ទីតាំងល្បែងខុសច្បាប់ Online កំពុងបេីកដំណើរការយ៉ាងភ្លូកទឹកភ្លូកដី ក្នុងខណ្ឌពោធិ៍សែនជ័យ ខណៈសមត្ថកិច្ចមូលដ្ឋាន សម្ងំស្ងៀមដូចត្រូវថ្នាំសណ្ដំ

យោងតាមសេចក្តីរាយការណ៍ ដែលសារព័ត៌មាន ទើបទទួលបាន បានបញ្ជាក់យ៉ាងច្បាស់ថាទីតាំងល្បែងស៊ីសងមាន់ជល់ និងឆ្នោតឡូតូតាមប្រព័ន្ធអនឡាញ កំពុងតែបង្កព្យុះភ្លៀងពេញមូលដ្ឋាន សង្កាត់កាកាប២ ខណ្ឌពោធិ៍សែនជ័យ។

ប្រភពព័ត៌មានបានបញ្ជាក់ទៀតថា ទីតាំងខាងលើមានអ្នកលេងល្បែងភ្នាល់ដាក់ប្រាក់ ចាប់ពី ៥០០រៀល រហូត ៥០០០រៀល មានខ្លះភ្នាល់ម្តងៗ ១មុឺនរៀលក៏មាន ហើយមានការស្រែកហ៊ោកញ្ជ្រៀវទ្រហឹងយ៉ាងខ្លាំង ប៉ុន្តែគ្មានការរំខានដល់អាជ្ញាធរសមត្ថកិច្ចមូលដ្ឋានបន្តិចសោះឡើយ។

ករណីនេះធ្វើឲ្យប៉ះពាល់យ៉ាងខ្លាំង ចំពោះជីវភាពប្រចាំថ្ងៃរបស់ប្រជាជន និងកំពុងផ្តល់ផលប៉ះពាល់យ៉ាងខ្លាំង ដល់ការដឹកនាំរបស់ប្រមុខរាជរដ្ឋាភិបាលកម្ពុជា ជាពិសេសកំពុងបង្កើតឲ្យមានចោរលួច ឆក់ប្លន់ ហិង្សាក្នុងគ្រួសារ បង្កើនកំណើនឲ្យមានប្រជាជនក្រីក្រ។

ចំណែកឯមន្ត្រីអាជ្ញាធរមូលដ្ឋាន គឺមិនខ្វល់ពីចំណាត់ការបង្ក្រាបទប់ស្កាត់នោះទេ គឺសម្ងំស្ងៀមស្ងាត់ ដូចជាត្រូវថ្នាំសណ្តំ មិនខ្វល់ពីភូមិសង្កាត់មានសុវត្ថិភាព ដែលថ្នាក់ដឹកនាំដាក់បទបញ្ជានោះទេ។

ប្រជាពលរដ្ឋសំណូមពរ លោក ម៉ន វុទ្ធី អធិការខណ្ឌពោធិ៍សែនជ័យ ជាពិសេសលោក អភិបាលនៃគណៈអភិបាលខណ្ឌពោធិ៍សែនជ័យ សក់ ច័ន្ទកញ្ញារិទ្ធិ មេត្តាជួយអន្តរាគមន៍ទប់ស្កាត់បង្ក្រាបជុំវិញករណីល្បែងស៊ីសងខាងលើនេះផងទានម្ចាស់៕