ស្គាល់អ្នកបើករថយន្តបុករះនៅមុខក្រសួងមហាផ្ទៃ គឺ ប៉ូលិសស័ក្តិ៥ នៃស្នងការដ្ឋាននគរបាលរាជធានីភ្នំពេញ

ករណីគ្រោះថ្នាក់ចរាចរណ៍បុករះ កាលពីរសៀលថ្ងៃទី១៥ ខែឧសភា ឆ្នាំ២០២៥នៅបណ្ដោយផ្លូវព្រះនរោតម្ដ មុខក្រសួងមហាផ្ទៃ អ្នកបើករថយន្ដបង្កមានឈ្មោះ ហ៊ុន ហេង មានតួនាទីជា នាយការិយាល័យគណនេយ្យ ចំណុះផែនការងារភស្តុភារ និងហិរញ្ញវត្ថុ នៃស្នងការដ្ឋាននគរបាលរាជធានីភ្នំពេញ។

ចំណែកជនរងគ្រោះដែលស្លាប់មានឈ្មោះ រៀន សុនឿន ភេទប្រុស មានអាយុ៤៩ឆ្នាំ ស្នាក់នៅសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

យោងតាមវីដេអូពីកាមរ៉ាសុវត្ថិភាព ក្នុងពេលកើតហេតុ ឃើញរថយន្តមួយគ្រឿងម៉ាក Lexus RX 400h ស្លាកលេខរថយន្ត 2AQ-2188 បើកបរយ៉ាងលឿនទៅបុករះម៉ូតូ និងម៉ូតូកង់បីឥណ្ឌា ជាច្រើនគ្រឿងបណ្តាលឲ្យដួលនិងក្រឡាប់ផ្កាប់ផ្ងារ ថែមទាំងឲ្យមានអ្នកស្លាប់និងរបួសទៀតផង។

បច្ចុប្បន្នលោកវរសេនីយ៍ឯក ហ៊ុន ហេង ដែលជាអ្នកបើករថយន្ដបង្ក ត្រូវបានកម្លាំងនគរបាលចររាចរណ៍ខណ្ឌចំការមន ឃាត់ខ្លួនបានភ្លាមៗ និងបញ្ជូនបន្តឲ្យកម្លាំងនគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីអនុវត្តនីតិវិធីច្បាប់បន្ត៕