អ្នកសារព័ត៌មាន ម្នាក់ ត្រូវបានឃាត់ខ្លួន បញ្ជូនទៅតុលាការ ក្រោយដឹកគ្រាប់មីនតោន ចំនួន១គ្រាប់ធំ យកទៅឲ្យលោកប៉ូលីស

ខេត្តឧត្តរមានជ័យ៖ បុរសម្នាក់ដែលជាអ្នកសារព័ត៌មាន និងមិត្តភក្តិម្នាក់ទៀត បាននាំគ្នាដឹកយកគ្រាប់មីនតោន ១គ្រាប់ ទៅប្រគល់ជូនសមត្ថកិច្ចនគរបាលក្រុងសំរោង ខេត្តឧត្តរមានជ័យ ហើយក៏ត្រូវបានសមត្ថកិច្ចនគរបាលប៉ុស្តិ៍រដ្ឋបាលសង្កាត់អូរស្មាច់ ឃាត់ខ្លួនតែម្តង កាលពីវេលាម៉ោងប្រហែល ១០:០០នាទីយប់ ថ្ងៃទី៦ ខែកុម្ភៈ ឆ្នាំ២០២៥។

ការឃាត់ខ្លួនអ្នកសារព័ត៌មាននេះ គឺធ្វើឡើងបន្ទាប់ពី អ្នកសារព័ត៌មាននិងមិត្តភក្តិរបស់គាត់ ១នាក់ទៀត បានដឹកគ្រាប់មីនតោន ១គ្រាប់ ដែលប្រទះឃើញនៅលើដី ក្នុងតំបន់ស ក្បែរខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រសង្កាត់អូរស្មាច់ ក្រុងសំរោង ខេត្តឧត្តរមានជ័យ។

ក្រោយសួរនាំរួចសមត្ថកិច្ចក៏បានកសាងសំណុំរឿង បញ្ជូនខ្លួនជនសង្ស័យទាំងពីរនាក់ ទៅកាន់តុលាការដើម្បីចាត់ការបន្តទៅតាមផ្លូវច្បាប់៕