្ងៃទី ២០ ខែតុលា ឆ្នាំ២០២០ នៅចំណុចហាងកាហ្វេមួយកន្លែង តាមបណ្ដោយផ្លូវបេតុង ក្នុងភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ កាលពីវេលាម៉ោង ៩:១៥នាទី កម្លាំងនគរបាលប៉ុស្តិ៍ទួលសង្កែ១ ឃាត់ខ្លួនជនសង្ស័យម្នាក់ ក្រោយពេលទទួលពាក្យបណ្ដឹងពីនារីរងគ្រោះម្នាក់ ដោយចោទប្រកាន់ថា ប៉ុនប៉ងចាប់រំលោភ តែមិនបានសម្រេច ។

ជនសង្ស័យម្នាក់ត្រូវបានកម្លាំងនគរបាលប៉ុស្តិ៍ទួលសង្កែ១ ធ្វើការឃាត់ខ្លួនក្រោយពេលទទួលពាក្យបណ្ដឹងពីនារីរងគ្រោះម្នាក់ ដោយចោទប្រកាន់ថា ប៉ុនប៉ងចាប់រំលោភ តែមិនបានសម្រេច មានឈ្មោះ ឈុន ភេទប្រុស អាយុ ២៣ឆ្នាំ មានទីលំនៅឃុំអរិយក្សត្រ ស្រុកមុខកំពូល ខេត្តកណ្ដាល ។ ចំណែកឯនារីរងគ្រោះ អាយុ ១៨ឆ្នាំ ស្នាក់នៅ ភូមិកើតហេតុខាងលើ ។

នារីរងគ្រោះបានប្រាប់ថានៅវេលាយប់ថ្ងៃកើតហេតុ ជនរងគ្រោះ និងមិត្តស្រី ២នាក់ រួមទាំងជនសង្ស័យម្នាក់ទៀត បានដេកនៅក្នុងបន្ទប់ផ្ទះជួលមួយកន្លែង ស្ថិតក្នុងក្រុមទី៨ ភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រហូតដល់ម៉ោង ៥ទៀបភ្លឺថ្ងៃទី២០ ខែតុលា ឆ្នាំ២០២០ ជនសង្ស័យឃើញមិត្តភក្តិនារីរងគ្រោះ ដេកលង់លក់អស់ រូបគេបានរង្កិលទៅដេកក្បែរនាង នៅកៀនជញ្ជាំង ហើយយកដៃរបស់គេស្ទាបអង្អែលលើដងខ្លួនរបស់នាង រួចទាញស្រាតខោរបស់នាង ដល់ត្រឹមជង្គុង ប៉ុនប៉ងធ្វើសកម្មភាពរំលោភ តែត្រូវនារីរងគ្រោះដឹងខ្លួនទាន់ បានលើកខោងើបពីដេកក្បែរជញ្ជាំង មកដេកកណ្តាលមិត្តភ័ក្តិវិញ ។ មួយសន្ទុះក្រោយមក ជនសង្ស័យបានតាមរត់ទៅដេកក្បែរនារីរងគ្រោះ ហើយធ្វើសកម្មភាពយកដៃរបស់គេ អង្អែលថ្នមៗទៅលើដងខ្លួនរបស់នារីរងគ្រោះ ព្រមទាំងទាញខោស្រាតដល់ត្រឹមជង្គុងដូចមុន ហើយប៉ងធ្វើសកម្មភាពលើកទី២ តែត្រូវនារីរងគ្រោះដឹងខ្លួនទៀត ក៏បានរត់ឡើងទៅប្រាប់មិត្តស្រី ដែលកំពុងដេកនៅក្នុងបន្ទប់ឡៅតឿជាន់ខាងលើ ទើបបង្កឲ្យមានការភ្ញាក់ផ្អើល ។

ក្រោយពីមានការភ្ញាក់ផ្អើលភ្លាមៗនោះជនសង្ស័យ បានបើកទ្វារជិះម៉ូតូរត់គេចខ្លួនបាត់ ។ លុះព្រឹកឡើងថ្ងៃទី២០ ខែតុលា ឆ្នាំ២០២០ ទើបនារីរងគ្រោះបានមកដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលទួលសង្កែ១ ដើម្បីឲ្យជួយអន្តរាគមន៍ ដើម្បីឃាត់ខ្លួនជនសង្ស័យ ។

ក្រោយពីទទួលបានពាក្យបណ្តឹងភ្លាមនោះកម្លាំងនគរបាលប៉ុស្តិ៍ទួលសង្កែ១ ក៏បានសហការជាមួយនារីរងគ្រោះ រួចក៏ចាប់បានជនសង្ស័យនៅចំណុចហាងកាហ្វេមួយកន្លែង តាមបណ្ដោយផ្លូវបេតុងភូមិក្រោលគោ សង្កាត់គីឡូម៉ែត្រលេខ៦ យកមកសាកសួរនៅប៉ុស្តិ៍នគរបាលរដ្ឋបាលទួលសង្កែ១ ដើម្បីកសាងសំណុំរឿង បញ្ជូនទៅតុលាការចាត់ការទៅតាមនីតិវិធី៕